Վարչապետ Նիկոլ Փաշինյանի գլխավորությամբ տեղի է ունեցել խորհրդակցություն, որի ընթացքում քննարկվել են TRIPP նախագծի իրագործման ընթացքին վերաբերող հարցեր:
Մասնավորապես, անդրադարձ է կատարվել TRIPP զարգացման ընկերության (TDC) իրավապայմանագրային փաթեթին և առաջիկա անելիքներին, մասնավորապես՝ ներկայացվել են ընկերության կանոնադրության և բաժնետիրական համաձայնագրի նախագծի շուրջ ընթացող աշխատանքները:
Նախագծի իրականացման ուղղությամբ նման ձևաչափով քննարկումները կկրեն շարունակական բնույթ։
Ի պատասխան Գագիկ Ծառուկյանի մամուլի խոսնակ Իվետա Տոնոյանի երեկ հնչեցրած հայտարարության, թե «Երևանի «Արարատ» կոնյակի-գինու-օղու կոմբինատ»-ի տարածքում «Բարգավաճ Հայաստան» կուսակցության կողմից վարձակալվող տարածքի հետագա վարձակալության հարցը քննարկելու նպատակով մեկ ամիս որևէ մեկը չի կապվել իրենց հետ», «որևէ առաջարկ չի եղել», հարկ ենք համարում նշել, որ այս պնդումները չեն համապատասխանում իրականությանը։
Այս մասին հաղորդագրություն է տարածել կոմբինատը։
«Կոմբինատին պատկանող և նախկինում վարձակալության հանձնված տարածքների վերաբերյալ իրականացված ուսումնասիրությամբ արձանագրվել է, որ մի շարք տարածքներ վարձակալության են հանձնվել շուկայական արժեքից էականորեն ցածր պայմաններով, ինչը չի համապատասխանում Կոմբինատի տնտեսական շահերին։
Իվետա Տոնոյանը հանդիպել է Կոմբինատի ղեկավարության հետ, որի ընթացքում հստակ ներկայացվել է, որ նախ պետք է որոշվի տարածքի իրական շուկայական արժեքը, որից հետո միայն կքննարկվեն վարձակալության հետագա պայմանները։ Այս համատեքստում առավել քան տարակուսելի են հանդիպումից հետո Իվետա Տոնոյանի հրապարակայնորեն հնչեցրած ձևակերպումները, որոնք չեն արտացոլում հանդիպման ընթացքում ներկայացված ամբողջական տեղեկատվությունն ու Կոմբինատի դիրքորոշումը։
Կոմբինատի գույքը կառավարվելու է բացառապես օրենքի, շուկայական արժեքի և կազմակերպության տնտեսական շահերի հիման վրա՝ անկախ առանձին անձանց կամ շրջանակների ցանկություններից և ակնկալիքներից։ Ինչ վերաբերում է աշխատասենյակների բաշխման վերաբերյալ պնդումներին, ապա դա բացառապես կազմակերպության ներքին կառավարման գործընթացների մաս է և կարգավորվում է գործող ղեկավարության որոշումներով՝ ելնելով կազմակերպության գործունեության անհրաժեշտությունից և չի կարող պայմանավորված լինել նախկինում ձևավորված գործելակերպի պահպանման ակնկալիքներով։
Հորդորում ենք զերծ մնալ իրականությանը չհամապատասխանող և հանրությանը ապակողմնորոշող հայտարարություններ տարածելուց»,- ասվում է հաղորդագրության մեջ։
Վարչապետ Նիկոլ Փաշինյանն ընդունել է Հայաստանում Բրազիլի արտակարգ և լիազոր դեսպան Ֆաբիո Վաս Պիտալուգային, ով ավարտում է դիվանագիտական առաքելությունը մեր երկրում։
Վարչապետը կարևորել է Հայաստանի և Բրազիլի միջև հարաբերությունների զարգացումը տարբեր ոլորտներում, այդ թվում՝ քաղաքական սերտ երկխոսությունը։ Նիկոլ Փաշինյանը շնորհակալություն է հայտնել դեսպանին համագործակցության համար և հույս հայտնել, որ առաջիկայում երկկողմ փոխգործակցությունը կշարունակի ընդլայնվել և ամրապնդվել։
