Category: ABCNews

Հայաստանի զինված ուժերում մահվան դեպքերը շարունակում են աճել։ 2026 թվականի հունվարի 1-ից մինչև օգոստոսի 24-ը ՊՆ-ի պաշտոնական հաղորդագրություններով հաստատվել է զինծառայողների մահվան 13 դեպք։

Հանգամանքները տարբեր են՝ հրազենային վնասվածքներից և սպանություններից մինչև դժբախտ պատահարներ, ինքնասպանության դեպքեր և ծառայությանը չառնչվող պատճառներ։ Որոշ դեպքերով քննությունը դեռ շարունակվում է, իսկ մի շարք դեպքերում ՊՆ-ն զինծառայողների անունները կամ մահվան պատճառները չի հրապարակել։

ABC Media-ն առանձնացրել է պաշտոնապես հաստատված դեպքերը՝

Հունվարի 14 – Վահան Խաչատուրի Պետրոսյան. հրազենային վնասվածք, դեպքով վարույթ է նախաձեռնվել։

Փետրվարի 7 – Դավիթ Արմենի Մանուկյան. պայմանագրային զինծառայող, դին հայտնաբերվել է զորամասում։ Հանգամանքները քննվում են։

Փետրվարի 26 – Նարեկ Համլետի Հակոբյան. 19-ամյա ժամկետային զինծառայող, սպանվել է հրազենային կրակոցից։

Ապրիլի 2 –  պայմանագրային զինծառայող. մահացել է ՊՆ զորավարժադաշտում։ Դեպքով քրեական վարույթ է նախաձեռնվել։

Ապրիլի 14 – Նարեկ Արշակի Հակոբյան. մահվան դեպքով վարույթ է նախաձեռնվել՝ զինծառայողին ինքնասպանության հասցնելու հատկանիշներով։

Հունիսի 2 – Արամայիս Մերուժանի Գևորգյան. դին հայտնաբերվել է Կապանի զորամասում։ Դեպքով վարույթ է նախաձեռնվել։

Հունիսի 10 – ՊՆ սպա Ն.Ա.. մահվան դեպք, որի հանգամանքները քննվում են։

Հունիսի 26 – պայմանագրային զինծառայող Ռ.Խ.. մահվան հանգամանքները քննվում են, նշանակվել է դատաբժշկական փորձաքննություն։

Հուլիսի 21 – Նարեկ Թորոսյան. ժամկետային զինծառայող։ Դեպքով երկու համածառայակցի նկատմամբ քրեական հետապնդում է հարուցվել։

Օգոստոսի 13 – Գրիգոր Էդգարի Զաքարյան. դին հայտնաբերվել է հրազենային վնասվածքով։ Դեպքի հանգամանքները քննվում են։

Օգոստոսի 19 – Սուրեն Մամբրեի Վարդանյան. 19-ամյա զինծառայող, մահացել է զինծառայողների տեղափոխող մեքենայի մասնակցությամբ ճանապարհատրանսպորտային պատահարի հետևանքով։

 

Adidas Azteca գնդակը, որով խփված գոլը պատմության մեջ է մտել «Աստծո ձեռքը» անվամբ, վաճառվել է ԱՄՆ-ում կայացած աճուրդում 3.3 միլիոն դոլարով։

Ի սկզբանե ակնկալվում էր, որ գնդակը կվաճառվի մոտավորապես 10 միլիոն դոլարով։

Heritage Auctions-ը լոտն անվանել է «եզակի» և «գոյություն ունեցողներից ամենահիշարժան առարկան ֆուտբոլային աշխարհում»։

1986 թվականի հունիսի 22-ին կայացած Աշխարհի առաջնության քառորդ եզրափակիչի խաղի ժամանակ արգենտինացի հարձակվող Դիեգո Մարադոնան իր ձեռքով գոլ խփեց Անգլիային։ Չնայած անգլիացի խաղացողների վրդովմունքին՝ մրցավար Ալի Բին Նասերը հաշվեց գոլն՝ ընդունելով այն որպես գլխով խփված։

