Author: Julbaz

Իրանի հակամարտությունն ԱՄՆ-ի և Իսրայելի հետ ավարտված չէ, Իսլամական Հանրապետությունը շարունակում է պաշտպանական դիրք զբաղեցնել բոլոր ուղղություններով: Այս մասին հայտարարել է Իրանի ԱԳ փոխնախարար Սաիդ Խաթիբզադեն։

«Կարծում եմ՝ դժվար է ասել, որ պատերազմն ավարտված է։ Քանի դեռ պատերազմը չի ավարտվել բոլոր ճակատներում, խաղաղությունը չի կարող երաշխավորված լինել։ Եվ հետևաբար, կարծում եմ, Իրանը չի կարող վտանգել իր ազգային անվտանգությունը։ Իրանը կշարունակի մնալ բարձր պատրաստվածության վիճակում և տարբեր ճակատներում զբաղեցնել պաշտպանական դիրք»,- ասել է դիվանագետը։ Նա նշել է, որ Իսլամական հանրապետության նպատակն է «պարտության մատնել ագրեսորին»՝ թույլ չտալով ԱՄՆ-ին «Իրանի ներսում հասնել իր նպատակներից որևէ մեկին»։

ՀԱԿ փոխնախագահ Լևոն Զուրաբյանը ֆեյսբուքյան իր էջում տեսանյութ է հրապարակել՝ գրելով․ «Արդյո՞ք լուրջ են Հայաստանի քաղաքական ուժերը»։ «Այս նախընտրական բովի մեջ քաղաքական ուժերն առաջարկում են խոստումներ, հիանալի հեռանկարներ, հեքիաթային ապագա, բայց ոչ ոք չի խոսում ռազմավարական խնդիրների և լուծումների մասին։ Մինչդեռ խնդիրները բարդ են և դրանց լուծման համար անհրաժեշտ է լուրջ ռազմավարություն»,- տեսանյությում ասում է Զուրաբյանը՝ թվարկելով խնդիրներն ու առաջարկելով լուծման տարբերակներ. «Հետևապես․ այս ընտրություններում հետևեք այն կուսակցությանը և այն ծրագրերին, որոնք իրենց մեջ պարունակում են ռազմավարություն, թե ինչպես է պետք լուծել Հայաստանի առջև կանգնած խնդիրները, քանի դեռ դրանք աղետալի հետևանքներ չեն ունեցել»:

Ֆինանսիստ, տվյալների վերլուծաբան Ներսես Հոխիկյանի ֆեյսբուքյան գրառումը․ «Սննդամթերքից մինչև սմարթֆոններ և դեղորայք․
     Ինչ ապրանքատեսակներ կարող են թանկանալ Իրանի դեմ ԱՄՆ-ի և Իսրայելի պատերազմի և Հորմուզի նեղուցի շրջափակման հետևանքով․ Մաս 1
     Իրանի դեմ ԱՄՆ-ի և Իսրայելի սանձազերծած պատերազմը իր ազդեցությունն է թողնում ոչ միայն էներգակիրների շուկայի, այլ համաշխարհային տնտեսության գրեթե բոլոր ճյուղերի վրա՝ գյուղատնտեսությունից և առողջապահությունից մինչև բարձր տեխնոլոգիական արդյունաբերություն:
     Գյուղատնտեսություն
     Պարսից ծոցի երկրներն արտահանում են կարբամիդ, կալիում, ամոնիակ և ֆոսֆատ պարունակող պարարտանյութեր։ Ըստ ՄԱԿ-ի տվյալների՝ նշված պարարտանյութերի համաշխարհային պահանջարկի շուրջ 30%-ը հիմնականում անցնում է Հորմուզի նեղուցով։ Ըստ Առևտրի Համաշխարհային Կազմակերպության (ԱՀԿ) տվյալների՝ հակամարտության սկզբից ի վեր պարարտանյութերի մատակարարումը Պարսից Ծոցի երկրներից գրեթե դադարել է։
     Քիլի ինստիտուտի (Համաշխարհային էկոնոմիկայի Քիլի ինստիտուտ, Գերմանիա) հետազոտողները պնդում են, որ «Պարարտանյութերի մատակարարման համեմատաբար կարճաժամկետ դադարեցումը խաթարելու է բերքի հասունացման ամբողջ պրոցեսը, ինչը երկարաժամկետ ազդեցություն է ունենալու պարենային անվտանգության համար նույնիսկ նեղուցի ապաշրջափակումից հետո»։ Ըստ հետազոտության տվյալների՝ Հորմուզի նեղուցի ամբողջական փակումը կհանգեցնի հացահատիկի, բանջարեղենի և մրգերի համաշխարհային գների շուրջ 5% թանկացման։
     Սակայն ճգնաժամերը նաև կատալիզատորներ են տնտեսությունների զարգացման գործում։ Այս համատեքստում նույնպես, ինչպես և էներգակիրների դեպքում, բարեհաջող իրավիճակ է ստեղծվում ՌԴ-ի շուրջ, որն ապահովում է պարարտանյութերի համաշխարհային պահանջարկի շուրջ 20%-ը։ Ըստ հեղինակավոր վերլուծական կենտրոնների՝ ՌԴ-ն ունի համապատասխան պոտենցիալ արտադրական հզորությունների ընդլայնման և դեֆիցիտի ծածկման համար»։