ԱՄՆ նախագահ Դոնալդ Թրամփը հայտարարել է, որ Իսրայելը «շատ գոհ է» Խաղաղության խորհրդի (Board of Peace) ձեռք բերած համաձայնագրից, որը նախատեսում է ՀԱՄԱՍ-ի և Գազայի հատվածում գործող այլ զինված պաղեստինյան խմբավորումների լիակատար զինաթափումը, հայտնում է Reuters-ը։
«Մենք փոխըմբռնում ունենք Իսրայելի հետ։ Իսրայելը շատ գոհ է դրանից։ Իսրայելը մեզ օգնել է, և նրանք իրենց շատ լավ են դրսևորել»,- ասել է Թրամփը՝ հավելելով, որ իրավիճակը շարունակում է մնալ չափազանց բարդ։ «Կլինե՞ն վերելքներ ու վայրէջքներ։ Սա շատ բարդ իրավիճակ է»։
Ամերիկացի առաջնորդի խոսքով՝ համաձայնագիրը դարձել է խոշոր առաջընթաց, քանի որ նախկինում քչերն էին հավատում, որ ՀԱՄԱՍ-ի զինաթափումն առհասարակ հնարավոր է։
«Սա մեծ քայլ է Մերձավոր Արևելքի համար։ Մարդիկ իսկապես տպավորված են դրանով և զարմացած են դրանից»,- ընդգծել է Թրամփը։
Նախօրեին ԱՄՆ նախագահը համաձայնագիրն անվանել էր «կարևորագույն հանգրվան» Գազայի հատվածում Իսրայելի պատերազմի դադարեցման վերաբերյալ իր 20 կետից բաղկացած Թրամփի ծրագրի իրականացման գործում։
Ըստ ծրագրի՝ համաձայնագրի իրականացումը տեղի է ունենալու փուլ առ փուլ։ Պաղեստինյան խմբավորումների զինաթափմանը զուգընթաց իսրայելական զորքերը աստիճանաբար դուրս կբերվեն Գազայի հատվածից, իսկ անկլավում անվտանգությունը կապահովեն միջազգային կայունացման ուժերը՝ նոր պաղեստինյան ոստիկանության հետ համատեղ։