Category: Armbanks

ԵՐԵՎԱՆ, 9 ապրիլի․/ԱՌԿԱ/․ Հայաստանն ու Վրաստանը խորացնում են համագործակցությունը ֆինանսական տեխնոլոգիաների ոլորտում, այդ թվում՝ ակնթարթային վճարումների համակարգերի սինխրոնացման, բանկային հաշիվների բացման պարզեցման և միասնական QR-կոդերի ներդրման ոլորտում։

Այս մասին հայտարարել է Վրաստանի Ազգային բանկի ֆինանսական և վերահսկողական տեխնոլոգիաների զարգացման դեպարտամենտի պետ Վառլամ Էբանոիձեն։

Նրա խոսքով՝ Վրաստանը գտնվում է ակնթարթային վճարումների համակարգի ներդրման ավարտական փուլում, մինչդեռ Հայաստանում այն արդեն գործում է, ինչը հնարավորություններ է բացում սինխրոնացման համար։

«Սա համագործակցության առանցքային ուղղություններից մեկն է», — նախօրեին հայտարարել է Էբանոիձեն Doing Digital 2026 (DDF) ֆորումի ընթացքում։

Նա նշել է, որ ներկա պայմաններում երկրների միջև բեռնափոխադրումները տևում են մոտ մեկ օր, մինչդեռ հաշվարկները կարող են տևել 2-3 օր։ Վճարային համակարգերի սինխրոնացումը թույլ կտա զգալիորեն կրճատել այդ ժամանակը, բարձրացնել հաշվարկների արդյունավետությունը և լրացուցիչ թափ հաղորդել առևտրին։

Մեկ այլ ուղղություն կարող է դառնալ բանկային հաշիվների բացման ընթացակարգերի փոխադարձ պարզեցումը։ Խոսքը մի մեխանիզմի մասին է, որի դեպքում հաճախորդներից չի պահանջվի կրկնակի անցնել «ճանաչիր քո հաճախորդին» (KYC) ընթացակարգերի ամբողջական փաթեթը՝ մյուս երկրում հաշիվ բացելիս։

Բացի այդ, քննարկվում է վճարումների համար QR-կոդերի ունիֆիկացման հնարավորությունը։ Այս դեպքում Հայաստանի և Վրաստանի միջև անդրսահմանային գործառնությունները կկարողանան մշակվել որպես տեղական գործարքներ։

Էբանոիձեի խոսքով՝ համապատասխան խորհրդակցություններն արդեն իսկ իրականացվում են Հայաստանի Կենտրոնական բանկի հետ։

Երևանում նախօրեին մեկնարկել է Թվային տնտեսության և ֆինանսական տեխնոլոգիաների ոլորտի առաջատար միջոցառումը՝ Doing Digital 2026 (DDF) ֆորումը։

Doing Digital Forum-ը յուրաքանչյուր տարի իր օրակարգում ընդգրկում է տվյալ ժամանակահատվածի ամենակարևոր տեխնոլոգիական զարգացումները, նորարարություններն ու տնտեսական միտումները՝ ներկայացնելով դրանք իր լսարանին և ձևավորելով ապագային միտված քննարկումների միջավայր։ 2023 թվականին իր մեկնարկից ի վեր DDF-ը համախմբել է ավելի քան 60 նշանավոր խոսնակի և 3000-ից ավելի մասնակցի Հայաստանից, Միացյալ Թագավորությունից, Միացյալ Նահանգներից, ԱՄԷ-ից, Գերմանիայից, Ավստրալիայից և ԱՊՀ երկրներից։

Ֆորումի կազմակերպիչը SPRING PR ընկերությունն է։

«ԱՌԿԱ» գործակալությունը ֆորումի մեդիագործընկերն է։

ԵՐԵՎԱՆ, 8 ապրիլի ․/ԱՌԿԱ/․     IDBank-ը Լոռու մարզի Վանաձոր քաղաքում մասնակցեց Հայաստանի բանկերի միության նախաձեռնած «Լոռու մարզում բիզնեսի և բանկային համակարգի համագործակցության հնարավորությունները և հեռանկարները» թեմայով մարզային համաժողովին։

Համաժողովի նպատակն էր ներկայացնել ՀՀ առևտրային բանկերի կողմից իրականացվող բիզնեսի ֆինանսավորման գործիքները՝ ներառյալ պետական աջակցության և միջազգային ծրագրերի շրջանակում ձևավորված հնարավորությունները, ինչպես նաև քննարկել ֆինանսական հասանելիության ընդլայնման ուղիները։

