Ռուսական մամուլը շարունակում է ակտիվորեն անդրադառնալ ՀՀ-ում ընտրություններին։
РИА Новости-ն ներկայացրել է ֆոտոշարք ընտրություններից։
Ինչպես այս, այնպես էլ մի շարք այլ հեղինակավոր լրատվամիջոցներ հրապարակել են ընտրություններին մասնակցության տոկոսի վերաբերյալ պարբերաբար թարմացումներ՝ ընդգծելով, որ ընտրողների մասնակցությունը շատ բարձր է։
Կայքերը ներկայացրել են ՀՀ 2-րդ նախագահ Ռոբերտ Քոչարյանի և «Ուժեղ Հայաստան» կուսակցության առաջնորդ Սամվել Կարապետյանի հայտարարությունները, ինչպես նաև ԵՄ-ին այժմ միանալու անհնարինության մասին Փաշինյանի հայտարարությունները։ Նշվել է, որ «Սրբազան պայքարի» առաջնորդ Բագրատ սրբազանը կոչ է արել հայ քաղաքացիներին գնալ ընտրության։
Հաղորդվել է նաև, որ դիմակավորված անձինք փորձել են մտնել գործարար Սամվել Կարապետյանի գլխավորած ընդդիմադիր դաշինքի Գյումրու գրասենյակ։
ՌԴ պետդումայի պատգամավոր Արտյոմ Տուրովը, որը դիտարկում է Հայաստանում անցկացվող ընտրությունները, Вести-ի հետ զրույցում նշել է՝ չկնքված քվեատուփերը, տարեցների համար քվեարկության դժվարությունները և ազգային դիտորդների կողմից միջամտությունը Հայաստանի ընտրություններում հիմնական խախտումներն են:
Նա հավելել է, որ ԱՊՀ դիտորդական առաքելությունը զբաղվում է ազգային դիտորդների կողմից քվեարկության գործընթացին միջամտության հարցերով։
Ռուս սենատոր Իվան Նովիկովը, որը ևս դիտարկում է Հայաստանի ընտրությունները, «Подъем» հրատարակությանը հայտնել է, որ ինքն «ասելիք ունի» քարոզարշավի վերաբերյալ, բայց առայժմ «կխուսափի որևէ գնահատական տալուց»։
Սենատորը պարզապես պարզաբանել է, որ ընտրատեղամասերում քվեարկությունը սահուն է ընթանում՝ չնայած հերթերին։ Նա կուտակումները բացատրել է նույնականացման ավտոմատացված համակարգի դանդաղ աշխատանքով։ Նովիկովը նաև նշել է «հետաքրքիր քվեարկության ընթացակարգը»։ Նա բացատրել է, որ յուրաքանչյուր կուսակցություն կամ դաշինք ունի իր սեփական քվեաթերթիկը, որի վրա նշված է իր անունը և ընտրված համարը։ Սենատորը հավելել է, որ ընտրողների մասնակցությունը բարձր է եղել։
Комсомольская Правда-ն գրում է, որ Նիկոլ Փաշինյանն այլևս Ռուսաստանին դաշնակից չի անվանում։
Նա անտեսում է ՀԱՊԿ-ը և ԵԱՏՄ-ն և արդեն խոստանում է քաղաքացիներին առանց վիզայի ճանապարհորդություն դեպի Եվրոպա, չնայած Բրյուսելը նրանց նույնիսկ չի հրավիրել։
Ընդդիմադիր գործիչները մեկը մյուսի հետևից ձերբակալվում են, երբեմն՝ սխալ բառի, երբեմն՝ պարզապես իրենց վարկանիշի համար։ Հասարակությունը չափազանց բևեռացված է։ Քաղաքական դրդապատճառներով սկանդալներ անընդհատ բռնկվում են փողոցներում։ Մինչդեռ Փաշինյանը բացահայտորեն սիրախաղ է անում Բաքվի և Անկարայի հետ։ Սա ենթադրում է ուղղակի տարածքային զիջումներ՝ առանց հաշվի առնելու տեղի հայ բնակչության շահերը։ Այս ամենը ներկայացվում է «խաղաղություն ցանկացած գնով» քողի տակ, բայց դա իսկապես սարսափեցնում է շատերին։ Բոլորը սպասում են «կարուսելային քվեարկության», սկանդալների և այլ կեղծիքների։
Հայաստանում շատերը համոզված են, որ վարկանիշները բոլորովին այլ կլինեին, եթե չլինեին կոշտ քաղաքական բռնաճնշումները։ Փաստն այն է, որ իշխող կուսակցությունը մեկուկես տարուց ավելի է, ինչ պատրաստվում է այս ընտրություններին՝ աննախադեպ չափով մաքրելով քաղաքական դաշտը։
РБК-ն գրում է, որ «Ուժեղ Հայաստան» ընդդիմադիր կուսակցության առաջնորդ և գործարար Սամվել Կարապետյանը խորհրդարանական ընտրություններում քվեարկելուց հետո հայտարարել է, որ կուսակցության ավելի քան 100 կողմնակիցներ են բերման ենթարկվել։
ТАСС-ի թղթակիցը հայտնել է, որ մի շարք ընտրատեղամասերում հերթեր են գոյացել: Քվեարկության եկածները սպասում են մոտավորապես 10-15 րոպե։ Ոստիկանությունը հերթապահություն է իրականացնում ընտրատեղամասերի մոտ: Քաղաքում պարեկային ծառայություն է իրականացվում, սակայն Հայաստանի մայրաքաղաքում որևէ ակնհայտ լարվածություն չկա:
Московский Комсомолец-ը, EADaily-ն գրել են, որ Հայաստանում գրանցվել են ընտրատեղամասերից քվեաթերթիկների դուրսբերման դեպքեր։
RT-ն գրել է ընտրական հանձնաժողովների անդամների ձերբակալությունների, ընդդիմության շենքերի խուզարկությունների մասին։