Վերակառուցման և զարգացման եվրոպական բանկը (ՎԶԵԲ) 2026 թվականի համար իջեցրել է իր տնտեսական աճի կանխատեսումը մինչև 3.1% այն երկրների համար, որտեղ այն ծրագրեր է իրականացնում՝ Իրանում ԱՄՆ-ի և Իսրայելի ռազմական գործողության բացասական ազդեցության պատճառով․ գրում է ТАСС-ը։
Բանկի զեկույցի համաձայն՝ 2026 թվականին տնտեսական աճը 0.5 տոկոսային կետով (տ.կ.) ցածր կլինի նախորդ զեկույցում կանխատեսվածից, որը հրապարակվել էր փետրվարի 26-ին՝ Իսլամական Հանրապետության դեմ ավիահարվածներից ընդամենը երկու օր առաջ։
2027 թվականի աճի կանխատեսումն իջեցվել է 0.1 տ.կ.-ով՝ մինչև 3.6%։
«Մերձավոր Արևելքում հակամարտության ֆոնին, որը հանգեցրել է էներգակիրների գների բարձրացման և մատակարարման շղթայի խափանումների, տնտեսական աճը 2026 թվականի առաջին եռամսյակում դանդաղել է: Տարեկան աճը գնահատվում է 2.9%: Վերջին տվյալները ցույց են տալիս, որ ՎԶԵԲ տարածաշրջանների մի քանի խոշոր տնտեսություններում, այդ թվում՝ Եգիպտոսում, Ղազախստանում, Ռումինիայում, Թուրքիայում և Ուկրաինայում, կանխատեսվում է, որ աճը 2025 թվականի 3.4%-ից կդանդաղի մինչև 3.1% 2026 թվականին, նախքան 2027 թվականին վերականգնվելը մինչև 3.6%: Սա 2026 թվականի փետրվարյան սպասումներից 0.5 և 0.1 տոկոսային կետերով ցածր է», – նշվում է զեկույցում:
Բանկի լոնդոնյան գլխավոր գրասենյակից հայտնել են, որ հակամարտության սրացումը, որը հանգեցրել է նավթի և գազի գների բարձրացման, մեծացրել է ԱՄՆ-ի և Եվրոպայի գազի գների միջև եղած տարբերությունը, որը «հնգապատիկ գերազանցել է ցուցանիշը՝ բացասաբար ազդելով եվրոպական տնտեսության մրցունակության վրա»:
Արևելյան Եվրոպայի և Կովկասի երկրների (Ադրբեջան, Հայաստան, Վրաստան, Մոլդովա և Ուկրաինա) աճի կանխատեսումը նվազել է 0.1 տոկոսային կետով՝ կազմելով 2.8%, մինչդեռ 2027 թվականի գնահատականը մնացել է անփոփոխ՝ 3.9%:
Առավել զգալի անկումներ են սպասվում Ուկրաինայում (0.3 տոկոսային կետով՝ նվազելով մինչև 2.2% այս տարի) և Մոլդովայում (0.2 տոկոսային կետով՝ նվազելով մինչև 2.8%):
Թուրքիայի ՀՆԱ-ի աճի կանխատեսումը երկու դեպքում էլ իջեցվել է 0.5%-ով՝ մինչև 3.5% 2026 թվականին և 4% 2027 թվականին։