Այսօր՝ 2026 թվականի օգոստոսի 12-ին, տեղի է ունենում հերթական խոշոր արեգակնային խավարումը, որի մասնակի փուլերը տեսանելի են եղել նաև Հայաստանում։
Սա այս տարվա երկրորդ արեգակնային խավարումն է։ Նշվում է, որ սա լրիվ արեգակնային խավարում է, ինչպես 2008 թվականի օգոստոսի 1-ին տեղի ունեցածը։ Հաջորդ նմանատիպ աստղագիտական իրադարձությունը տեղի կունենա 2044 թվականի օգոստոսի 23-ին։
Մասնակի խավարումն սկսվել է ժամը 19:34-ին և կավարտվի ժամը 23:57-ին։ Կենտրոնական խավարումը կսկսվի ժամը 20:57-ին և կավարտվի ժամը 22:30-ին։ Լրիվ խավարման ժամանակ Լուսնի ստվերային կոնը հատում է Երկրի մակերևույթը, քանի որ այն բավականաչափ մոտ է Երկրին՝ Արեգակն ամբողջությամբ փակելու համար։ Լուսնի ստվերի միջին երկարությունը 373,320 կմ է։ Այսօր Երկրի և Լուսնի միջև հեռավորությունը 359,445 կմ է։
Այս դեպքում Լուսնի տեսանելի տրամագիծը 1.0386 անգամ մեծ է Արեգակի սկավառակի տեսանելի տրամագծից։
Խավարումը տեսանելի կլինի Հյուսիսային Ամերիկայի հյուսիսում, Հյուսիսարևմտյան Աֆրիկայում և Եվրոպայում։ Լրիվ խավարումը տեսանելի կլինի միայն Գրենլանդիայում, Իսլանդիայում, Պորտուգալիայում, Իսպանիայում և Ռուսաստանի Կրասնոյարսկի մարզում։ Այն կտևի առավելագույնը 2 րոպե 18 վայրկյան։
Երևանում արևի մասնակի խավարումն սկսվել է ժամը 13:52-ին և իր առավելագույնին է հասել 15:11-ին: