Author: Julbaz

ԱՄՆ նախագահ Դոնալդ Թրամփը հայտարարել է, որ Իրանում գտնվող հարստացված ուրանն արդեն կարող է օգտագործման համար ոչ պիտանի լինել, սակայն, միևնույն է, պահանջում է այն փոխանցել Միացյալ Նահանգներին:

«Արժեքի տեսանկյունից այն (Իրանում գտնվող հարստացված ուրանը-խմբ.) մեծ նշանակություն չի ներկայացնում։ Հավանաբար այն չի կարելի օգտագործել։ Հնարավոր է, որ նրանք նույնիսկ չկարողանան այն դուրս բերել… Նրանք պետք է այն վերադարձնեն»,- հայտարարել է Թրամփը՝ Salem News-ին տված հարցազրույցում։

Ավելի վաղ Al Jazeera-ն՝ աղբյուրներին հղում կատարելով, հաղորդել էր, որ Իրանը ԱՄՆ-ին առաջարկել է երկարաժամկետ խաղաղության ծրագիր, որը, ի թիվս այլ կետերի, նախատեսում է ուրանի հարստացման սառեցում մինչև 15 տարի, որին կհաջորդի 3.6% սահմանաչափ՝ համաձայն «զրոյական պահեստավորման սկզբունքի»։

«Հրապարակ»-ը գրում է. «Պետական այցով նախօրեին Հայաստան ժամանած Ֆրանսիայի նախագահ Էմանուել Մակրոնի առաջարկով երեկ Հայաստան են ժամանել նաև Ֆրանսիայի հայ համայնքի մի խումբ ներկայացուցիչներ, որոնք ՀՀ իշխանությունների կողմից «պերսոնա նոն գրատա» են ճանաչվել, նրանց «սև ցուցակում» են։

Մեկը ՀՅԴ Բյուրոյի անդամ, Ֆրանսիայի հայկական կազմակերպությունների համակարգող խորհրդի համանախագահ Մուրադ Փափազյանն է, որի մուտքը տարիներ առաջ Փաշինյանի իշխանությունն արգելել էր, և նա դատական կարգով հասավ իր իրավունքների վերականգնմանը` Մակրոնի միջամտության շնորհիվ:

Պատվիրակության մեջ են նաև Ֆրանսիայի հայկական կազմակերպությունների խորհրդի համանախագահ Արա Թորանյանը, Հայկական բարեգործական ընդհանուր միության (ՀԲԸՄ) նախագահ Նադյա Գործունյանը, ֆուտբոլիստ Յուրի Ջորկաեֆը, Ստեփան Հացպանյանը, ֆրանսահայ հայտնի բժիշկ և քաղաքական գործիչ Գեւորգ Քեփենեկյանը, հայտնի պրոդյուսեր Ալեն Թերզյանը և այլք։

Ուշագրավ է, որ նրանց մի մասին ՀՀ իշխանությունները ոչ միայն այս համաժողովի ընթացքում չեն ցանկացել տեսնել Երևանում, այլև անցած շաբաթ Փարիզում հայկական դեսպանության բացման արարողությանը չէին հրավիրել, ինչից նրանք խիստ վիրավորվել էին։ Ֆրանսիայի նախագահ Մակրոնը թերևս սրանով ցույց է տալիս Փաշինյանի եւ նրա որոշումների նկատմամբ իր վերաբերմունքը և այն, որ ինքը, ի տարբերություն Փաշինյանի, գնահատում է ֆրանսահայ համայնքի ազդեցիկ ներկայացուցիչներին եւ ամեն ինչ անում է նրանց հետ ջերմ հարաբերություններ պահպանելու համար։

Ի դեպ, Հայաստանի հանդեպ Ֆրանսիայի և նրա իշխանությունների բարյացակամ վերաբերմունքը նաև ֆրանսահայ համայնքի տասնամյակների աշխատանքով է պայմանավորված»: