Կոլումբիայի նախագահ Գուստավո Պետրոն CBS News հեռուստաալիքին տված հարցազրույցում ԱՄՆ նախագահ Դոնալդ Թրամփին մեղադրել է Կոլումբիայի ընտրություններին միջամտելու մեջ։ Հայտարարությունը եղել է այն բանից հետո, երբ ամերիկյան առաջնորդը հրապարակայնորեն աջակցել է աջակողմյան ուժերի թեկնածու Աբելարդո դե լա Էսպրիելյային։
Նախագահական ընտրությունների երկրորդ փուլից երկու շաբաթ առաջ Թրամփը հայտարարություն էր տարածել, որում «լիակատար և անվերապահ աջակցություն» էր հայտնել իր նախընտրած թեկնածուին՝ ընդգծելով, որ քվեարկության արդյունքը մեծ նշանակություն կունենա Կոլումբիայի և ԱՄՆ-ի ապագա հարաբերությունների համար։
Պետրոն նման դիրքորոշումը որակել է որպես ինքնիշխանության սկզբունքների խախտում և հայտարարել, որ Վաշինգտոնը փաստացի աջակցում է այնպիսի ուժերի, որոնք, իր գնահատմամբ, կապված են նարկոբզինեսի և ծայրահեղ աջակողմյան խմբավորումների հետ։
Կոլումբիայի առաջնորդն ԱՄՆ-ի հետ հարաբերություններում առկա լարվածությունը կապել է նաև իր ձախ հայացքների և միջազգային հարցերի, այդ թվում՝ Գազայի հատվածում տիրող իրավիճակի շուրջ Թրամփի վարչակազմի հետ ունեցած տարաձայնությունների հետ։
CBS հեռուստաալիքին տված Պետրոյի հարցազրույցը հրապարակվել է ընտրությունների առաջին փուլից օրեր անց, որում աջակողմյան թեկնածու Աբելարդո դե լա Էսպրիելյան ստացել էր քվեների 43,7%-ը, իսկ ձախակողմյան սենատոր Իվան Սեպեդան՝ 40,9%-ը։ Երկրորդ փուլը կայանալու է երկու շաբաթից էլ քիչ ժամանակահատվածում։
Պետրոն նախազգուշացրել է, որ աջ ուժերի հաղթանակը կարող է քաղաքական բռնության նոր ալիք առաջացնել երկրում։ Նրա խոսքով՝ խորը բևեռացման պայմաններում ագրեսիվ քաղաքական հռետորաբանության աճը վտանգավոր իրավիճակ է ստեղծում։
«Կոլումբիայում ատելությունը շատ արագ է հանգեցնում մահերի»,- հայտարարել է երկրի նախագահը։