Վարչապետը դեսպանին մաղթել է հաջողություններ հետագա գործունեության ընթացքում։
ՀՀ քննչական կոմիտեի Lոռու մարզային քննչական վարչությունում ավարտվել է «Ստեփանավանի բժշկական կենտրոն»-ի տնօրենի կողմից առանձնապես խոշոր չափերով հափշտակության վերաբերյալ քրեական վարույթի նախաքննությունը:
Մասնավորապես՝ տնօրենը քաջատեղյակ լինելով, որ բժշկական կենտրոնը դեռևս 2021 թվականին ընկերություններից մեկից 9 մլն ՀՀ դրամ գումարով բժշկական սարքավորումներ է ձեռք բերել և չի վճարել, ՀՀ առողջապահության նախարարության կողմից բժշկական կենտրոնի կարիքների համար գումարներ փոխանցված լինելու պայմաններում, ֆինանսավորում ստացած չլինելու կեղծ պատճառաբանություններով հրաժարվել է վճարել ապրանքների արժեքը՝ հափշտակելով հիշյալ 9 մլն ՀՀ դրամը:
Բացի այդ, տնօրենը նույն ընկերության գլխավոր հաշվապահի և մի շարք աշխատակիցների հետ նախնական համաձայնությամբ, խմբի կազմում, խաբեությամբ հափշտակություն կատարելու դիտավորությամբ, 2023 թվականի հուլիս-օգոստոս ամիսներին ձևակերպել են շտապօգնության կեղծ կանչեր՝ համապատասխան գրառումներ կատարելով կանչերի գրանցման մատյաններում և շտապօգնության վարորդներին հատկացվող երթուղային թերթիկներում, ինչպես նաև պետական պատվերի շրջանակում բուժօգնությունից օգտվելու իրավունք ունեցող՝ «Ստեփանավանի բժշկական կենտրոն»-ի աշխատողների և նրանց հարազատների անվամբ կազմել են մեծահասակի հիվանդության պատմագրեր, մինչդեռ տվյալ անձինք իրականում առողջության հետ կապված խնդրով բժշկական կենտրոնին չեն դիմել և բժշկական օգնություն չեն ստացել, ինչի հետևանքով հափշտակել են ընդհանուր 16 մլն ՀՀ դրամ:
Այսպիսով, նշված հանցավոր արարքների հետևանքով ՀՀ առողջապահության նախարարությունից խաբեությամբ հափշտակվել է առանձնապես խոշոր չափերով՝ ընդհանուր 25 մլն ՀՀ դրամ գումար:
Նախաքննության ընթացքում պարզվել է նաև, որ բժշկական կենտրոնի տնօրենն առավել շահավետ պայմաններով հիփոթեքային վարկ ձևակերպելու նպատակով «Ստեփանավանի բժշկական կենտրոն»-ի գործավարի աշխատավարձը 2023 թվականի մայիսից բարձրացրել է 30 հզր ՀՀ դրամով, այնուհետև վերջինիս ընդգրկել է որպես համավարկառու՝ հափշտակելով իրեն վստահված խոշոր չափերով՝ 960 հզր ՀՀ դրամը:
Նախաքննության ընթացքում «Ստեփանավանի բժշկական կենտրոն»-ի տնօրենի նկատմամբ հարուցվել է հանրային քրեական հետապնդում՝ Քրեական օրենսգրքի 256-րդ հոդվածի 3-րդ մասի 3-րդ կետով, 2-րդ մասի 3-րդ կետով (առանձնապես խոշոր չափերով և խոշոր չափերով վստահված գույքը հափշտակելը), 255-րդ հոդվածի 3-րդ մասի 3-րդ կետով (առանձնապես խոշոր չափերով խարդախությունը) (2 դրվագ), գլխավոր հաշվապահի նկատմամբ՝ 255-րդ հոդվածի 3-րդ մասի 3-րդ կետով (առանձնապես խոշոր չափերով խարդախությունը) (2 դրվագ)։
Նրանց նկատմամբ որպես խափանման միջոց կիրառվել է բացակայելու արգելքը և պաշտոնավարման կասեցումը։
Քրեական վարույթը մեղադրական եզրակացությամբ ուղարկվել է հսկող դատախազին։