IDBank-ն իր նորարար գործիքներով մշտապես փորձում է ավելի հեշտ դարձնել իր գործընկեր բիզնեսների ինչպես առաջին քայլերը, այնպես էլ հետագա զարգացումն ու գործունեությունը։

Բանկի նոր և բացառիկ ֆինանսական գործիքի՝ IDDistributor-ի մասին էլ պանելային քննարկման ընթացքում խոսեց IDBank-ի Առևտրային գործընկերների հետ հարաբերությունների վարչության ղեկավար Գրիգորի Յոլյանը՝ նշելով, որ այն միտված է հենց ՓՄՁ ոլորտի զարգացմանն անկախ գտնվելու վայրից։ Այս գործիքի միջոցով ապահովվում է ֆինանսների հասանելիություն նույնիսկ հեռավոր մարզերում գտնվող տնտեսավարողներին և նրանց ու մատակարար կազմակերպությունների միջև ձևավորում առավել կայուն, անընդհատ հարաբերություններ։

Գործիքի միջոցով մատակարարման պահին կազմակերպության առաքիչը IDDistributor հավելվածում մուտքագրում է վճարման համար անհրաժեշտ տվյալները, ձևավորում QR-կոդ, իսկ առևտրային կետը IDBusiness Mobile հավելվածով սքանավորում է այն և կատարում վճարումը ինչպես իր կազմակերպության՝ IDBank-ի հաշիվներին առկա դրամական միջոցներից, այնպես էլ նորարարական Rocket Distributor վարկային սահմանաչափով:           

«Սահմանաչափի միջոցով, օրինակ, խանութն ունենում է լրացուցիչ «գրպան», որտեղից կարողանում է վճարել մատակարարին, եթե այդ պահին ունեցած միջոցները չեն բավարարում։ Այդպիսով, խանութում անհրաժեշտ տեսականին չի պակասում, հաճախորդները որևէ ապրանքի բացակայության խնդիր չեն տեսնում և առևտրի շարունակականությունը չի խաթարվում», – ասաց Գրիգորի Յոլյանը։

Բացի այդ, գործիքը լուծում է նաև կանխիկ գումարների հավաքագրման խնդիրը, ինչը կա թե՛ Երևանում, թե՛ ավելի շատ մարզերում։ IDDistributor-ով IDBank-ը ևս մեկ քայլով նպաստում է անկանխիկ Էկոհամակարգի և թվային վճարային համակարգերի զարգացմանը։

ԲԱՆԿԸ ՎԵՐԱՀՍԿՎՈՒՄ Է ՀՀ ԿԲ ԿՈՂՄԻՑ

ԵՐԵՎԱՆ, 8 ապրիլի․/ԱՌԿԱ/․ Իրանի շուրջ տեղի ունեցող իրադարձությունները կհանգեցնեն Հայաստանում գնաճի ավելացմանը 1,2–1,7 տոկոսային կետով, և դրա համար կա երեք հիմնական պատճառ, հայտարարեց ՀՀ Կենտրոնական բանկի նախագահի տեղակալ Արմեն Նուրբեկյանը:

«Պատճառ համար մեկը, ըստ էության, նավթի գների աճն է, իսկ մենք նավթ ներկրող երկիր ենք: Պատճառ համար երկուսը ներկրման այլընտրանքային երթուղիների օգտագործման անհրաժեշտությունն է, ինչը կավելացնի ծախսերը: Եվ պատճառ համար երեքը փոխարինումն է», – ասաց նա «Միավորելով պլատֆորմներն ու տնտեսությունները» խորագրի ներքո անցկացվող Doing Digital 2026 ֆորումի ժամանակ:

Նուրբեկյանի խոսքով՝ Հայաստանը գտնվում էր բարենպաստ դիրքում՝ գնաճի մեկնարկային մակարդակի տեսանկյունից:

«Ուստի մենք հույս ունենք, որ այս իրավիճակը կհաջողվի կառավարել: Հաշվի առնելով, որ ԿԲ-ն հետևելու է իրադարձությունների զարգացմանը, դրամավարկային քաղաքականության հետագա քայլերը կախված կլինեն դրանից», – եզրափակեց նա։

