Category: ABCNews

Այսօր ԱԺ-ում քննարկում են ԱԺ 3-րդ փոխնախագահի ընտրության հարցը։ Ընդդիմության թեկնածուն «Ուժեղ Հայաստան» խմբակցության պատգամավոր Արամ Վարդևանյանն է։

«Ընդդիմությունը գիտակցված որոշում է կայացրել ստանձնել Սահմանադրությամբ իրեն վերապահված պատասխանատվությունը՝ մասնակցելով խորհրդարանի ամբողջական ձևավորման գործընթացին»,-հայտարարեց Արամ Վարդևանյանը։

Նրա խոսքով՝ ընդդիմադիր պատգամավոր լինելը Հայաստանում հեշտ չէ, սակայն խորհրդարանական վերահսկողության բոլոր գործիքները պետք է գործածվեն մի նպատակով՝ ունենալ ուժեղ Հայաստան։

«Մենք չենք տեսնում, որ Հայաստանի Հանրապետությունը ճիշտ ուղղությամբ է ընթանում։ Տեսնում ենք, որ կան կարմիր գծեր, որոնք խարխլվել են»,- ասաց նա։

Պատգամավորն անդրադարձավ նաև Եկեղեցու շուրջ զարգացումներին և գործարար Սամվել Կարապետյանի կալանքին՝ պնդելով, որ վերջինիս նկատմամբ կիրառված խափանման միջոցը եղել է ապօրինի։ Նրա գնահատմամբ՝ վերջին տարիներին Հայաստանում խորացել է «մարդասիրության ճգնաժամը», իսկ կալանքը դարձել է անհամաչափ կիրառվող միջոց, այն դեպքում, երբ օրենսդրությամբ նախատեսված են այլընտրանքային խափանման միջոցներ՝ տնային կալանք, վարչական հսկողություն և գրավ։

Վարդևանյանը նշեց, որ նույն խնդիրը վերաբերում է նաև կալանավորված այլ անձանց, այդ թվում՝ սրբազաններին և Ռուբեն Մխիթարյանին՝ հարց բարձրացնելով, թե ինչու նրանց նկատմամբ չեն կիրառվել ավելի մեղմ խափանման միջոցներ։

Նա խոսեց նաև խորհրդարանի աշխատանքի արդյունավետության մասին՝ առաջարկելով, որ ընդդիմության ներկայացրած օրենսդրական նախաձեռնությունները մշտական հանձնաժողովներում չմերժվեն ավտոմատ կերպով, այլ հասնեն լիագումար նիստերի քննարկման։

Վարդևանյանն առաջարկեց նաև ընդլայնել Եվրոպայի խորհրդի Վենետիկի հանձնաժողով դիմելու հնարավորությունները՝ այդ իրավունքը վերապահելով նաև ընդդիմության կողմից ընտրված ԱԺ փոխնախագահին։ Նրա խոսքով՝ դա հնարավորություն կտա միջազգային փորձագիտական կարծիք ստանալու նաև այն դեպքերում, երբ իշխանությունը նման անհրաժեշտություն չի տեսնում։

Ելույթի ավարտին նա հայտարարեց, որ ընտրվելու դեպքում նիստերը կվարի հավասարության սկզբունքով և թույլ չի տա վիրավորական արտահայտություններ՝ անկախ նրանից, թե որ քաղաքական ուժի ներկայացուցիչն է ելույթ ունենում։

Հիշեցնենք՝ օգոստոսի 4-ին խորհրդարանն ընտրեց ԱԺ նախագահի առաջին տեղակալին՝ ՔՊ-ական Հայկ Կոնջորյանին, օգոստոսի 5-ին՝ երկրորդ տեղակալին՝ Վահագն Ալեքսանյանին։

 