ՀՀ արդարադատության նախարարության «Սևան» քրեակատարողական հիմնարկի պահպանության ապահովման բաժնի ծառայողը սեպտեմբերի 15-ին՝ ժամը 21։50-ի սահմաններում, դիտաշտարակում հերթապահություն իրականացնելիս, ահազանգել է այն մասին, որ հիմնարկի քողարկող պատից դուրս նկատել է մարդկային շարժ։
Ահազանգից անմիջապես հետո «Սևան» քրեակատարողական հիմնարկի ծառայողներն իրականացրել են նշված հատվածի տեղազննություն, որի արդյունքում հայտնաբերել են ներնետված 2 պոլիէթիլենային շիշ՝ կպչուն ժապավենով փաթեթավորված։ Զննությամբ փաթեթներում հայտնաբերվել են բջջային հեռախոս, USB լար, բջջային հեռախոսի լիցքավորիչ և պատյան։
Դեպքի առթիվ ձեռնարկվել են համապատասխան միջոցառումներ։
Լեհաստանի վարչապետ Դոնալդ Տուսկը հայտարարել է, որ սեպտեմբերի 18-ին կայցելի Ուկրաինա, որտեղ, ի թիվս այլոց, կհանդիպի Սլովակիայի վարչապետ Ռոբերտ Ֆիցոյի հետ։ Այս մասին հայտնում է NV-ն։
Տուսկը նշել է, որ Վարշավան կշարունակի աջակցել Ռուսաստանի նկատմամբ պատժամիջոցային ճնշման ուժեղացմանը։ Տուսկն այդ հայտարարությունն արել է Վարշավայում Ավստրիայի կանցլեր Քրիստիան Ստոկերի հետ նախօրեին կայացած համատեղ մամուլի ասուլիսի ժամանակ՝ պատասխանելով Ռուսաստանի դեմ ԵՄ պատժամիջոցների 22-րդ փաթեթի նախապատրաստմանն առնչվող հարցին։
Լեհաստանի վարչապետի խոսքով՝ ԵՄ երկրները ներկայումս խորհրդակցություններ են անցկացնում սահմանափակումների նոր փաթեթի վերաբերյալ։ Նա վստահեցրել է, որ Լեհաստանը կշարունակի կառուցողականորեն մասնակցել պատժամիջոցային քաղաքականությանը և աջակցել Ուկրաինային։
«Բրատիսլավայում Վիշեգրադյան խմբի երկրների վարչապետների հետ ունեցած հանդիպումից հետո ես լավատեսորեն եմ տրամադրված պատժամիջոցների հարցում խմբի ընդհանուր դիրքորոշման կապակցությամբ։ Վաղը ես Ուկրաինայում կհանդիպեմ նաև վարչապետ Ֆիցոյի հետ, որտեղ գագաթնաժողով է ընթանում։ Ինչ վերաբերում է Ֆրանսիայի դիրքորոշմանը, ապա մտադիր եմ հարցնել նախագահ Մակրոնին՝ արդյոք մեկ անհատի շահերի պաշտպանությունն իսկապես առաջնահերթություն է Ֆրանսիայի համար։ Անձամբ ես շահագրգռված եմ լսել այդ հարցի վերաբերյալ նրա պատասխանը»,- ընդգծել է Տուսկը։
2027 թվականի հունվարի 1-ից ներդրվող արդյունքահեն վարձատրության համակարգի շնորհիվ շուրջ 20 հազար պետական և համայնքային ծառայող ու պաշտոնյա կստանա ավելի բարձր աշխատավարձ։ Վարձատրությունը կախված կլինի յուրաքանչյուր կառույցի և յուրաքանչյուր պաշտոնյայի կամ ծառայողի կատարված աշխատանքի արդյունքից։
Օրենսդրական փաթեթը, որն այսօրվա Կառավարության նիստում ներկայացրել է փոխվարչապետ Տիգրան Խաչատրյանը, բխում է Կառավարության 2026–2031 թվականների ծրագրից։ Ծրագրի նպատակներից է ստեղծել արհեստավարժ և մասնավոր հատվածի հետ մրցունակ հանրային ծառայություն։ Վարչապետ Նիկոլ Փաշինյանն այս բարեփոխումն անվանել է Կառավարության ամենաբարդ, բայց և ամենակարևոր բարեփոխումներից մեկը, որի նպատակը պետության և պետական համակարգի ուժեղացումն է։
Նոր համակարգում աշխատավարձը կազմված կլինի երեք մասից.