Մարադոնան ինքը հայտարարել է, որ վիճահարույց գոլը խփվել է «մասամբ Մարադոնայի գլխով, մասամբ՝ Աստծո ձեռքով»։

Ավելի քան 30 տարի գնդակը պատկանել է հենց այդ նույն մրցավարին։ 2022 թվականին Ալի Բին Նասերն այն վաճառել է 2.37 միլիոն դոլարով։ Նոր սեփականատերը գնդակն աճուրդի է հանել 2023 թվականին, սակայն աճուրդը չի առաջացրել զգալի հետաքրքրություն և հանվել է վաճառքից։

 

Սինգապուրում աջակցության նոր փաթեթի շրջանակում յուրաքանչյուր երեխայի համար, մինչև 17 տարեկանը լրանալը, ընտանիքներին կտրամադրվի գրեթե 70․000 սինգապուրյան դոլարի չափով (55․153 ԱՄՆ դոլար) ուղղակի ֆինանսական աջակցություն․ գրում է The Economic Times-ը։

Որոշումը կայացվել է երկրի ծնելիության ընդհանուր մակարդակի նվազման ֆոնին։

Փաթեթը ներառում է երեխաների համար նախատեսված ֆինանսական հատկացումներ, բնակարանային աջակցության ծրագրեր, երեխաների խնամքի սուբսիդիաներ, ծնողական արձակուրդ և 10.000 սինգապուրյան դոլարի (7.879 ԱՄՆ դոլար) չափով նվեր նորածինների համար։

Նշվում է, որ ընդհանուր առմամբ, մինչև երեխայի 17 տարեկանը լրանալը յուրաքանչյուր երեխայի համար տրամադրվող ուղղակի ֆինանսական աջակցությունը կկազմի գրեթե 70․000 սինգապուրյան դոլար (55․153 ԱՄՆ դոլար)։

Սինգապուրում ծնելիության ընդհանուր գործակիցը նախորդ տարի նվազել է մինչև 0․87։ Երկրի բնակչությունը կազմում է 6․1 միլիոն, սակայն քաղաքացիները կազմում են ընդհանուր բնակչության շուրջ 60%-ը։

Ծնելիության մակարդակի նվազումը մտահոգություններ է առաջացրել բնակչության ծերացման և աշխատուժի ապագայի վերաբերյալ։ Երկիրը շարժվում է «գերծերացած» հասարակություն դառնալու ճանապարհով։

 

 

Լրիվ կկվի հեքիաթն է, որ ձագերին հերթով տանում են․ այսօր ճեպազրույցում այսպես Հայաստանի ներկայիս վիճակը բնութագրեց «Ուժեղ Հայաստան» խմբակցության ղեկավար Նարեկ Կարապետյանը։

«Որտե՞ղ են մեր այն հողերը, որ դելիմիտացիայով պետք է հետ տրվեին, իսկ կարո՞ղ է Ադրբեջանը չի ուզում վերադարձնել, և միայն վերցնում է»,- ասաց նա։

Ադրբեջանը, ըստ նրա, պետք է վերադարձնի հարյուրավոր հեկտարներ Պառավաքարում, Գորիսում, Ջերմուկում՝ հազարավոր հեկտարներ։

«Դա է հիմնական ցուցիչը, թե իրենք պատրա՞ստ են իրական, երկարաժամկետ խաղաղության, թե՞ ուղղակի ինչ ուզում ստանում են»,- ասաց նա։

Սիսիանի զորամասերից մեկում հայտնաբերվել է 37-ամյա պայմանագրային զինծառայողի դի։

ՀՀ ՊՆ-ից ABC Media-ին հայտնեցին, որ, նախնական տվյալներով, զինծառայողի մահը ծառայության հետ առնչություն չունեցող պատճառներով է։

Դեպքի առնչությամբ նախաձեռնվել է քրեական վարույթ։

Հարավային Կորեան հաստատել է Միացյալ Նահանգների հետ իր վերջին համատեղ զորավարժությունների չեղարկումը՝ հղում անելով Մերձավոր Արևելքում գործողությունների պատճառով ամերիկյան զորքի պակասին. գրում է Bloomberg-ը։

Ssangyong զորավարժությունները, որոնք նախատեսված էին սեպտեմբերին և անցկացվում են երկու տարին մեկ, չեն կայանա նախատեսվածի համաձայն։

Ամերիկյան հրամանատարությունը Սեուլին տեղեկացրել է Պարսից ծոցի տարածաշրջանում ստեղծված իրավիճակի պատճառով ուժեր տեղակայելու անհնարինության մասին։

Սա վերջին շրջանում համատեղ զորավարժությունների ծավալի երկրորդ նշանակալի կրճատումն է։ Նախկինում ԱՄՆ նախագահ Դոնալդ Թրամփը հրամայել էր կրճատել այլ զորավարժությունների մասշտաբը, որոնք ավարտվել էին նախատեսվածից մեկ շաբաթ շուտ՝ օգոստոսի 21-ին։

Վաշինգտոնը դա բացատրել է Հյուսիսային Կորեայի հետ երկխոսությունը պահպանելու ցանկությամբ, ինչպես նաև Սեուլի՝ Իրանի հակամարտության հարցում Միացյալ Նահանգներին օգնելու դժկամությամբ։ Սակայն Կորեայի ներկայացուցիչը պարզաբանել է, որ Ssangyong զորավարժությունները հետաձգվել են, այլ ոչ թե ամբողջությամբ չեղարկվել։

Նրա խոսքով՝ երկու երկրների զինված ուժերը շարունակում են խորհրդակցություններն ապագայում զորավարժությունների հնարավոր վերսկսման վերաբերյալ։

ԱԺ-ում Կառավարության 5-ամյա ծրագրի ներկայացման ժամանակ Նիկոլ Փաշինյանի և «Ուժեղ Հայաստան» խմբակցության պատգամավոր Էդգար Ղազարյանի միջև սուր բանավեճ ծավալվեց։ Ղազարյանը Փաշինյանին մեղադրեց երկրի անվտանգության, ինքնիշխանության, տարածքային ամբողջականության և սահմանադրական կարգի դեմ ուղղված քաղաքականություն իրականացնելու համար՝ հայտարարելով, որ վարչապետը խորհրդարան գալու փոխարեն՝ պետք է ներկայանա Քննչական կոմիտե։

«Ձեր ծրագիրը, հնչեցրած մտքերը, դատողությունները երկրի անվտանգության, ինքնիշխանության, տարածքային ամբողջականության և սահմանադրական կարգի տապալման մի համալիր ամբողջություն է»,- հայտարարեց Ղազարյանը։

Նա Փաշինյանից պահանջեց նաև նշել, թե Սահմանադրության կամ օրենքի որ դրույթն է իրեն իրավունք տալիս խոսել «Երրորդ Հանրապետությունը տապալելու» և «Չորրորդ Հանրապետություն» ստեղծելու մասին, ինչպես նաև միջամտել Հայ առաքելական եկեղեցու ներքին կանոնական հարցերին։

Փաշինյանը հարցին պատասխանեց՝ նախ անդրադառնալով հենց Ղազարյանի՝ խորհրդարանում զբաղեցրած տեղին։

«Եթե շփոթվածության մասին խոսենք, կարծում եմ՝ Ձեր մասին պիտի խոսենք, որովհետև, ինչքան հասկացա, դեռ չեք կողմնորոշվել դահլիճի ո՞ր հատվածում պետք է նստեք»,- ասաց Փաշինյանը՝ հավելելով, որ եթե ընդդիմության ներկայացուցիչն այս տեմպերով շարունակի, հաջորդ անգամ վարչապետի այցի ժամանակ կարող է արդեն միջանցքում նստած լինել։

Այնուհետև Փաշինյանը հայտարարեց, որ իր քաղաքական գործունեության համար հիմք է ընտրություններից ստացած մանդատը։

