Author: Julbaz

Վերջին տարիներին Լոռի Բերդ հնավայրում իրականացվող լայնածավալ ծրագրերը միտված են ոչ միայն պատմամշակութային արժեքների պահպանությանը, այլև տարածքի վերափոխմանը ժամանակակից զբոսաշրջային կենտրոնի։ Պետական ֆինանսավորմամբ իրականացվող վերականգնման, պեղման և ենթակառուցվածքների զարգացման աշխատանքների շնորհիվ հնավայրը աստիճանաբար դառնում է ավելի հասանելի, բարեկարգ և գրավիչ այցելուների համար։

ՀՀ կրթության, գիտության, մշակույթի և սպորտի նախարարության Պատմության և մշակույթի հուշարձանների պահպանության վարչության պետ Հարություն Վանյանն ընդգծեց,  որ  2022 թվականից Լոռի Բերդ հնավայրում մեկնարկել են համակարգված և լայնածավալ աշխատանքներ՝ ուղղված հուշարձանի պահպանությանը, ուսումնասիրմանը և զարգացմանը։ Նախնական փուլում իրականացվել են հնագիտական պեղումներ, որոնց արդյունքներով հստակեցվել են հետագա վերականգնման ուղղությունները և մշակվել գիտանախագծային փաստաթղթեր։

Իտալիա կատարած այցի շրջանակում ԿԳՄՍ նախարարի տեղակալ Ալֆրեդ Քոչարյանն այցելել է Վենետիկի Սուրբ Ղազար կղզում գործող Մխիթարյան միաբանություն:

Հայաստանի պատվիրակությունը շրջայց է կատարել միաբանության թանգարանում, դիտել «Ավետիք Իսահակյանը և Վենետիկը» լուսանկարների ցուցահանդեսը, որը կազմակերպվել է Ավետիք Իսահակյանի տուն-թանգարանի և Մխիթարյան միաբանության համագործակցությամբ: Շրջայցի ընթացքում անդրադարձ է կատարվել նաև Մխիթար Սեբաստացու ծննդյան 350-ամյակին և կարևորվել միաբանության դերը՝ որպես Իտալիայում հայագիտության զարգացման առանցքային կենտրոն: Հատկապես ընդգծվել է կառույցի նշանակալի ներդրումը հայկական մշակույթի պահպանման և տարածման գործում։

Տեղում քննարկվել են Հայաստանի հետ համագործակցության ամրապնդմանը միտված հետագա ծրագրերը, մասնավորապես` Մարտիրոս Սարյանի տուն-թանգարան-Մխիթարյան միաբանություն համագործակցությամբ համատեղ ցուցահանդեսի կազմակերպման վերաբերյալ. նախատեսվում է Մարտիրոս Սարյանի գրքարվեստը ներկայացնել միաբանությունում:

Այցի շրջանակում ԿԳՄՍ նախարարի տեղակալը հանդիպել է նաև Կաֆոսկարի համալսարանի ղեկավարության հետ։ Նա ծանոթացել է համալսարանի հայագիտական կենտրոնում իրականացվող ծրագրերին: Ձեռք է բերվել պայմանավորվածություն համագործակցության հետագա զարգացման ու ամրապնդման, մասնավորապես` ուսանողների փոխանակման ծրագրերի ընդլայնման և համալսարանում ցուցադրության կազմակերպման վերաբերյալ։

Հանդիպմանը ներկա են եղել Իտալիայում ՀՀ դեսպան Վլադիմիր Կարապետյանը, Վենետիկում պատվո հյուպատոս Գագիկ Սարուխանյանը և Գրականության և արվեստի թանգարանի տնօրեն Սյուզաննա Խոջամիրյանը:

Նշենք, որ նախընթաց օրը Վենետիկի Դորսոդուրո N2266 հասցեում՝ այն տանը, որտեղ ապրել է Ավետիք Իսահակյանը, տեղի է ունեցել Վարպետի մասին պատմող հուշատախտակի բացման հանդիսավոր արարողությունը։