Ռուսաստանի հակաօդային պաշտպանության ուժերը շարունակում են հետ մղել Մոսկվայի ուղղությամբ իրականացվող անօդաչու թռչող սարքերի զանգվածային հարձակումը։ Մոսկվայի քաղաքապետ Սերգեյ Սոբյանինի փոխանցմամբ՝ մի քանի անօդաչու սարքերի հաջողվել է հասնել Մոսկվայի նավթավերամշակման գործարանի տարածք, որտեղ իրականացվում են հետևանքների վերացման աշխատանքներ։
Միջադեպի մանրամասները պաշտոնապես դեռևս չեն հրապարակվել։ Միաժամանակ, տեղեկությունների համաձայն, գործարանի տարածքից բարձրանում է խիտ սև ծուխ, ինչպես նաև լսվել են պայթյունների ձայներ։
Մոսկվայի ՆԳՆ-ն հայտնել է, որ միջադեպի հետևանքով մայրաքաղաքում սահմանափակվել է երթևեկությունը։ Փակվել են Չագինսկայա և Կապոտնյա փողոցների որոշ հատվածներ, սահմանափակումներ են կիրառվել նաև Վերխնիե Պոլյա փողոցում, Նովորյազանյան խճուղու որոշ հատվածներում և Մոսկվայի օղակաձև ավտոճանապարհի (ՄԿԱԴ) մի շարք հատվածներում։ Վարորդներին խորհուրդ է տրվում օգտվել շրջանցիկ երթուղիներից։
Նշվում է, որ հունիսի 16-ին Moscow Oil Refinery-ն արդեն վնասվել էր անօդաչու սարքերի հարձակման հետևանքով։ Այդ ժամանակ գործարանի տարածքում բռնկված հրդեհը արագորեն մեկուսացվել էր։
Մոսկվայի նավթավերամշակման գործարանը Ռուսաստանի խոշորագույն նավթավերամշակող ձեռնարկություններից մեկն է և մայրաքաղաքի միակ նմանատիպ օբյեկտը։ Այն մտնում է «Газпром нефти»-ի կազմի մեջ և գործում է 1938 թվականից։
Գործարանի առաջնային վերամշակման տարեկան հզորությունը կազմում է 12 միլիոն տոննա, իսկ վերջին տարիներին փաստացի վերամշակման ծավալը տատանվել է տարեկան 10-12 միլիոն տոննայի սահմաններում։ Ձեռնարկությունն արտադրում է շուրջ 30 տեսակի նավթամթերք՝ ներառյալ բենզին, դիզելային վառելիք, ավիացիոն կերոսին և բիտում։
Գործարանը ապահովում է Մոսկվայի տարածաշրջանի վառելիքի պահանջարկի մոտ 40 տոկոսը։ Բացի այդ, նշվում է, որ մայրաքաղաքում կառուցվող կամ վերանորոգվող յուրաքանչյուր երկրորդ ճանապարհի համար օգտագործվում է հենց այս ձեռնարկության արտադրած բիտումը։