Category: ABCNews

Մինչ Ադրբեջանը միլիարդներ է ծախսում բռնազավթված Արցախում շինարարության և վերաբնակեցման ծրագրերի համար, Բաքվին հարակից Ապշերոնի բնակավայրերում մարդիկ խմելու ջրի խնդիր ունեն։ Ինչպե՞ս է պաշտոնական Բաքուն բացատրում վիճակը, և ի՞նչ համակարգային խնդիրներ են դրա տակ տեսնում փորձագետները։

Հոկեյի միջազգային ֆեդերացիայի (IIHF) խորհուրդը մերժել է Ռուսաստանի հոկեյի ֆեդերացիայի դիմումը՝ 2026/27 մրցաշրջանում ռուսական հավաքականներին միջազգային մրցաշարերին մասնակցելու թույլտվություն տրամադրելու վերաբերյալ․ գրում է РИА Новости-ն՝ հղում անելով ֆեդերացիայի հայտարարությանը։

IIHF-ը նշել է, որ Ռուսաստանի՝ տարբեր տարիքային խմբերի հավաքականները չեն մասնակցի առաջնություններին «անվտանգության և մարզական արդարության հետ կապված շարունակվող մտահոգությունների» պատճառով։

Նույն որոշմամբ միջազգային մրցաշարերից հեռացված են նաև Բելառուսի հավաքականները։

Թուրքիայի նախագահ Ռեջեփ Թայիփ Էրդողանը հայտարարել է, որ Անկարան պատրաստ է լիակատար աջակցություն ցուցաբերել Լիբանանին՝ Իսրայելի հարձակումներից տուժած հարավային շրջանների վերականգնման գործում։

Նրա խոսքով՝ միջազգային ուժերի դուրսբերումից հետո Թուրքիան ցանկանում է մասնակցել Լիբանանի «ինքնիշխանության ապահովմանն ու ամրապնդմանն» ուղղված բոլոր նախաձեռնություններին։

Էրդողանը նաև նշել է, որ Թուրքիան կշարունակի աջակցել Լիբանանի զինված ուժերին։

ՈւԵՖԱ-ն կբոյկոտի ՖԻՖԱ-ի մրցաշարերը, այդ թվում՝ Աշխարհի առաջնությունը, եթե կազմակերպության նախագահ Ջաննի Ինֆանտինոն իրականացնի Աշխարհի առաջնության առևտրային իրավունքների բաժնեմասի վաճառքի ծրագիրը․ գրում է Sky Sports-ը։

Այս որոշումը, ըստ հաղորդագրության, ընդունվել է այսօր կայացած արտահերթ նիստում, որին մասնակցել են ՈւԵՖԱ-ի բոլոր 55 անդամ երկրները։

Նշվում է, որ նման բոյկոտը հավանաբար կխափանի Ինֆանտինոյի նախաձեռնությունը, քանի որ եվրոպական հավաքականների բացակայության դեպքում ներդրողները դժվար թե ցանկանան ներդրումներ կատարել մրցաշարում։

Հիշեցնենք՝ Ինֆանտինոյի առաջարկած ծրագրով նախատեսվում է մասնավոր ներդրողներին վաճառել Աշխարհի առաջնության մրցաշարի առևտրային իրավունքների մի մասը՝ լրացուցիչ ֆինանսավորում ներգրավելու նպատակով։

Ամերիկացի գործարար Իլոն Մասկը մտադիր է լայնածավալ ֆինանսավորում տրամադրել ԱՄՆ Հանրապետական կուսակցությանը՝ առաջիկա Կոնգրեսի միջանկյալ ընտրություններում դրա դիրքերն ամրապնդելու նպատակով։ Այդ մասին հայտնում է Axios պարբերականը՝ նշելով, որ միլիարդատերը վերագործարկում է իր քաղաքական America PAC հիմնադրամի գործունեությունը, որի միջոցներն ուղղվելու են Դոնալդ Թրամփի կուսակցության օգտին ընտրողների մոբիլիզացմանը։

