Oragir.News-ը օրերս հայտնել էր, որ Գյումրիի ավագանու ՔՊ խմբակցությունը 2 նոր անդամ ունի. մեկը ղեկավարում է Շիրակի շտապօգնությունը, մյուսը՝ դպրոցի տնօրենի պաշտոնակատար է։
ՔՊ-ի ավագանու անդամ Նարինե Մկրտչյանը զբաղեցնում է հանրային պաշտոն․ նա Գյումրիի Վահան Թեքեյանի անվան թիվ 2 հիմնական դպրոցի տնօրենի ժամանակավոր պաշտոնակատարն է։
Այս դեպքում ողջամիտ կասկած կարող է առաջանալ, որ ՔՊ-ն կամ խախտում է օրենքը, կամ չի տիրապետում հենց իր կողմից ընդունված օրենքին։
Հիշեցնենք, որ «Հանրային ծառայության մասին» ՀՀ օրենքում կատարված փոփոխությունների համաձայն՝ ՀՀ-ում ավագանու անդամը չի կարող զբաղեցնել հանրային պաշտոն։
Նարինե Մկրտչյանը պետք է ընտրեր կա՛մ մեկ, կա՛մ մյուս տարբերակը, սակայն շարունակում է զբաղեցնել դպրոցի տնօրենի ժամանակավոր պաշտոնակատարի պաշտոնը։
Նշենք նաև, որ ավագանու այս նոր անդամները փոխարինել են Սարիկ Մինասյանին և Քնարիկ Հարությունյանին, որոնք ստացել են Ազգային ժողովի պատգամավորի մանդատները։