ԱՄՆ փոխնախագահ Ջեյ Դի Վենսը հայտնել է, որ Իրանի հարցում Վաշինգտոնի և Իսրայելի միջև կարող են լինել տարաձայնություններ ոչ թե վերջնական նպատակների, այլ դրանց հասնելու եղանակների շուրջ։
Fox News-ի հարցազրույցում Վենսը նշել է, որ երկու երկրների նպատակների միջև սկզբունքային տարաձայնություն չի տեսնում, սակայն ընդունում է մոտեցումների տարբերությունը։
«Ես չգիտեմ՝ նպատակների շուրջ տարաձայնություն կա՞, թե՞ ոչ։ Երբեմն տարաձայնությունը միայն այն է, թե ինչպես հասնել այդ նպատակներին։ Միացյալ Նահանգների նախագահը, հակառակ Իսրայելի կառավարության որոշ ներկայացուցիչների դիրքորոշման, հայտարարել է, որ մենք պատրաստվում ենք շանս տալ այս բանակցություններին»,- ասել է նա։
Այս հայտարարությունը հնչել է մի քանի օր անց այն բանից հետո, երբ Վենսը հրապարակայնորեն քննադատել էր Իսրայելի գործողությունները՝ մերձավորարևելյան շարունակվող հակամարտության ֆոնին։ Այդ ժամանակ նա ընդգծել էր, որ ԱՄՆ նախագահ Դոնալդ Թրամփը մնում է աշխարհի այն սակավաթիվ առաջնորդներից մեկը, ով բացահայտ աջակցում է Իսրայելին։
«Դոնալդ Թրամփն ամբողջ աշխարհում պետության միակ ղեկավարն է, որն այժմ համակրանքով է վերաբերվում Իսրայելին։ Եվ միևնույն ժամանակ նա համաշխարհային գերտերության առաջնորդն է։ Եթե ես Իսրայելի կառավարության անդամ լինեի, չէի հարձակվի միակ հզոր դաշնակցի, որը դեռ մնացել է ինձ, վրա»,- հայտարարել է Վենսը։
Նա նաև հիշեցրել է ամերիկյան սպառազինությունից Իսրայելի կախվածության մասին և որոշ իսրայելցի քաղաքական գործիչների կոչ է արել «գիտակցել այն իրականությունը, որում գտնվում է իրենց երկիրը»։