Օգոստոսի 6-ին Բաքվի վերաքննիչ դատարանը շարունակել է քննել Հայաստանի քաղաքացիներ Արայիկ Հարությունյանի, Արկադի Ղուկասյանի, Բակո Սահակյանի, Դավիթ Իշխանյանի, Դավիթ Բաբայանի, Լևոն Մնացականյանի և այլոց վերաքննիչ բողոքները: Բաքվի ռազմական դատարանը նրանց «դատապարտել է խաղաղության և մարդկության դեմ ուղղված հանցագործությունների համար, որոնք կատարվել են Ադրբեջանի դեմ Հայաստանի ռազմական ագրեսիայի հետևանքով, այդ թվում՝ պատերազմական հանցագործությունների, այդ թվում՝ ագրեսիվ պատերազմի նախապատրաստման և վարման, ցեղասպանության, պատերազմի օրենքների և սովորույթների խախտման, ահաբեկչության, ահաբեկչության ֆինանսավորման, իշխանության բռնի զավթման և բազմաթիվ այլ հանցագործությունների համար»։

Ինչպես հաղորդում է Report-ը, Բաքվի վերաքննիչ դատարանի դատավոր Էլմար Ռահիմովի նախագահությամբ և դատավորներ Էմին Մեհդիևի և Մեհրիբան Գարաևայի մասնակցությամբ կայացած դատական նիստում քրեական գործով վերաքննիչ վարույթի ենթարկված յուրաքանչյուր անձի տրամադրվել են թարգմանիչներ իրենց մայրենի լեզուներով (հայերեն և ռուսերեն), ինչպես նաև փաստաբաններ՝ նրանց պաշտպանությունն ապահովելու համար։

Դատարանի որոշումը մեղադրյալների վերաքննիչ բողոքների վերաբերյալ հրապարակվել է նիստում՝ անփոփոխ թողնելով նախորդ որոշումը։

Հիշեցնենք, որ Բաքվի զինվորական դատարանի 2026 թվականի փետրվարի 5-ի դատավճռով Արայիկ Հարությունյանը, Լևոն Մնացականյանը, Դավիթ Մանուկյանը, Դավիթ Իշխանյանը և Դավիթ Բաբայանը դատապարտվել են ցմահ ազատազրկման, Արկադի Ղուկասյանը և Բակո Սահակյանը՝ 20, Մադաթ Բաբայանը և Մելիքսեթ Փաշայանը՝ 19 տարվա ազատազրկման։ Գարիկ Մարտիրոսյանը դատապարտվել է 18, Դավիթ Ալավերդյանն ու Լևոն Բալայանը՝ 16, Վասիլի Բեգլարյանը, Գուրգեն Ստեփանյանը և Էրիկ Ղազարյանը 15 տարվա ազատազրկման։

«Ոսկե գլոբուս» հիմնադրամը (Golden Globe Foundation) հայ պրոդյուսեր, լրագրող և հեռուստահաղորդավար Րաֆֆի Պողոսյանին ընտրել է կազմակերպության տնօրենների խորհրդի նախագահ։

Այս մասին տեղեկանում ենք Պողոսյանի Instagram-ի էջից։

«Պատիվ ունեմ հայտնելու, որ ընտրվել եմ «Ոսկե գլոբուս» հիմնադրամի տնօրենների խորհրդի նախագահ։ Շնորհակալ եմ իմ հանդեպ ցուցաբերված վստահության համար: Պատրաստ եմ ծառայել հիմնադրամին, աջակցել նրա առաքելության իրականացմանը և արժեքավոր ներդրում ունենալ հիմնադրամի գործունեության մեջ», – գրել է Պողոսյանը։

«Ոսկե գլոբուս» հիմնադրամը 1943 թվականին հիմնադրված Hollywood Foreign Press Association-ի (HFPA) իրավահաջորդ ոչ առևտրային կազմակերպությունն է։ HFPA-ն նախկինում «Ոսկե գլոբուս» մրցանակաբաշխության սեփականատերն ու կառավարող մարմինն էր։ 2023 թվականի հունիսի 12-ին HFPA-ն լուծարվեց․ կազմակերպությունն իր բոլոր ակտիվները վաճառեց Dick Clark Productions ընկերությանը և վերանվանվեց «Ոսկե գլոբուս» հիմնադրամ։

