Իսպանիայի իշխանությունները որոշել են ժամանակավորապես վերականգնել սահմանային հսկողությունը նավահանգիստներում և օդանավակայաններում՝ Իտալիայից ժամանող ճանապարհորդների համար։ Ինչպես հաղորդում է Europa Press-ը՝ հղում անելով երկրի կառավարության աղբյուրներին, սահմանափակումները կգործեն օգոստոսի 8-ի կեսգիշերից մինչև սեպտեմբերի 7-ի կեսգիշերը։
Այս ժամանակահատվածում սահմանապահ ծառայության աշխատակիցները ընտրողաբար կստուգեն ուղևորների փաստաթղթերը։ ԵՄ երկրների քաղաքացիներից կպահանջվի ներկայացնել անձնագիր կամ անձը հաստատող այլ փաստաթուղթ, իսկ երրորդ երկրների քաղաքացիներից՝ անձնագիր՝ վիզայի կամ կացության թույլտվության հետ միասին։
Գործակալության տվյալներով՝ հսկողության գործողության ժամկետը կարող է ճշգրտվել, եթե փոխվեն այն հանգամանքները, որոնք պատճառ են դարձել դրա սահմանման համար։
Ավելի վաղ պաշտոնական Մադրիդը նախազգուշացրել էր, որ պատասխան միջոցներ կձեռնարկի, եթե Իտալիան չչեղարկի իր սահմանային հսկողությունը, որը մտցվել էր այն բանից հետո, երբ իսպանական Սեուտա անկլավ ներգաղթյալների զանգվածային հոսք էր գրանցվել։
Հուլիսի վերջին Սեուտան, որը գտնվում է Հյուսիսային Աֆրիկայում՝ Մարոկկոյի հետ սահմանին, բախվել էր անօրինական ներգաղթյալների թվի կտրուկ աճին։ Իսպանիայի ՆԳՆ-ի տվյալներով՝ հուլիսի վերջից ի վեր քաղաք է ներթափանցել մոտ 72 հազար մարդ։ Նրանց մեծ մասը վերադարձվել է։ Սեուտայի բնակչությունը կազմում է մոտ 85 հազար մարդ։