Երևան քաղաքի առաջին ատյանի քաղաքացիական դատարանը բավարարել է Կարեն Ջալավյանի (Քյոխ) հայցն ընդդեմ Ռոման Բաղդասարյանի՝ պարտավորեցնելով վերջինիս սոցցանցի իր էջերով հրապարակել հերքում․ հայտնում է Facebook-ի «Միջնաբերդ» էջը։
Ըստ հրապարակման՝ հերքումը պետք է լինի հետևյալ բովանդակությամբ․
«Ես՝ Ռոման Բաղդասարյանս, հրապարակային հայտարարում եմ, որ 2026 թվականի փետրվարի 5-ին «Facebook.com» սոցիալական կայքի էջերումս հրապարակած այն արտահայտությունները, թե «Կարեն Ջալավյանը (Քյոխը) գողացել է զինվորներից սնունդը և նրանց առանց ջրի պահել, Եղնիկներում ծաղրել և նվաստացրել է մեր զինվորներին, սովի է մատնել, ինչպես նաև Քյոխը մարդ է, որը միշտ ատել է Հայաստանից եկած զինվորներին», չեն համապատասխանում իրականությանը»:
Դատարանը որպես բարոյական վնասի փոխհատուցում` Ռոման Բաղդասարյանին նաև պարտավորեցրել է Կարեն Ջալավյանին վճարել 100.000 դրամ»։
Նշենք, որ բլոգեր Բաղդասարյանի դեմ հերքման և զրպարտության պահանջով առանձին 3 հայց է ներկայացրել նաև «Ուժեղ Հայաստան» կուսակցության առաջնորդ Սամվել Կարապետյանը։
Ռոման Բաղդասարյանին դատի են տվել նաև ատելություն ու թշնամանք հրահրելու համար․ Facebook-ի մի գրառմամբ էլ, ըստ հայցի, վիրավորել և զրպարտել է արցախցիներին։