Ավելի քան 150 ներգաղթյալներ են փրկվել երեքշաբթի այն բանից հետո, երբ նավակը, որով նրանք փորձում էին Ֆրանսիայից Մեծ Բրիտանիա հատել Լա Մանշը, հրդեհվել է, հայտնում է BBC News-ը։
Լա Մանշի և Հյուսիսային ծովի ծովային պրեֆեկտուրայի տվյալներով՝ նավը դուրս էր եկել Ֆրանսիայի ափերից երկուշաբթի երեկոյան։ Շարժիչի հրդեհվելուց հետո նավակի վիճակն արագորեն վատթարացել է։
Փրկարար ծառայությունները տարհանել են 157 մարդու։ Նրանց տեղափոխում են ֆրանսիական Բուլոն-սյուր-Մեր քաղաքի նավահանգիստ։ Զոհերի կամ տուժածների մասին տեղեկություններ չկան։
Ֆրանսիական իշխանությունները հայտնել են, որ գիշերը նավակում գտնվող հինգ մարդ համաձայնել է ընդունել փրկարարների օգնությունը, սակայն մյուսները հրաժարվել են տարհանումից, քանի որ ցանկացել են շարունակել ճանապարհը դեպի Մեծ Բրիտանիա։
«Լա Մանշը հատելու համար օգտագործվող նավակների կառուցվածքային խոցելիության պատճառով որոշվել է այդ փուլում այլևս չմիջամտել»,- հայտարարել են ծովային պրեֆեկտուրայում։
Շարժիչի հրդեհվելուց հետո օգնության են մեկնել ֆրանսիական և բրիտանական փրկարար նավերը։ Ֆրանսիական երկու նավ փրկել է 103 մարդու, բրիտանական նավերը՝ ևս 54-ի։
Բրիտանական կառավարությունում հայտարարել են, որ միջադեպը կրկին ցույց է տալիս «նման անցումների ծայրահեղ վտանգավորությունը», և ընդգծել են, որ Լոնդոնը կշարունակի համագործակցել Ֆրանսիայի հետ՝ անօրինական միգրացիայի դեմ պայքարելու համար։
Դեպքը տեղի է ունեցել մեկ օր անց այն բանից հետո, երբ Մեծ Բրիտանիայի վարչապետ Էնդի Բերնհեմը հայտարարել էր, որ իր կառավարությունը «մշտապես» աշխատելու է փոքր նավակներով երկիր ժամանող մարդկանց թվի կրճատման ուղղությամբ։
Բրիտանական իշխանությունների տվյալներով՝ տարեսկզբից փոքր նավերով Լա Մանշով ժամանածների թիվը մոտ 43%-ով պակաս է, քան անցյալ տարվա նույն ժամանակահատվածում։ Միևնույն ժամանակ, անցյալ տարի նման անցումների թիվը հասել էր ռեկորդային մակարդակների, իսկ այս տարվա ամենածանրաբեռնված օրը եղել է անցած չորեքշաբթին, երբ Մեծ Բրիտանիա է ժամանել 752 մարդ։
Ապրիլին Մեծ Բրիտանիան և Ֆրանսիան կնքել են Լա Մանշով անօրինական անցումների դեմ պայքարին ուղղված 662 միլիոն ֆունտ ստերլինգ արժողությամբ եռամյա համաձայնագիր։ Այն նախատեսում է ֆրանսիական լողափերի պարեկության ուժեղացում, մարդկանց տեղափոխողներին դիմակայելու համար անօդաչու թռչող սարքերի և ուղղաթիռների օգտագործում։