Հայաստանի 2026 թվականի պետական բյուջեով գնաճն ամրագրված է 3% (±1%) մակարդակում: Ընթացիկ տարվա մարտին գնաճը կազմել է 4,5%:

ԿԲ դրամավարկային քաղաքականության ընթացիկ տարվա առաջին եռամսյակի հաշվետվության համաձայն՝ 2026 թվականի արդյունքներով Հայաստանում գնաճը սպասվում է 4,4–3,3% մակարդակում՝ կախված սցենարից (A–B), 2027 թվականին՝ 3,5–3,1%, իսկ 2028 թվականին՝ 3,2–3,1%:

«ԱՌԿԱ» գործակալությունը ֆորումի մեդիա գործընկերն է:

ԵՐԵՎԱՆ, 8 ապրիլի․/ԱՌԿԱ/․ Հայաստանի ռիսկի հավելավճարը գտնվում է պատմական նվազագույն մակարդակի վրա, հայտարարել է ՀՀ Կենտրոնական բանկի նախագահի տեղակալ Արմեն Նուրբեկյանը:

«2022 թվականից ի վեր՝ շոկից հետո, Հայաստանի ռիսկի հավելավճարը հետևողականորեն նվազել է՝ 6,5 տոկոսային կետից հասնելով մոտ 2,5 տոկոսային կետի: 2022 թվականին նկատվել էր կտրուկ թռիչք, ուստի տեղի էր ունենում յուրօրինակ նորմալացում: Սակայն նույնիսկ մինչ այդ նորմալ մակարդակը մոտ 1 տոկոսային կետով ավելի բարձր էր՝ շուրջ 250 բազիսային կետով՝ ընթացիկ մակարդակի համեմատ», – ասաց նա «Միավորելով պլատֆորմներն ու տնտեսությունները» խորագրի ներքո անցկացվող Doing Digital 2026 ֆորումի ժամանակ:

Այս կապակցությամբ Նուրբեկյանը նշեց, որ զարգացող շուկաներում նկատվող կապիտալի արտահոսքը, առնվազն մինչ օրս, Հայաստանում չի արձանագրվել, քանի որ ռիսկի հավելավճարը մնում է բավականին կայուն:

«Ինստիտուցիոնալ ներդրողները գալիս և ներդրումներ են անում դրամով անվանական արժեքով հայկական պետական պարտատոմսերի շուկայում: Սրանք ներդրողներ են, որոնք լուրջ ներդրումներ ունեն Հայաստանում», — ընդգծեց նա:

Միաժամանակ, ԿԲ նախագահի տեղակալը հավելեց, որ նրանց մասնաբաժինը զգալիորեն աճել է:

«Ըստ էության, 2021 թվականին այն զրոյական էր, իսկ հիմա կազմում է մոտ 10%», — ասաց նա։

Նուրբեկյանն ամփոփեց, որ այս պահին միջազգային ներդրումների տեսանկյունից Հայաստանն ընկալվում է որպես երկիր, որտեղ ներդրողները պատրաստ են միջոցներ ներդնել երկարաժամկետ հեռանկարում:

Մարտին ՀՀ ԿԲ նախագահ Մարտին Գալստյանը հայտարարել էր, որ Հայաստանում ռիսկի հավելավճարը վերջին մեկ տարվա ընթացքում էապես նվազել է՝ մոտ 100 բազիսային կետով, սակայն Մերձավոր Արևելքի իրադարձությունների պատճառով այնուհետև որոշակիորեն աճել է՝ 20 բազիսային կետով:

Այս տարվա հունվարին ՀՀ ֆինանսների նախարար Վահե Հովհաննիսյանը հայտնել էր հայկական եվրոպարտատոմսերի գծով ռիսկի հավելավճարի նվազման մասին՝ այն անվանելով պատմականորեն ցածր: Նրա խոսքով՝ եթե 2025 թվականի մարտին եվրոպարտատոմսերը տեղաբաշխվել էին 7,1% տոկոսադրույքով, իսկ ռիսկի հավելավճարը կազմել էր 2,86% կամ 286 բազիսային կետ, ապա 2026 թվականի հունվարին այդ ցուցանիշը նվազել է մինչև 196 բազիսային կետ կամ 1,96%:

«ԱՌԿԱ» գործակալությունը ֆորումի մեդիա գործընկերն է: