ԱՄՆ-ի հետ հակամարտության կարգավորման հարցով բանակցությունների
երկրորդ փուլի անցկացման վերաբերյալ որոշում դեռևս չի կայացվել։ Այս մասին ասվում է
Իրանի ԱԳՆ հայտարարության մեջ:
Գերատեսչությունը շեշտել է, որ Իրանը չի ճանաչում
Միացյալ Նահանգների ոչ մի վերջնագիր և վճռականորեն կպատասխանի նոր ագրեսիայի դեպքում։
«ԱՄՆ-ը, գրավելով Իրանի դրոշի ներքո նավարկող նավը,
խախտել է հրադադարի ռեժիմը։ Թեհրանը դա համարում է հարձակում»,- նշվում է հայտարարության
մեջ։
Այս ֆոնին Իրանի նախագահ Մասուդ Փեզեշքիանը հայտարարել
է, որ ռազմական դիմակայության շարունակությունը օգուտ չի բերի ո՛չ Թեհրանին, ո՛չ էլ
Վաշինգտոնին։ Նրա խոսքով՝ ճնշումներին ու սպառնալիքներին դիմակայելիս կարևոր է միաժամանակ
փնտրել լարվածությունը նվազեցնելու դիվանագիտական ուղիներ։
«Պատերազմը ոչ մեկի համար շահավետ չէ, և սպառնալիքներին
դիմակայելիս անհրաժեշտ է օգտագործել բոլոր ողջամիտ և դիվանագիտական միջոցները՝ լարվածությունը
նվազեցնելու համար։ Միևնույն ժամանակ, հակառակորդի նկատմամբ անվստահությունը և փոխգործողություններում
զգոնությունը անհրաժեշտ են մնում»,- ընդգծել է Փեզեշքիանը, որի խոսքերը մեջբերել է
նրա մամուլի ծառայությունը։
Ավելի վաղ Իրանի պետական լրատվական գործակալությունը՝
IRNA-ն, հայտնել էր, որ Թեհրանը հրաժարվել է Միացյալ Նահանգների հետ բանակցությունների
երկրորդ փուլին մասնակցությունից։