«Ինչ վերաբերում է՝ ինչին, ով, որտեղ, երբ է իրավունք տալիս, դա մեր նախընտրական ծրագիրն է և ժողովրդից ստացած մանդատը։ Եվ մենք քաղաքական խոսույթներ ենք զարգացնում, որոնց նպատակը մեր պետության հարատևությունն ապահովելն է»,- ասաց նա։

Ղազարյանը նշեց, որ Փաշինյանը չի պատասխանել իր հարցին, և կրկին պահանջեց նշել այն իրավական հիմքը, որով Կառավարությունը «համարակալում» է Հայաստանի Հանրապետությունը։

«Ո՞վ է Ձեզ իրավունք տվել կործանելու հայկական պետականությունը, և ո՞վ է իրավունք տվել Ձեզ համարակալելու մեր պետությունը, որը համար չունի, այլ ունի անուն՝ Հայաստանի Հանրապետություն»,- հարցրեց պատգամավորը։

Ի պատասխան՝ Փաշինյանը հայտարարեց, որ Սահմանադրությունը վարչապետին լիազորում է սահմանել Կառավարության գործունեության հիմնական ուղղությունները։

Միաժամանակ նա հակադարձեց «Երրորդ Հանրապետություն» ձևակերպման վերաբերյալ քննադատությանը՝ հիշեցնելով, որ այդ ձևակերպումն օգտագործվել է նաև նախկին իշխանությունների և քաղաքական ուժերի կողմից։

«Եթե որևէ քաղաքական կուսակցություն կամ որևէ պատգամավոր ունի իրավունք Հայաստանի Հանրապետությունը Երրորդ Հանրապետություն անվանել, առավել ևս վարչապետը և կառավարող մեծամասնությունը, որը ժողովրդից մանդատ է ստացել, իրավունք ունի Չորրորդ Հանրապետություն անվանել»,- հայտարարեց Փաշինյանը։

Նրա խոսքով՝ «Երրորդ Հանրապետություն» և «Չորրորդ Հանրապետություն» ձևակերպումները քաղաքական խոսույթի մաս են։

«Սա այն դեպքն է, որ ասում է՝ ձեր աչքի գերանը չեք տեսնում, ուրիշի աչքի փուշն եք տեսնում»,- ասաց Փաշինյանը՝ հավելելով, որ եթե «Երրորդ Հանրապետություն» ձևակերպման իրավական հիմքը պարզաբանվի, ինքն էլ կօգտագործի այդ ձևակերպումը։

Այն, որ զինծառայողների մահերի համար կարելի է մեղադրել պաշտպանության նախարարին, նորություն է Հայաստանի Հանրապետությունում։ Ինչո՞ւ։ Իհարկե, ես միշտ հեռու եմ եղել այն մտքից, որ այս հարցին պետք է նայել վիճակագրության ձևով, բայց կյանքը, անցյալը և ընդհանրապես բանակի պատմությունը նույնպես որոշակի վիճակագրություն են ենթադրում. Այսօր տված ճեպազրույցի ժամանակ հայտարարել է պաշտպանության նախարար Սուրեն Պապիկյանը՝ ներկայացնելով վերջին տարիների ընթացքում Զինված ուժերում ինքնասպանությունների, ինքնասպանության հասցնելու դեպքերի և սպանությունների վիճակագրությունը։

«ՀՀ պատմության, բանակի ամբողջ պատմության ընթացքում ինքնասպանության, սպանության, ոչ կանոնադրային հարաբերությունների դեպքեր մշտապես եղել են։ Դրանք բարձրացել են, իջել են։ Օրինակ՝ 2025 թվականին մեր աշխատանքի արդյունքում այդ թիվը հասել է նվազագույնի՝ 2-ի։ Մի քանի վիճակագրական տվյալ ներկայացնեմ, որպեսզի ավելի հասկանալի լինի։ 2015 թվականին դեպքերի թիվը եղել է 7, իսկ 2016-ին, հավանաբար՝ Ապրիլյան պատերազմից հետո, թիվը միանգամից դարձել է 19։ Ես հոգեբան չեմ և չեմ կարող այստեղ գնահատական տալ»,- ասաց նա՝ հավելելով․ «Այդ նույն ժամանակահատվածում աշխատել է նույն նախարարը, նույն գլխավոր շտաբի պետը, և վստահաբար նույն հետևողականությամբ աշխատանք է տարվել։ 2017 թվականին թիվը դարձել է 13, 2018-ին՝ 12, 2019-ին՝ 11 դեպք։ Խոսում եմ ինքնասպանության, ինքնասպանության հասցնելու և սպանության դեպքերի մասին։ Չեմ խոսում առհասարակ բանակում ինֆարկտից, ավտովթարից և տարբեր այլ պատճառներով մահերի մասին»։