Axios-ի աղբյուրների փոխանցմամբ՝ America PAC-ը միջոցներ կհատկացնի թիրախային թվային գովազդի, փոստային քարոզարշավների և տնետուն այցելությունների համար՝ ընտրողներին համոզելու քվեարկել Հանրապետական կուսակցության թեկնածուների օգտին։ Հատուկ ուշադրություն կդարձվի այն ընտրողներին, որոնք սովորաբար հանրապետականներին աջակցում են միայն նախագահական ընտրություններում, սակայն չեն մասնակցում Կոնգրեսի ընտրություններին կամ չեն քվեարկում նույն ակտիվությամբ։

Իլոն Մասկի ներկայացուցիչները չեն հրապարակում նախատեսվող ֆինանսավորման չափը, սակայն Axios-ի հարցված փորձագետները համոզված են, որ այն կլինի «հսկայական»։

Պարբերականը հիշեցնում է, որ America PAC-ը 2024 թվականի նախընտրական քարոզարշավի ընթացքում ներդրել էր ավելի քան 260 միլիոն դոլար՝ Դոնալդ Թրամփի հաղթանակին աջակցելու նպատակով։ Այդ ներդրման շնորհիվ Իլոն Մասկը դարձել էր ԱՄՆ պատմության ամենախոշոր քաղաքական դոնորը։

Axios-ի տվյալներով՝ նույնիսկ առանց Մասկի նոր ֆինանսավորման Հանրապետական կուսակցությունն արդեն շուրջ 300 միլիոն դոլարով ավելի շատ նախընտրական միջոցներ ունի, քան Դեմոկրատական կուսակցությունը։

ԱԺ-ում լրագրողների աշխատանքի շուրջ նոր վեճ է ծագել․ լրատվամիջոցները պնդում են՝ խորհրդարանում լրագրողների աշխատանքը սահմանափակող նոր կանոններ են հայտնվել, մինչդեռ ՔՊ-ից հակադարձում են՝ խոսքը նոր կարգավորումների մասին չէ, դրանք գործում են դեռ 2021 թվականից։

Ի՞նչ է իրականում փոխվել, անվտանգության կանոնները կարո՞ղ են արդյոք սահմանափակել լրագրողների աշխատանքը։

Այսօր՝ հուլիսի 30-ին, առեղծվածային մահվան դեպք է տեղի ունեցել Կոտայքի մարզում։Ժամը 17.50–ի սահմաններում ՀՀ Ներքին գործերի նախարարության փրկարար ծառայության Կոտայքի մարզային վարչությունում ահազանգ է ստացվել, որ Նոր Հաճնի կամրջի տակ՝ գետի ափին, դի կա. գրում է Shamshyan․com-ը։

Ինչպես հայտնում է ֆոտոլրագրող Գագիկ Շամշյանը, դեպքի վայր են ժամանել Կոտայքի մարզային փրկարարական վարչության ծառայողները՝ վարչության պետ Սեդրակյանի և Աբովյանի հրշեջ-փրկարարական ջոկատից մեկ մարտական հաշվարկ՝ ջոկատի հրամանատարի գլխավորությամբ։

Տեղում պարզվել է, որ ստացված տեղեկությունը հավաստի է․ փրկարարներն այնտեղ հայտնաբերել են երիտասարդ կնոջ մարմին։

Դեպքի փաստով քննչական բաժնում նախաձեռնվել է քրեական վարույթ, որտեղ էլ պարզվում է մահացածի ինքնությունը։

Փաշինյանական արդարադատությունը մերժեց «Սիսական» ջոկատի հրամանատար Աշոտ Մինասյանի վաղաժամ ազատ արձակման միջնորդությունը. հայտնում է ԱԺ պատգամավոր Տիգրան Աբրահամյանը։

«Դրսից ներկրված անարժեքության և գաղափարան սնանկության պայմաններում, Աշոտ Մինասյանը որպես հայրենիքի նվիրյալ կշարունակի մնալ ճաղերի հետևում, իսկ տեսակ և սկզբունք չունեցողները կշարունակեն որոշումներ կայացնել:

Ինչ խոսք, պետք է ընդունել, որ բռնատիրության կառուցումն այսպիսի իրողություններ է ենթադրում և պայքարը պետք է կազմակերպել այդ իրողությունները հաշվի առնելով»,- գրել է նա։

