ԱՄՆ Գերագույն դատարանը երեքշաբթի կանգնել է երկրի նախագահ Դոնալդ Թրամփի վարչակազմի կողմը ներգաղթի վերաբերյալ մի գործով, որն առնչվում է գրին քարտ ունեցողների նկատմամբ պետության լիազորություններին, հաղորդում է Associated Press-ը։
Որոշումը վերաբերում է 2012 թվականին ներգաղթի հարցերով պաշտոնյայի ընդունած որոշմանը, որով գրին քարտի սեփականատեր Մուկ Չհոյ Լաուն արտերկրից կարճատև ուղևորությունից վերադառնալուց հետո վերցվել էր ներգաղթային հսկողության տակ։ Հիմք էին ծառայել ապրանքների կեղծման գործով մեղադրանքները։
Լաուն պնդում էր, որ պաշտոնյան գերազանցել է իր լիազորությունները, իսկ այդ որոշումն ապօրինաբար ԱՄՆ Ներքին անվտանգության նախարարությանը թույլ է տվել արտաքսման արագացված ընթացակարգ սկսել այն բանից հետո, երբ ինքը ճանաչել էր մեղքը ապրանքանիշի իրավունքների խախտման մեջ։
Գործը քննվում է Գերագույն դատարանում ներգաղթի շուրջ ընթացող մի շարք վեճերի ֆոնին, որոնք կապված են Թրամփի վարչակազմի ծավալուն ներգաղթային քաղաքականության հետ, թեև բուն միջադեպը տեղի է ունեցել նախքան նրա իշխանության գալը։
Վարչակազմը հայտարարել է, որ հանցագործություն կատարելու կասկածը բավարար է օրինական մշտական բնակչին (գրին քարտ ունեցողին) ներգաղթային հսկողության տակ դնելու համար՝ կոչ անելով դատարանին լայնորեն մեկնաբանել գործադիր իշխանության լիազորությունները ներգաղթի ոլորտում։
Ներկայում Գերագույն դատարանը քննում է նաև այլ գործեր, դրանց թվում՝ ըստ ծննդյան իրավունքի քաղաքացիություն ստանալու իրավունքը չեղարկելու Թրամփի փորձը, ապաստանի տրամադրման սահմանափակող քաղաքականության հնարավոր վերականգնումը և պատերազմներից ու տարերային աղետներից տուժած երկրներից եկած ներգաղթյալների համար ժամանակավոր պաշտպանության դադարեցումը։