2020 թվականին այդ թիվը եղել է 10, 2021-ին՝ 10, 2022-ին՝ 8, 2023-ին՝ 9, 2024-ին՝ 11, 2025-ին՝ 2, իսկ 2026-ին՝ 8։

«Սա վիճակագրություն է այն մասին, որ վերջին 1 տասնամյակի ընթացքում այդ թվերը և՛ մեծացել են, և՛ նվազել։ Դրանք ունեն տարբեր պատճառներ։ Դեպքերի մի մասը ոչ կանոնադրային հարաբերությունների, մի մասը՝ քրեական ենթամշակույթի հետևանք է։ Սա մարտահրավեր է, որը միայն իմը չէ։ Անկախ նրանից՝ պաշտպանության նախարար կլինեմ ես, թե այլ մարդ, այս խնդրին պետք է համակարգային մոտեցում ցուցաբերել։ Ես չպետք է խորշեմ լսել, երբ դուք ներկայացնում եք որևէ խնդիր։ Այդ խնդրի հետևից պետք է գնանք՝ և՛ դուք, և՛ ես»,- ասել է Սուրեն Պապիկյանը։

Իրանի պետական հեռուստատեսությունը տեսանյութ է հեռարձակել, որում ցուցադրվում է՝ ինչպես է Թեհրանը հետևում ԱՄՆ նախագահ Դոնալդ Թրամփի 20-ամյա որդու՝ Բարոն Թրամփի տեղաշարժին․ գրում է Euronews-ը։

Տեսանյութում ասվում է, որ Բարոն Թրամփի համար 10 միլիոն դոլարի չափով գլխագին է սահմանվել։

Իրանի Իսլամական հեղափոխության պահապանների կորպուսին (ԻՀՊԿ) հարող լրատվամիջոցների տարածած և իրանական պետական հեռուստատեսության «Երրորդ ալիքով» հեռարձակված տեսանյութը վերնագրված է՝ «Որտե՞ղ և ինչպե՞ս պետք է սպանենք Բարոն Թրամփին»։

Ըստ տեսանյութի՝ այնտեղ ներկայացված են Թրամփի որդու համալսարանի գտնվելու վայրը, նրան ուղեկցող մեքենաները և ԱՄՆ գաղտնի ծառայության՝ նրա անվտանգությունն ապահովող աշխատակիցների տեղակայումը։ Նշվում է, որ ԱՄՆ նախագահի որդու տեղաշարժն «ամբողջությամբ վերահսկվել է»։

Տեսանյութում նաև ասվում է, որ մի աղջիկ կարողացել է շրջանցել Գաղտնի ծառայության պաշտպանությունը, առանձին հանդիպել Բարոն Թրամփի հետ և հանդիպման վերաբերյալ տեղեկություններ փոխանցել հաղորդման հեղինակներին։

Euronews-ը, սակայն, նշում է, որ չի կարողացել անկախ աղբյուրներով հաստատել տեսանյութում ներկայացված պնդումները։

Հեռարձակումը հաջորդում է իրանական Tasnim լրատվական գործակալության՝ հուլիսին հրապարակած նմանատիպ տեսանյութին, որտեղ մանրամասն ներկայացվել էին ԱՄՆ առաջին տիկին Մելանյա Թրամփի տեղաշարժը Նյու Յորքում և նրա անվտանգության համակարգի ենթադրյալ խոցելի կողմերը։