ՀՀ վարչապետի տիկին Աննա Հակոբյանի՝ իր կյանքի նկատմամբ սպառնալիքների վերաբերյալ հաղորդման ուսումնասիրման արդյունքում տեղեկատվական կամ հաղորդակցական տեխնոլոգիաներն օգտագործելով խուլիգանություն կատարելու դեպքի առթիվ նախաձեռնվել է քրեական վարույթ։ «Արմենպրես»-ի հետ զրույցում այս մասին հայտնեց ՀՀ քննչական կոմիտեի մամուլի քարտուղար Կիմա Ավդալյանը։

«Տեղեկատվական կամ հաղորդակցական տեխնոլոգիաներն օգտագործելով խուլիգանություն կատարելու դեպքի առթիվ նախաձեռնվել է քրեական վարույթ։ Նշենք, որ անձի վերաբերյալ մեկ այլ՝ բռնություն գործադրելու հրապարակային կոչեր հնչեցնելու քրեական վարույթով կա կալանավորման որոշում և հայտարարված է հետախուզում»,- ասաց Ավդալյանը։

Ավելի վաղ ՔԿ-ից հայտնել էին, որ Աննա Հակոբյանի հաղորդումն ուսումնասիրման փուլում է։ ՀՀ գլխավոր դատախազությունն էլ ընթացք էր տվել նրա հրապարակմանը, որում Հակոբյանը հայտնել էր իր կյանքի նկատմամբ սպառնալիքներ զգալու մասին։

Վերջին շրջանում Աննա Հակոբյանը սոցիալական ցանցերում հրապարակումներ է տարածում՝ դատապարտելով ընտանիքում բռնությունը։ Հերթական տեսանյութում նա նշել էր, որ թեման բարձրաձայնելուց հետո իր կյանքի նկատմամբ սպառնալիքներ է զգում։

«Հուսով եմ՝ պետական մարմինները կկարողանան նման բան թույլ չտալ, որովհետև երկրի հեղինակությանը մեծ վնաս կլինի, եթե վարչապետի տիկինը բռնության զոհ դառնա»,- ասել էր Հակոբյանը՝ կանանց կոչ անելով չվախենալ և բարձրաձայնել ընտանիքում բռնության դեպքերի մասին։

Անտառային հրդեհների պատճառով Ջորջ Քլունին և նրա կինը՝ Ամալ Քլունին, ստիպված են եղել լքել Ֆրանսիայի Պրովանս-Ալպեր-Լազուր ափ երկրամասի հարավային Բրինյոլ կոմունայում գտնվող իրենց տունը․ գրում է Euronews-ը։

Քլունիներն իրենց երկու երեխաների հետ մշտական բնակություն են հաստատել Պրովանս-Ալպեր-Լազուր ափի մի փոքրիկ քաղաքում, որտեղ տուն են գնել 2021 թվականին։ Անցյալ տարի նրանք ստացել են Ֆրանսիայի քաղաքացիություն։

Բրինյոլի քաղաքապետ Դիդիե Բրեմոնին ուղղված նամակում Քլունիները նշել են, որ չգիտեն՝ արդյոք իրենց «գեղեցիկ տունը» կանգուն կմնա, թե ոչ։

«Բրինյոլից տարհանվելիս ցանկանում ենք ընդգծել երկու կարևոր բան։ Նախ՝ հույս ունենք, որ Դուք և մեր քաղաքի բնակիչներն ապահով եք, և երկրորդ՝ անկախ նրանից՝ ինչ կպատահի մեր բնակավայրի հետ, ես և Ամալը շարունակելու ենք լինել այս համայնքի մասը և մեր ներդրումն ունենալ դրա վերականգնման գործում։ Մենք սիրում ենք Բրինյոլը և այնտեղ ապրող մեր ընկերներին», – ասվում է նամակում։

Հիշեցնենք, որ անտառային հրդեհների պատճառով Ֆրանսիայի Ժիրոն շրջանում տարհանվել է գրեթե 224․000 մարդ։ Բորդոյի մերձակայքում բռնկված ամենախոշոր հրդեհը ոչնչացրել է ավելի քան 42․000 հեկտար տարածք, ինչը մոտ չորս անգամ գերազանցում է մայրաքաղաք Փարիզի տարածքը։