Հնդկաստանի կառավարությունը դիտարկում է բյուջեի տարբեր հոդվածներով ծախսերի կրճատման հնարավորությունը՝ նավթի և պարարտանյութերի գնման ծախսերի փոխհատուցման համար բարձր սուբսիդիաների պատճառով։ Այս մասին, հղում կատարելով աղբյուրներին, հայտնել է The Economic Times-ը։
Կրճատումները չպետք է անդրադառնան կապիտալ ծախսերի և պաշտպանության համար նախատեսված հատկացումների վրա։ Եթե նավթի համաշխարհային բարձր գները պահպանվեն, ապա բյուջետային ծախսերի աճը զսպելու համար կարող է պահանջվել բյուջեի ծախսերի հետագա վերանայում։
Մերձավոր Արևելքում հակամարտությունը հանգեցրել է Հնդկաստանի՝ հում նավթի ներմուծման ծախսերի աճի ազգային արժույթի փոխարժեքի անկման և գնաճի աճի ֆոնին, որը, ըստ գնահատականների, կարող է գերազանցել Կենտրոնական բանկի տարեկան 4 տոկոս թիրախային ցուցանիշը։ Այս գործոնները կարող են թույլ չտալ կառավարությանը ընթացիկ 2026-2027 ֆինանսական տարում (սկսվել է ապրիլին) իրականացնել բյուջեի դեֆիցիտի՝ մինչև ՀՆԱ 4,3 տոկոս նախատեսված կրճատումը։
Պաշտոնական տվյալներով՝ Հնդկաստանի բյուջեի դեֆիցիտը ապրիլին նախորդ տարվա նույն ժամանակահատվածի համեմատ գրեթե կրկնապատկվել է և կազմել 37,8 մլրդ դոլար։ Այն ծածկելու համար կառավարությանը հարկավոր կլինի ավելացնել փոխառությունները, ինչը հանգեցնում է պետական պարտքային պարտավորությունների աճին։ Այս պայմաններում Հնդկաստանի նախարարների կաբինետը հրատապ միջոցներ է ձեռնարկել ռուփիի փոխարժեքին աջակցելու և օտարերկրյա կապիտալի արտահոսքը կրճատելու համար, իսկ Կենտրոնական բանկը ձգտում է ավելացնել արտարժութային պահուստները՝ հաշվի առնելով շուկայի տատանողականությունը։