Իսրայելի անվտանգության ծառայության՝ «ՇԱԲԱԿ»-ի նախկին ղեկավար Ռոնեն Բարը Իսրայելի վարչապետ Բենիամին Նեթանյահուին՝ գերմանական Bild պարբերականին հետախուզական տվյալների ենթադրյալ արտահոսքի գործով իր նախկին մամուլի քարտուղար Էլի Ֆելդշտեյնին ձերբակալելու որոշման մասին հայտնել է, երբ կալանավորումն արդեն իսկ իրականացված է եղել։ Դրա մասին հաղորդում է 12-րդ ալիքը՝ հղում անելով հետաքննության նոր տվյալներին։
Հեռուստաալիքի տեղեկություններով՝ գործը գտնվել է հրապարակման խիստ դատական արգելքի տակ, իսկ ձերբակալության մասին իրազեկվածների շրջանակը խիստ սահմանափակ է եղել։ Նույնիսկ բազմաթիվ բարձրաստիճան պաշտոնյաներ, որոնք սովորաբար ստանում են նմանատիպ տեղեկություն, նախնական փուլում չեն ծանուցվել. քննիչները ձգտում էին պահպանել հետաքննության գաղտնիությունը։
Ինչպես հայտարարել է Բարը գործով դատական լսումների ժամանակ, իր զեկույցի պահին Իսրայելի վարչապետն արձագանքել է զարմանքով։ Միաժամանակ, «ՇԱԲԱԿ»-ի ղեկավարը հայտնել է, որ չի կարող բացահայտել կալանավորման հիմքերի մանրամասները։
Հեռուստաալիքը հաղորդում է նաև, որ հետաքննության շրջանակում դիտարկվում են կասկածներ Նեթանյահուի մերձավոր օգնական Յոնաթան Ուրիխի նկատմամբ։ Քննության տվյալներով՝ նա ենթադրաբար ջնջել է իր հեռախոսի պարունակությունը Ֆելդշտեյնի ձերբակալությունից կարճ ժամանակ անց։ Ինքը՝ Ուրիխը, պնդում է, որ պարբերաբար մաքրում է սարքը և տվյալները ջնջելու պահին չի իմացել ձերբակալության մասին։
Քննությունը ստուգում է Ֆելդշտեյնի և Ուրիխի հնարավոր դերը Իսրայելի ռազմական հետախուզության գաղտնի փաստաթղթի արտահոսքի մեջ, որը գերմանական Bild պարբերականին էր փոխանցվել 2024 թվականի սեպտեմբերին։
Քննության վարկածով՝ հրապարակումը կարող էր լինել Գազայում պատանդների ազատ արձակման շուրջ բանակցությունների շուրջ քաղաքական վեճերում Նեթանյահուի դիրքերն ամրապնդելու փորձի մի մաս, ընդ որում՝ փաստաթուղթը օտարերկրյա լրատվամիջոցին է փոխանցվել Իսրայելի ռազմական գրաքննության շրջանցմամբ։