Ռուսաստանի նախագահ Վլադիմիր Պուտինը Սախալինի մարզ աշխատանքային ուղևորության ընթացքում առաջին անգամ այցելել է Կուրիլյան Իտուրուպ կղզի, հաղորդում է Կրեմլի մամուլի ծառայությունը։
Պուտինին դիմավորել է մարզի նահանգապետ Վալերի Լիմարենկոն։ Այցի առաջին կանգառը Յասնիի ձկնամշակման գործարանն էր։
Լիմարենկոյի հետ հանդիպման ժամանակ Պուտինը հայտարարել է, որ ռուսները տիրապետում են «հաղթողների գենետիկ կոդին»։
Նահանգապետը Ռուսաստանի ղեկավարին ներկայացրել է Ուկրաինայի պատերազմում կռվածներին և նրանց ընտանիքներին աջակցելու միջոցառումների մասին։ Նա հավելել է, որ 2000 ռուս զինծառայողներ անցել են վերականգնողական բուժում, և շատերը վերադարձել են ռազմաճակատ։
«Ահա թե ինչպիսին է մեր ժողովուրդը։ Հաղթողների գենետիկ կոդը», – մեկնաբանել է Ռուսաստանի նախագահը։
Ի դեպ, Տոկիոն խիստ բողոք է հայտնել Մոսկվային Ռուսաստանի նախագահ Վլադիմիր Պուտինի՝ Իտուրուպ կղզի կատարած այցի կապակցությամբ։ Այս մասին ասվում է Ճապոնիայի արտաքին գործերի նախարարության հայտարարության մեջ։
«Այսօր մենք ստացանք Ռուսաստանի նախագահ Պուտինի՝ Իտուրուպ կղզի կատարած այցի մասին լուրը։ (…) Ճապոնիան իր խիստ բողոքն է հայտնում այս այցի կապակցությամբ», – ասվում է նախարարության կայքում հրապարակված հայտարարության մեջ։