Գերմանական BMW ավտոարտադրողը նվազեցրել է իր ֆինանսական կանխատեսումները 2026 թվականի համար՝ վերանայումը բացատրելով հիմնական շուկաներում իրավիճակի վատթարացմամբ և Մերձավոր Արևելքի հակամարտության հետ կապված անկայունության հետևանքներով, հաղորդում է Ֆրանսպրես գործակալությունը։
Ընկերությունը տարվա արդյունքներով ակնկալում է նախահարկային շահույթի զգալի անկում, մինչդեռ ավելի վաղ չափավոր կրճատում էր կանխատեսվում։ Վերանայվել է նաև ավտոմեքենաների մատակարարումների կանխատեսումը. կայուն մակարդակի փոխարեն այժմ սպասվում է դրանց չնչին նվազում։
BMW-ում հայտարարել են, որ ավտոմոբիլային ստորաբաժանման շահութաբերությունը կկազմի 1%-ից մինչև 3%, այնինչ նախկինում ակնկալվում էր 4–6%։
Ընկերության ղեկավարությունը նշել է Չինաստանի շուկայում պայմանների վատթարացումը, որտեղ ուժեղանում է տեղական արտադրողների մրցակցությունը և պահպանվում է թույլ պահանջարկը՝ հատկապես ներքին այրման շարժիչներով ավտոմեքենաների նկատմամբ։ Միաժամանակ ընդգծվում է, որ Եվրոպայում և ԱՄՆ-ում վաճառքները չեն փոխհատուցում Ասիայում գրանցված անկումը։
Որպես ճնշման լրացուցիչ գործոններ են նշվել էներգետիկ ծախսերի աճը և համաշխարհային տնտեսության ընդհանուր անկայունությունը, որն ազդում է սպառողական պահանջարկի վրա։
Ընկերությունում հայտնել են ծախսերի կրճատման և ներքին գործընթացները շուկայական ներկա պայմաններին հարմարեցնելու միջոցառումներն ուժեղացնելու ծրագրերի մասին։
BMW-ն միաժամանակ նշել է Մերձավոր Արևելքի հակամարտության պայմաններում աշխարհաքաղաքական լարվածության ազդեցությունը, ներառյալ էներգակիրների գների աճը և գործարար ակտիվության անկումը։