ԱՄՆ նախկին նախագահ Ջո Բայդենը առաջին անգամ հայտնվել է հանրության առջև այն բանից հետո, երբ նրա որդի Հանթերը պատմել էր հոր առողջական վիճակի վատթարացման մասին՝ շագանակագեղձի քաղցկեղի տարածման ֆոնին, հայտնում է Daily Mail-ը։
83-ամյա Բայդենը շաբաթ օրը մասնակցել է Դելավեր նահանգի Ուիլմինգթոն քաղաքում գտնվող Սուրբ Հովսեփ եկեղեցու պատարագին։ Ծառայությունից հետո նա Գաղտնի ծառայության աշխատակիցների ուղեկցությամբ անցել է դեպի ավտոմեքենան։ Բայդենը շփվել է ծխականների հետ և մեքենա նստելիս ժպտացել է։
Ավելի վաղ այս շաբաթ Հանթեր Բայդենը BBC-ին տված հարցազրույցում հայտարարել էր, որ հոր հիվանդությունը տարածվել է ոսկորներին և ուժեղ ցավեր է պատճառում։ Ըստ նրա, հոր վիճակին հետևելը «շատ ծանր է»։
«Քաղցկեղի մետաստազները տարածվել են ոսկորներում և ավելի հեռու։ Դա շատ ցավոտ է և բազմաթիվ առումներով խիստ հյուծող», — ասել է Հանթերը։
Բայդենի ախտորոշման մասին հայտնի դարձավ 2025 թվականի մայիսին՝ Սպիտակ տնից նրա հեռանալուց մի քանի ամիս անց։ Նախկին նախագահն անցել էր ճառագայթային և հորմոնային թերապիա։
ԱՄՆ նախկին առաջին տիկին Ջիլ Բայդենը ավելի վաղ հայտարարել էր, որ իր ամուսինը, հավանաբար, ստիպված կլինի ապրել քաղցկեղով մինչև կյանքի վերջ, քանի որ հիվանդությունը տարածվել է ոսկորներում։
Չնայած առողջական վիճակին՝ Բայդենը շարունակում է հայտնվել հանրության առջև։ Հանթերը հայտնել է, որ հայրը մինչև օրս ակտիվորեն հետաքրքրվում է երկրում տեղի ունեցող իրադարձություններով։