ՄԱԿ-ի Պարենի համաշխարհային ծրագիրը (WFP) նախազգուշացրել է, որ մոտ 50 միլիոն մարդ մինչև հաջորդ տարվա վերջ կարող է բախվել սննդի սուր պակասի՝ կլիմայական Էլ Նինյո երևույթի ուժգնացման պատճառով։
Նոր ճգնաժամը կսրի աշխարհում սովի իրավիճակը․ այժմ շուրջ 225 միլիոն մարդ 45 երկրում արդեն սուր պարենային անապահովության վիճակում է՝ Աֆրիկայում երկարամյա երաշտների և սննդամթերքի գների աճի պատճառով։
WFP-ի գնահատմամբ՝ նույնիսկ սպասվածից ավելի թույլ Էլ Նինյոն կարող է ավելի քան 20%-ով ավելացնել սուր քաղց զգացող մարդկանց թիվը։ Ամենալուրջ հետևանքները կանխատեսվում են Կենտրոնական և Հարավային Ամերիկայի երկրներում, Կարիբյան տարածաշրջանում և Աֆրիկայի հարավում։ Հարավային և Հարավարևելյան Ասիայում տեղումների նվազումը կարող է լուրջ վնաս հասցնել գյուղատնտեսությանը։
Ներկայիս Էլ Նինյոն, որը ձևավորվում է Խաղաղ օվկիանոսում և ամեն մի քանի տարին մեկ ազդում է ամբողջ աշխարհի եղանակային պայմանների վրա, կարող է դառնալ առնվազն վերջին 70 տարվա ամենաուժեղը։ Որոշ մասնագետներ այն անվանում են «սուպեր-Էլ Նինյո», թեև այս տերմինը պաշտոնապես չի օգտագործվում։
Փորձագետները նշում են, որ կլիմայական երևույթի հետևանքները սրվում են գլոբալ տաքացման պատճառով։ WFP-ն արդեն պատրաստում է վաղ արձագանքման և կանխարգելիչ օգնության միջոցառումներ, որոնց համար հատկացվել է առնվազն 80 մլն դոլար, գրում է The Guardian-ը։
Սակայն նույնիսկ ժամանակին տրամադրված օգնության դեպքում հետևանքները կարող են երկար պահպանվել։ Օրինակ՝ Աֆրիկայի հարավում ամենածանր շրջանը սպասվում է ոչ թե հնարավոր անբերրիությունից անմիջապես հետո, այլ այսպես կոչված «սովի սեզոնին»՝ 2027–2028 թվականներին, երբ բերքահավաքից հետո պարենային պաշարները կսպառվեն։
Նախորդ ուժեղ Էլ Նինյոյի ժամանակ՝ 2015–2016 թվականներին, 60 միլիոնից մինչև 100 միլիոն մարդ բախվել է սննդի սուր պակասի։
Բացի երաշտների նկատմամբ առավել խոցելի տարածաշրջաններից, հետևանքները կարող են անդրադառնալ նաև սննդամթերքի համաշխարհային գների վրա։ WFP-ն նախազգուշացրել է, որ շատ բան կախված կլինի արտահանող երկրների որոշումներից, և կոչ է արել խուսափել պարենի արտահանման սահմանափակումներից։