«Դիլի» պլոմբիրը վերադարձնում է մանկության համը․ ինչպե՞ս սպառողների արձագանքը դարձավ նոր կարգախոս

2004 թվականից հայկական շուկայում իր հաստատուն տեղն ունեցող «Դիլի» կաթնամթերքի ընկերությունը մեկ տարի առաջ սպառողին ներկայացրեց իր նոր արտադրանքը՝ 100% անարատ պլոմբիրը։ Այս ընթացքում նոր պաղպաղակը հասցրել է դառնալ հազարավոր մարդկանց սիրելին։ Արտադրության մեկնարկից ի վեր ընկերության նպատակն էր շուկա վերադարձնել բոլորին ծանոթ, բնական ու անփոխարինելի պաղպաղակի դասական համը, ինչը կարճ ժամանակում արժանացավ սպառողների մեծ վստահությանը։

Սպառողների անկեղծ արձագանքից՝ մինչև կարգախոս

Այս մեկ տարվա ընթացքում «Դիլի» պլոմբիրը ներկայացվել է տարբեր հանրային միջոցառումների ու փառատոնների, որտեղ հազարավոր մարդիկ հնարավորություն են ունեցել համտեսելու այն։ Հատկանշական է, որ մարդկանց կողմից ամենահաճախ հնչող արձագանքն էր՝ «Սա իսկական մանկության համ ունի»։

Հենց սպառողների այս անկեղծ արձագանքն էլ հիմք դարձավ պաղպաղակի նոր՝ «Մանկության համը» խորագրով արշավի համար։ Ընկերությունում վստահ են, որ այս պաղպաղակի յուրաքանչյուր գդալն իսկապես կարող է մարդկանց հիշեցնել մանկության անհոգ ու ջերմ օրերը։

«Մենք պարզապես ստեղծել ենք այն իրական որակն ու համը, որը երկար ժամանակ փնտրում էր սպառողը»,- նշում են ընկերությունում։

Ինչո՞ւ է «Դիլի» պլոմբիրն այդքան համեղ

«Դիլի» պաղպաղակը պատրաստվում է Դիլիջանի էկոլոգիապես մաքուր՝ Ալպյան գոտում գտնվող սեփական ֆերմայի բարձրորակ և անարատ կաթից։ Այն արտադրվում է դասական բաղադրատոմսով, ունի հարուստ սերուցքային համ և ներկայացված է ընտանեկան՝ 450 գրամանոց չափով։ Սպառողները կարող են ընտրել երկու սիրված տեսակներից.

• Վանիլային պլոմբիր՝ նրանց համար, ովքեր նախընտրում են ավանդական, նուրբ համը։

• Շոկոլադե պլոմբիր՝ նրանց համար, ովքեր սիրում են հագեցած շոկոլադե համ։