Կալիֆոռնիայի Ուեսթ Հոլիվուդ քաղաքում տեղակայված հիմնադրամը զբաղվում է դրամաշնորհային ծրագրերով՝ աջակցելով կինոյի, լրագրության, կրթության և մշակույթի ոլորտների տարբեր նախաձեռնությունների։

 

Այս աշնանն Amazon Prime հարթակում կցուցադրվի ԱՄՆ առաջին տիկին Մելանյա Թրամփի մասին վավերագրական սերիալ. գրում է Euronews-ը։

Նախագիծը հաջորդում է առաջին տիկնոջ մասին պատմող «Melania: Twenty Days to History» ֆիլմին, որն արժանացել է բազմաթիվ քննադատությունների, ինչպես նաև ձախողել կինովարձույթում։

Մելանյա Թրամփի ավագ խորհրդական Մարկ Բեքմանի խոսքով՝ սերիալը կբացահայտի ԱՄՆ առաջին տիկնոջ՝ «մինչ այժմ հանրության համար անհայտ կողմը»։

Նախագիծը կներկայացնի Մելանյա Թրամփի կյանքը նրա ամուսնու նախագահության երկրորդ ժամկետի սկզբնական շրջանում։

Amazon MGM Studios-ի «Melania: Twenty Days to History» վավերագրական ֆիլմը պատմում էր Դոնալդ Թրամփի՝ նախագահի պաշտոնում երկրորդ երդմնակալության արարողությանը նախորդած 20 օրերի մասին։ Ֆիլմի պատճառով Amazon-ը ֆինանսական մեծ կորուստներ է կրել։ The New York Times-ի տվյալներով՝ ընկերությունը Մելանյա Թրամփի պրոդյուսերական ընկերությանը 40 միլիոն դոլար է վճարել ֆիլմի իրավունքների համար, և ևս 35 միլիոն դոլար՝ մարքեթինգային ծախսերի համար։

Ֆիլմը, սակայն, կինոթատրոններում ցուցադրությունից հետո ամբողջ աշխարհում ունեցել է ընդամենը 16.6 միլիոն դոլարի հասույթ, մինչդեռ դրա ընդհանուր բյուջեն կազմել է 75 միլիոն դոլար։ Նախագիծն արժանացել է նաև ԱՄՆ օրենսդիրների քննադատությանը․ նրանցից շատերը հրապարակայնորեն հարց են բարձրացրել՝ արդյոք այն չի խախտում կաշառակերության դեմ պայքարի դաշնային օրենքները։

 

Անգլիական հեղինակավոր The Independent թերթի թղթակիցն այցելել է Երևան և ներկայացրել ՀՀ-ն, դրա մայրաքաղաքն ու պատմամշակութային ժառանգությունը։ Ժամանելուն պես նա եղել է հրապարակում, որտեղ նրան զարմացրել են մարդկանց բազմությունն ու «երգող շատրվանները»։ «Պարզվում է, որ սա պարզապես սովորական երկուշաբթի է», – գրել է հեղինակը։

Լուսաբացին պարզվում է, որ հրապարակն իրականում օվալաձև է, շրջապատված տպավորիչ, կոր շենքերով, որոնք հայ ճարտարապետ Ալեքսանդր Թամանյանի քաղաքի տեսլականի կարևոր մասն են կազմում: Նա այն նախագծել է գրեթե զրոյից 1920-ականներին։ Հրապարակում գտնվում են տարբեր կառավարական շենքեր, Կենտրոնական փոստային բաժանմունքը, Ազգային պատկերասրահը և Պատմության թանգարանը, որոնք բոլորը կառուցված են վարդագույն տուֆից, ինչի պատճառով էլ Երևանը բանաստեղծորեն անվանվել է «Վարդագույն քաղաք»։

Լինելով Հարավային Կովկասի տարածաշրջանում ցամաքային երկիր և սահմանակից Վրաստանին, Թուրքիային և ավելի բարդ հարևաններին՝ Իրանին ու Ադրբեջանին, Հայաստանը, որպես կանոն, մարդկանց մեծամասնության ցանկությունների ցուցակի առաջին տեղում չի եղել։