• պաշտոնի համար սահմանված հիմնական աշխատավարձ,
• ստաժի հավելավճար՝ ծառայության միևնույն պաշտոնային խմբում յուրաքանչյուր տարվա համար 2%, առավելագույնը՝ 30%,
• կատարած աշխատանքի արդյունքի համար տրվող լրավճար։
Նախ սահմանվում են Կառավարության ծրագրից բխող նպատակները, հետո գնահատվում է, թե որքանով է պետական մարմինը դրանց հասել, և միայն դրանից հետո՝ յուրաքանչյուր աշխատակցի ներդրումը։ Որքան բարձր է արդյունքը, այնքան մեծ է վարձատրությունը։
2025 թվականից գործող պիլոտային ծրագրում աշխատավարձի հավելաճի շեշտը ղեկավար կազմի վրա էր։ Նոր կարգավորումներն ավելի շատ են տարածվում մասնագիտական պաշտոնների վրա։ Գործադիր իշխանությունում արձանագրված լավ արդյունքները հիմք կդառնան լրացուցիչ միջոցներ հատկացնելու նաև այլ մարմիններին, այդ թվում՝ դատական իշխանությանը և տեղական ինքնակառավարման մարմիններին։
Նոր համակարգով պարգևատրումը դառնում է բացառություն. այն կտրվի միայն հատուկ առաջադրանքի կամ որակյալ աշխատանքի համար, իսկ տարեվերջին տնտեսված միջոցներից պարգևատրումներ այլևս չեն տրվի։ Օրենքով սահմանվում են նաև հավելումների վերին շեմեր։ Ծառայողը լրավճարի 10%-ը պետք է ներդնի իր կրթության և մասնագիտական զարգացման մեջ։
Բարեփոխումն իրականացնելու համար պետական բյուջեից կհատկացվի 2026 թվականի համեմատ 25 միլիարդ դրամով ավելի միջոց։
Այսօր՝ սեպտեմբերի 17-ին, առեղծվածային մահվան դեպք է տեղի ունեցել Երևանում։ Ժամը 16:50-ի սահմաններում ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Դավթաշենի բաժնում հերթական օպերատիվ տեղեկություններն են ստացվել, որ Դավթաշենի կամրջի տակ դի կա։
shamshyan.com-ի փոխանցմամբ՝ նշված վայրում համայնքային ոստիկանները հայտնաբերել են կիսաքայքայված վիճակում տղամարդու դի։
17.09.2026
Քաղաքականություն
Ձեզ մեղավոր զգո՞ւմ եք, որ այս երկու ֆրակցիաներն այստեղ նստած են՝ էդ ծավալի ընտրակաշառքից հետո. Հարությունյանը՝ Հովակիմյանին
ՆԳ նախարար Արփինե Սարգսյանը սեպտեմբերի 16-ին մասնակցել է Փրկարար ծառայության Եղեգնաձորի հրշեջ-փրկարարական ջոկատի նորակառույց վարչական շենքի բացման արարողությանը։
Ներկա էին ՀՀ-ում ԱՄՆ գործերի ժամանակավոր հավատարմատար Դեյվիդ Ալենը, ԱՄՆ Կանզաս նահանգի ազգային գվարդիայի հրամանատար Փոլ Շնայդերը, Փրկարար ծառայության տնօրեն-ՆԳ նախարարի տեղակալ Արամ Ղազարյանը, Վայոց ձորի մարզպետ Վահագն Արսենյանը, պետական և տեղական ինքնակառավարման մարմինների ներկայացուցիչներ, փրկարար ծառայողներ։
ՆԳ նախարարը կարևորել է հրշեջ-փրկարարների համար ժամանակակից և անվտանգ աշխատանքային միջավայրի ապահովումը, ինչը կնպաստի արժանապատիվ ծառայության իրականացմանը և բնակչությանն արագ ու որակյալ օգնություն ցուցաբերելուն։
Արփինե Սարգսյանն ընդգծել է, որ Փրկարար ծառայության ենթակառուցվածքների բարելավումն ու արդիականացումը ՆԳ նախարարության գերակա ուղղություններից են։ Նրա խոսքով՝ այս տարվա ընթացքում արդեն երկրորդ վարչական շենքն է հանձնվում շահագործման և այս ուղղությամբ իրականացվող աշխատանքները շարունակական բնույթ են կրում․ ներկայումս ակտիվ փուլում է Բաղրամյանի հրշեջ-փրկարարական ջոկատի նոր վարչական շենքի կառուցումը։
Հայաստանում ԱՄՆ գործերի ժամանակավոր հավատարմատար Դեյվիդ Ալենի խոսքով՝ ժամանակակից տեխնիկական միջոցներով համալրված կառույցի գործունեությունը կնպաստի արտակարգ իրավիճակներին ավելի արագ արձագանքելուն։
ԱՄՆ Կանզաս նահանգի ազգային գվարդիայի հրամանատար Փոլ Շնայդերը նշել է, որ ծառայության արդյունավետության բարձրացման տեսանկյունից աշխատանքային պայմանների պատշաճ ապահովումը էական նշանակություն ունի։
Արփինե Սարգսյանը գործընկերների հետ շրջել է տարածքում, ծանոթացել շենքային պայմաններին ու գույքային համալրվածությանը:
Նորակառույց վարչական համալիրում ստեղծված են հրշեջ-փրկարարների ծառայության արդյունավետ կազմակերպմանն ու աշխատանքային պատշաճ պայմանների ապահովմանն անհրաժեշտ բոլոր հնարավորությունները։
Նախարար Սարգսյանը նորաբաց վարչական շենքում քննարկում է ունեցել ԱՄՆ Կանզաս նահանգի ազգային գվարդիայի հրամանատար Փոլ Շնայդերի հետ, քննարկվել են համագործակցության վերաբերյալ հարցեր։ Երկուստեք պատրաստակամություն են հայտնել շարունակելու սերտ համագործակցությունը։
Եղեգնաձորի հրշեջ-փրկարարական ջոկատի նոր վարչական շենքի կառուցումն իրականացվել է ԱՄՆ ֆինանսավորմամբ։