Իրանի արտգործնախարար Աբաս Արաղչին և Չինաստանի արտգործնախարար Վան Ին հեռախոսազրույց են ունեցել, որի ընթացքում քննարկել են Թեհրանի և Վաշինգտոնի միջև փոխըմբռնման Իսլամաբադի հուշագիրը, հաղորդում է Tehran Times-ը։
Արաղչին մանրամասն շարադրել է փաստաթղթի դրույթները և հույս հայտնել, որ Իրանն ու Չինաստանը կկարողանան օգտվել դրա ընձեռած հնարավորություններից՝ էներգետիկ և տնտեսական ոլորտներում համագործակցությունն ընդլայնելու համար։
Նա Պեկինին շնորհակալություն է հայտնել բանակցային գործընթացին աջակցելու համար և ընդգծել, որ համաձայնագրի լիարժեք ու պատշաճ իրականացումը, ներառյալ բոլոր ճակատներում ռազմական գործողությունների դադարեցումը, ԱՄՆ-ի պատասխանատվությունն է։
Վան Ին բարձր է գնահատել արտաքին ճնշումներին դիմակայելու Իրանի տոկունությունը և նրա «պատասխանատու դիվանագիտական մոտեցումը»։ Նա ընդգծել է պայմանավորվածությունների ճշգրիտ կատարման անհրաժեշտությունը և հայտարարել Չինաստանի պատրաստակամության մասին՝ աջակցելու գործընթացի իրականացմանը, տարածաշրջանային փոխգործակցության ուժեղացմանը և տարածաշրջանային խնդիրների կարգավորմանը։
Կողմերը նշել են նաև միջազգային հանրության և ՄԱԿ-ի Անվտանգության խորհրդի կողմից աջակցության անհրաժեշտությունը։