Պատմությամբ, մշակույթով և բնույթով հարուստ Երևանը, սակայն, աշխարհի ամենահին քաղաքներից մեկն է, որը գոյություն ունի մ.թ.ա. 782 թվականից՝ Հռոմից առաջ, բայց ստիպված է եղել հաղթահարել բյուզանդացիների, օսմանցիների, պարսիկների և Ռուսական կայսրության վերահսկողության շուրջ վեճերը։ Հին քաղաքից շատ բան չի մնացել. փոխարենը հեղինակը տեսել է ընդամենը 1.1 միլիոն բնակչություն ունեցող ժամանակակից և նրբագեղ մետրոպոլիս, որտեղ մաշված, ռուսական արտադրության «Լադաները» գերիշխում են երթևեկության մեջ նույնքան, որքան սահուն «Տեսլաները»։

Հեղինակի խոսքով՝ ամեն քայլափոխի իսկապես ինչ-որ տարբեր բան կա։ Այստեղ մշակույթը մեծարվում է, և երկրի ամենահայտնի բանաստեղծներից, նկարիչներից, երաժիշտներից և կոմպոզիտորներից մի քանիսին նվիրված հուշատախտակները, կիսանդրիները և արձանները զարդարում են փողոցները։

Թամանյանի կողմից նախագծված մոխրագույն, շրջանաձև, վեհաշուք օպերայի և բալետի ազգային թատրոն գնալու ճանապարհին հեղինակն անցել է փոքրիկ, գեղեցիկ Կարապի լճի կողքով։

«Մի քանի քայլ հեռավորության վրա է գտնվում ամենացնցող քաղաքային տեսարժան վայրերից մեկը, որը ես երբևէ տեսել եմ՝ Կասկադ համալիրը՝ 572 աստիճաններից բաղկացած բազմաշերտ կառույց, որը բարձրանում է շատրվանների, քանդակների և Ջերարդ Գաֆեսջյանի կողմից նվիրաբերված ժամանակակից արվեստի գործերի միջով։ Ավելի շատ ստեղծագործություններ են շարված աստիճանների և շարժասանդուղքների վրա։ Վերևից տեսարանը տարածվում է դեպի Արարատ լեռը, որը Նոյյան տապանի աստվածաշնչյան հանգստավայրն է և սրբազան վայր բազմաթիվ հայերի համար, ովքեր հավատում են, որ այն իրենց ուղղակիորեն կապում է Նոյի տոհմի հետ: Թամանյանը միտումնավոր է քաղաքը նախագծել այնպես, որ յուրաքանչյուր բնակիչ կարողանա տեսնել լեռը՝ չնայած խորհրդային իշխանությունները 1921 թվականին այն զիջեցին Թուրքիային», – նշել է հոդվածագիրը:

Նա խոսել է նաև հայերի սարսափելի ցեղասպանության մասին, երբ Օսմանյան կայսրությունում թիրախավորել են երկրի քրիստոնյա բնակչությանը: Ցավալի և սթափեցնող փաստերը ներկայացված են Ծիծեռնակաբերդի հուշահամալիրում: Ըստ հեղինակի՝ այն այցելելն անհրաժեշտ է՝ հասկանալու այս գեղեցիկ երկրի կրած դժվարություններն ու դիմադրությունը։

«Ես կավարտեմ շատ ավելի դրական նոտայով՝ ուտելիքով: Ամեն պահի այն թարմ էր, տնական և անչափ համեղ: Հայկական հացը նույնիսկ ՅՈՒՆԵՍԿՕ-ի կողմից է ճանաչված», – նշել է հոդվածագիրը՝ նկարագրելով նաև հայկական խորովածն ու հարիսան։

Հայաստանում տեսնելու լավագույն բաները Երևանից դուրս են։ Այս հետաքրքրաշարժ տեսարժան վայրերը բոլորը գտնվում են մեկ ժամվա հեռավորության վրա։

Գառնիի տաճարը՝ նախկին Խորհրդային Միությունում միակ պահպանված հունա-հռոմեական սյունազարդ շենքը, այս նրբագեղ, առաջին դարի կառույցը հաճախ համեմատվում է Աթենքի Պարթենոնի հետ։

