Author: Julbaz

Իսլամաբադում Իրանի հարցով հնարավոր բանակցություններին ընդառաջ հեռախոսազրույց են ունեցել Իրանի և Ռուսաստանի արտաքին գործերի նախարարները: Աբբաս Արաղչին ներկայացրել է Իրանի դիրքորոշումը ԱՄՆ-ի կողմից հրադադարի խախտումների և Հորմուզի նեղուցի անօրինական շրջափակման վերաբերյալ։

«Ռուսական կողմը վերահաստատել է հրադադարը պահպանելու և դիվանագիտական ջանքերը շարունակելու անհրաժեշտությունը՝ կանխելու հետագա էսկալացիան և զինված բախումների վերսկսումը», – ասված է Ռուսաստանի ԱԳՆ հաղորդագրության մեջ:

Սերգեյ Լավրովը պատրաստակամություն է հայտնել՝ նպաստելու Իրանի և Պարսից ծոցի արաբական պետությունների միջև փոխընդունելի համաձայնությունների ձեռքբերմանը։ Իրանական կողմն էլ հաստատել է պատրաստակամությունը՝ անելու հնարավորը՝ Հորմուզի նեղուցով ռուսական նավերի և բեռների անարգել անցումն ապահովելու համար։ 

Եվրամիության արտաքին քաղաքականության և անվտանգության հարցերով բարձր ներկայացուցիչ Կայա Կալասը հայտարարել է, որ վաղը ԵՄ-ն ակնկալում է դրական որոշում կայացնել Ուկրաինային 90 միլիարդ եվրոյի վարկ տրամադրելու հարցում։

Այս ֆինանսական օգնության գործընթացում շրջադարձային կարող է լինել Հունգարիայում սպասվող քաղաքական փոփոխությունը։ Կալասի փոխանցմամբ՝ մայիսին Հունգարիայում սպասվող իշխանափոխությունից հետո, երբ Վիկտոր Օրբանը կլքի վարչապետի պաշտոնը, Բուդապեշտի հետ բանակցությունները կարող են նոր հուն մտնել։

Հիշեցնենք, որ Օրբանը երկար ժամանակ արգելափակում էր Ուկրաինային ուղղված նախաձեռնությունները՝ վերջին անգամ հայտարարելով, որ չի հաստատի վարկը, քանի դեռ Կիևը չի վերսկսել նավթի մատակարարումը «Դրուժբա» խողովակաշարով։ Ի տարբերություն Օրբանի՝ Հունգարիայի վարչապետի հիմնական թեկնածու Պետեր Մադյարը հայտարարել է, որ չի խոչընդոտի միջոցների տրամադրմանը, քանի որ Հունգարիան այդ գործընթացում ֆինանսական մասնակցություն չի ունենալու։