Ռուսաստանի ԱԳՆ պաշտոնական ներկայացուցիչ Մարիա Զախարովան հայտարարել է, որ Նովոռոսիյսկի շրջանում Կասպյան խողովակաշարային կոնսորցիումի (ԿՏԿ) օբյեկտների վրա հարձակումը սպառնալիք է ստեղծել միջազգային էներգետիկ ենթակառուցվածքի համար և առնչվել է օտարերկրյա ընկերությունների շահերին, դրանց թվում՝ ղազախական նավթի մատակարարման մասնակիցներին։
Զախարովայի տվյալներով՝ հուլիսի 30-ի գիշերը հարվածներ են հասցվել նավթային լցանավերին, որոնք գտնվել են Կասպյան խողովակաշարային կոնսորցիումի ծովային տերմինալի շրջանում։
Նա ընդգծել է, որ խոսքն օտար դրոշների ներքո ընթացող, միջազգային անձնակազմերով նավերի մասին է, իսկ բեռնառաքիչների թվում եղել է «Թենգիզշևրոյլ» ընկերությունը, որի բաժնետերերից է ամերիկյան Chevron կորպորացիան։
«Նպատակային հարվածներ են հասցվել օտար դրոշների ներքո ընթացող, նավի վրա միջազգային անձնակազմերով և արտասահմանյան մատակարարների կողմից վարձված նավերին»,- հայտարարել է Ռուսաստանի արտաքին քաղաքական գերատեսչության ներկայացուցիչը։
Նրա տվյալներով՝ միջադեպի հետևանքով հրդեհներ են առաջացել, որոնք օպերատիվ կերպով մարվել են, նավթի արտահոսք չի արձանագրվել, անձնակազմերի անդամների շրջանում տուժածներ չկան։ Միաժամանակ Կասպյան խողովակաշարային կոնսորցիումի տերմինալի աշխատանքը ժամանակավորապես դադարեցվել է։
Զախարովան հայտարարել է, որ Կասպյան խողովակաշարային կոնսորցիումի ենթակառուցվածքի վրա հարձակումներն առնչվում են ոչ միայն Ռուսաստանին, այլև էներգետիկ մատակարարումներին մասնակցող արտասահմանյան գործընկերներին։
«Առանձնակի մտահոգություն է առաջացնում այն փաստը, որ սպառնալիքի տակ են հայտնվում այն երկրների տնտեսական շահերը, որոնց Կիևը կոչում է իր գործընկերներ», – ասել է նա՝ առանձին հիշատակելով Ղազախստանն ու ԱՄՆ-ը։
ՌԴ ԱԳՆ ներկայացուցիչն ընդգծել է, որ Կասպյան խողովակաշարային կոնսորցիումը Ղազախստանից համաշխարհային շուկաներ նավթի արտահանման հիմնական ուղիներից մեկն է, իսկ նախագծում ամերիկյան Chevron-ի մասնակցությունը իրավիճակը զգայուն է դարձնում նաև ամերիկյան բիզնեսի համար։
Զախարովան հայտարարել է նաև, որ Մոսկվան բազմիցս նախազգուշացրել է միջազգային էներգետիկ ենթակառուցվածքի օբյեկտների վրա հարձակումների ռիսկերի մասին։
«Խոսքը միջազգային վառելիքաէներգետիկ շղթաների կայունությանը սպառնացող վտանգների մասին է»,- նշել է նա։
Ռուսաստանի ԱԳՆ ներկայացուցչի գնահատմամբ՝ Կիևի գործողությունները կարող են հանգեցնել հակամարտության ընդլայնման և դրա մեջ նոր մասնակիցների ներգրավման։
«Միջազգային նշանակություն ունեցող օբյեկտների վրա հարվածներ հասցնելու փորձերը անվերահսկելի լարվածության սրման ռիսկեր են ստեղծում»,- հայտարարել է Զախարովան։
Նա ԱՄՆ-ին, ՄԱԿ-ին և այլ միջազգային կառույցներին կոչ է արել գնահատական տալ տեղի ունեցածին և օգտագործել իրենց ազդեցությունը հետագա հարձակումները կանխելու համար։