Քարերի սիմֆոնիան Հայաստանի պատասխանն է Հսկաների ճանապարհին։ Այս բնական երևույթը բաղկացած է հազարավոր վեցանկյուն բազալտե սյուներից, որոնք գտնվում են Գառնիի կիրճում։

Գեղարդի վանքը միջնադարյան, ՅՈՒՆԵՍԿՕ-ի ցանկում ընդգրկված քարանձավային վանք է՝ փորված Ազատի հովտի ժայռերի մեջ։

Զվարթնոցի տաճարը թվագրվում է յոթերորդ դարին, սակայն ավերվել է 10-րդ դարի երկրաշարժից։ Այս շրջանաձև տաճարի տպավորիչ ավերակները կառուցվել են այն վայրում, որտեղ Գրիգոր Լուսավորիչը՝ Հայաստանում քրիստոնեության հիմնադիրը, հանդիպել է այն ժամանակվա Տրդատ թագավորի հետ՝ նրան համոզելու ընդունել այդ կրոնը։

Էջմիածինը Հայաստանի և, հնարավոր է, աշխարհի ամենահին տաճարը, կառուցվել է 301 թվականին՝ քրիստոնեության ընդունումից կարճ ժամանակ անց։ Այսօր այն նաև Հայ առաքելական եկեղեցու վարչական կենտրոնն է։

 

 

Մամուլում շրջանառվող տեղեկաությունների համաձայն՝ ԱՄՆ նախագահ Դոնալդ Թրամփը նախորդ շաբաթ կոշտ զրույց է ունեցել Պենտագոնի ղեկավար Փիթ Հեգսեթի հետ՝ երկրի զինանոցում առաջացած զինամթերքի պակասի վերաբերյալ․ գրում է The Independent-ը։

Թեմային ծանոթ երկու աղբյուրներ The Washington Post-ին հայտնել են, որ նախորդ ուրբաթ նախարարների հետ հանդիպման ժամանակ Թրամփը պատերազմի նախարար Փիթ Հեգսեթից պահանջել է պարզաբանել՝ ինչու են սպառվող զինամթերքի պաշարների վերաբերյալ իրեն սխալ տեղեկություններ փոխանցել՝ նշելով, որ կարծում էր՝ «խնդիրն արդեն լուծվել է»։

Աբյուրների փոխանցմամբ՝ Հեգսեթը զինամթերքի պակասի, ինչպես նաև Թրամփի՝ լիարժեք տեղեկացված չլինելու համար մեղադրել է իր տեղակալ Սթիվեն Ֆայնբերգին։

Թրամփի վարչակազմը, սակայն, հերքել է այս տեղեկությունը։ Սպիտակ տան մամուլի քարտուղար Քերոլայն Լևիթը Թրամփի և Հեգսեթի զրույցի վերաբերյալ The Washington Post-ի հրապարակումն անվանել է «100% կեղծ տեղեկություն»։ Պենտագոնի ներկայացուցիչ Շոն Փարնելը նույնպես հերքել է լուրը։

 Հիշեցնենք, որ օրերս շրջանառվում են տեղեկություններ, որ մինչ Իրանի դեմ պատերազմը ձգձգվում է, Պենտագոնում սպառվում են հակաօդային պաշտպանության համակարգերը։

 

Օգոստոսի 2-ին դանակահարության դեպք է տեղի ունեցել Երևանում․ գրում է shamshyan.com-ը։

«Ժամը 23։05-ի տեղեկություն է ստացվել, որ դանակահարված վիճակում «Հերացի թիվ 1» համալսարանական հիվանդանոց բուժօգնության է տեղափոխվել մի տղամարդ, ում առողջական վիճակը գնահատվել է ծանր։

Երևանի քրեական ոստիկանները պարզել են, որ վիրավորը Արարատի մարզի բնակիչ 30-ամյա Սերոբ Հ․-ն է։

Մեր տեղեկություններով՝ նույն օրը՝ ժամը 22։00-ի սահմաններում, անհայտ անձը Սայաթ-Նովայի պողոտայի թիվ 39 շենքի բակում դանակով հարվածել է Սերոբ Հ․-ին՝ պատճառելով մարմնական վնասվածք, ապա դիմել է փախուստի, և քրեական ոստիկանների կողմից ձեռնարկվում են միջոցառումներ հանցագործություն կատարած անձին հայտնաբերելու ուղղությամբ»,- նշում է լրատվամիջոցը։

 

Պակիստանը մեծ նշանակություն է տալիս Մոսկվայի, Երևանի և Բաքվի հետ կապերի ամրապնդմանը: Այս մասին ТАСС-ի հետ զրույցում հայտարարել է Մոսկվայում Պակիստանի դեսպան Ֆեյսալ Նիյազ Թիրմիզին։

Մեկնաբանելով Պակիստանի և Հայաստանի միջև դիվանագիտական հարաբերությունների հաստատումը՝ Բաքվի և Երևանի միջև լարվածության կարգավորման ֆոնին, ինչպես նաև Պակիստանում Հայաստանի առաջին դեսպանի նշանակման հարցը, դիվանագետն ընդգծել է, որ «Հայաստանն, Ադրբեջանը և Կովկասը շատ ընդհանրություններ ունեն Պակիստանի հետ»։

«Շատ տարիներ մենք դիվանագիտական հարաբերություններ չենք ունեցել Հայաստանի հետ, և ես շատ ուրախ եմ, որ վերջին իրադարձություններից հետո ճանաչվել է Հայաստանի հետ նորմալ շփումներ հաստատելու անհրաժեշտությունը», – նշել է Ֆեյսալ Նիյազ Թիրմիզին:

«Ես բազմաթիվ հեռանկարներ եմ տեսնում Պակիստանի, Հայաստանի և ամբողջ Կովկասյան տարածաշրջանի միջև հարաբերությունների զարգացման համար», – նշել է դեսպանը։

Վերջինս խոսել է Պակիստանում բնակվող հայերի մասին ու նշել, որ թեև քչերը գիտեն, բայց երկրի ամենաբարձր ռազմական պարգևը ստացած զինվորականներից մեկը հայկական ծագում ունի։

«Ես պատիվ եմ ունեցել այցելելու այս տարածաշրջանի բազմաթիվ երկրներ և հողեր: Մենք պատմական կապեր ունենք Կովկասի հետ, և Հայաստանը դրանց շատ կարևոր մասն է կազմում: Ես տեսնում եմ, թե ինչպես են ներկայումս զարգանում մարդկանց միջև շփումները և գործարար կապերը Հայաստանի և Պակիստանի միջև։

 

 

 

Ադրբեջանի արտաքին գործերի նախարար Ջեյհուն Բայրամովի գլխավորած պատվիրակությունը պաշտոնական այցով Ուկրաինայում է։

Կիևում նրան դիմավորել են Ուկրաինայի արտաքին գործերի նախարար Անդրեյ Սիբիհան և այլ պաշտոնյաներ։

Այցի շրջանակներում նախատեսված են երկկողմ հանդիպումներ Ադրբեջանի արտաքին գործերի նախարար Ջեյհուն Բայրամովի, Ուկրաինայի արտաքին գործերի նախարար Անդրեյ Սիբիհայի և այլ բարձրաստիճան պաշտոնյաների միջև։

 

 

Կառավարությունը երեք նախարարության անվանում ցանկանում է խմբագրել։ «Կառավարության կառուցվածքի և գործունեության մասին» 2018 թվականի մարտի 23-ի ՀՕ-253-Նօրենքում փոփոխություններ անելու» նախագծով, ինչն այսօր հաստատվել է գործադիրի նիստում, կլինեն հետևայլ փոփոխությունները․

• Բարձր տեխնոլոգիական արդյունաբերության նախարարությունը կկոչվեի Բարձր տեխնոլոգիական արդյունաբերության և արհեստական բանականության նախարարություն
• Աշխատանքի և սոցիալական հարցերի նախարարությունը՝ Աշխատանքի և բարեկեցության նախարարություն
• Արտաքին գործերի նախարարությունը՝ Արտաքին գործերի և միջազգային առևտրի նախարարություն: