Oգոստոսի 6-ին խոշոր հրդեհ է բռնկվել Երևանում։ Ժամը 21:10-ի սահմաններում ՀՀ Ներքին գործերի նախարարության 112 օպերատիվ կառավարման կենտրոն ահազանգ է ստացվել, որ Երևանի Սիլիկյան թաղամասում՝ ժողովրդին հայտնի 3-րդ գյուղի տարածքում գտնվող աղբավայրում, հրդեհ է բռնկվել։
Shamshyan.com-ի փոխանցմամբ՝ հրշեջները պայքարում են կրակի տարածման դեմ։
Կառավարության որոշմամբ կապահովվի պատերազմական գործողությունների հետևանքով քաղաքացիական անձանց շրջանում անհայտ կորածների ընտանիքներին սոցիալական աջակցության տրամադրման շարունակականությունը։
Ըստ այդմ՝ քաղաքացիական անձանց շրջանում անհայտ կորածների ընտանիքները ևս 3 ամիս (2026 թ. հուլիս, օգոստոս և սեպտեմբեր ամիսները) կստանան սոցիալական աջակցություն՝ 300.000 դրամի չափով, որի համար դիմում կարող են ներկայացնել մինչև 2026 թվականի սեպտեմբերի 20-ը ներառյալ:
Բոստոն կատարած աշխատանքային այցի շրջանակում ԱՄՆ-ում ՀՀ դեսպան Նարեկ Մկրտչյանը հանդիպում է ունեցել Մասաչուսեթսի տեխնոլոգիական ինստիտուտի (MIT) ակադեմիական ղեկավար, պրոֆեսոր Անանթա Չանդրակասանին՝ քննարկելու Հայաստանի հետ համատեղ ծրագրերի իրականացման և ինստիտուցիոնալ համագործակցության հաստատման հնարավորությունները։ Այս մասին հայտնում է դեսպանությունը։
Հանդիպման առանցքային թեման եղել է Հայաստանի «Ակադեմիական քաղաք» նախագծի շուրջ համագործակցության հեռանկարը։
Կողմերը քննարկել են MIT-ի փորձի և փորձագիտական ներուժի ներգրավման հնարավորությունները՝ նպաստելու նախագծի մշակման և իրականացման գործընթացին։ MIT-ի ակադեմիական ղեկավարն ընդգծել է «Ակադեմիական քաղաք» նախաձեռնության կարևորությունը և պատրաստակամություն հայտնել համագործակցել հայկական կողմի հետ։
ԵԱՏՄ միջկառավարական խորհրդի նիստում ՀՀ վարչապետ Նիկոլ Փաշինյանը ԵԱՏՄ գործընկերներին բացատրել է, թե ինչու է անհնար ԵԱՏՄ-ի և ԵՄ-ի միջև ընտրության վերաբերյալ հանրաքվե անցկացնելը։
«Մենք հասկանում ենք, որ ԵԱՏՄ-ին և ԵՄ-ին միաժամանակ անդամակցելը անհնար է, բայց այս օրենքի ընդունման փաստը (ԵՄ ձգտումների վերաբերյալ) նշանակում է, որ Հայաստանն ունի հնարավորություն դառնալու Եվրամիության անդամ։ Երևանի պատրաստակամությունը ապագայում ԵՄ-ին անդամակցելու համար ավտոմատ կերպով չի նշանակում, որ մեր երկիրը կդառնա ԵՄ անդամ։ Դրա համար դեռևս անհրաժեշտ է ԵՄ անդամների և ՀՀ քաղաքացիների համաձայնությունը։ Մյուս կողմից, անհնար է այս հարցը բարձրացնել ՀՀ քաղաքացիների ուշադրությանը առանց նախնական ինստիտուցիոնալ աշխատանքի, և նույնիսկ այդ դեպքում ԵՄ-ին անհրաժեշտ կլինի ներկայացնել ԵՄ անդամակցության պաշտոնական դիմում։ Այնուհետև անհրաժեշտ կլինի ստանալ ԵՄ անդամակցության թեկնածուի կարգավիճակ»,- ասել է վարչապետը։
Ըստ վարչապետի՝ քայլերի առնվազն մեծ մասը չկատարելու դեպքում այս հարցի վերաբերյալ հանրաքվեի անցկացումը կլինի անիմաստ և կնշանակի, որ քաղաքացիները կպատասխանեն մի հարցի, որն այժմ գոյություն չունի։
«Սա կնշանակեր, որ մենք ստիպում ենք Հայաստանի քաղաքացիներին ընտրություն կատարել այլընտրանքների միջև, որոնցից մեկը գոյություն չունի։ Սա անհարգալից կլինի ժողովրդի նկատմամբ և անօրինական։ Եվրոպական Միության հետ Հայաստանի հարաբերությունները չեն պարունակում որևէ պարտավորություն, որը հակասի ԵԱՏՄ-ում նրա կարգավիճակին։ Հայաստանը կարծում է, որ Եվրասիական տնտեսական միությունը չպետք է դիտարկվի որպես սահմանափակումների տարածք։ ԵԱՏՄ անդամ պետությունների և երրորդ երկրների միջև հարաբերությունները չպետք է ընկալվեն որպես զրոյական գումարով խաղ»,- ընդգծել է վարչապետը։
ՀՀ պետական եկամուտների կոմիտեն տեղեկատվություն է հրապարակել օգոստոսի 6-ի դրությամբ էլեկտրական շարժիչով տրանսպորտային միջոցների` մաքսատուրքի արտոնության քվոտայի մնացորդի վերաբերյալ։
«ՀՀ պետական եկամուտների կոմիտեն ներկայացնում է ԱՏԳ ԱԱ 8703 80 000 3 և 8703 80 000 5 ծածկագրերին դասվող էլեկտրաշարժիչով շարժիչային տրանսպորտային միջոցների զրո տոկոս ներմուծման մաքսատուրքի դրույքաչափի կիրառման պայմանով սակագնային արտոնության քվոտայի մնացորդը` 2026թ. օգոստոսի 6-ը ներառյալ.
1) դիլեր-դիստրիբյուտոր հանդիսացող սուբյեկտների քվոտայի մնացորդը` 1255 հատ կամ օգտագործվել է 58%-ը
2) դիլեր-դիստրիբյուտոր չհանդիսացող սուբյեկտների քվոտայի մնացորդը` 655 հատ կամ օգտագործվել է 95%-ը»,- ասվում է ՊԵԿ տեղեկատվության և հասարակայնության հետ կապերի բաժնի հաղորդագրության մեջ։
ՊԵԿ հետաքննության և օպերատիվ հետախուզության վարչությունը տնտեսական հանցագործությունների դեմ պայքարի շրջանակներում բացահայտել է շուրջ 1,3 մլրդ դրամի թաքցված հարկման օբյեկտ։
Այսպես, վարչության 12-րդ բաժին օպերատիվ տվյալներ էին ստացվել, որ Կոտայքի մարզում առևտրի կենտրոնի գործունեությամբ զբաղվող ընկերությունն առևտրի իրականացման վայրում գտնվող պահեստային տարածքները տրամադրում է վարձակալության, որոնցից գոյացած հասույթները չի արտացոլում հարկային մարմին ներկայացվող հարկային հաշվարկներում։ Նույն տվյալների համաձայն առևտրի իրականացման վայրի կազմակերպիչը վաճառատեղերի վարձավճարներից բացի յուրաքանչյուր ամիս կանխիկ եղանակով գանձում է նաև հավելյալ գումարներ, որոնք չեն փաստաթղթավորվում օրենսդրությամբ սահմանված կարգով և չեն ներառվում հարկային մարմին ներկայացվող հարկային հաշվարկներում։
Վարչության աշխատակիցները ձեռնարկել են համակողմանի և մեծածավալ օպերատիվ-հետախուզական միջոցառումներ, արդյունքում ստացված օպերատիվ տվյալները հաստատվել են:Հետազոտվել են առևտրի կենտրոնի ներքին հաշվապահական հաշվառման փաստաթղթերը և աշխատանքային համակարգիչներում առկա տեղեկատվությունը, միաժամանակ օպերատիվ հարցման են ենթարկվել առևտրի կենտրոնում գործունեություն իրականացնող մի շարք հարկ վճարողներ, որոնք հայտնել են արժեքավոր տեղեկություններ։ Ձեռք բերված ամբողջ տեղեկությունները մանրամասն վերլուծվել և ուսումնասիրվել են, այնուհետև տվյալները համադրվել են առևտրի կենտրոնի կողմից հարկային մարմին ներկայացրած համապատասխան հարկային հաշվարկներում ներառված տվյալների հետ: Պարզվել է, որ ընկերության կողմից թաքցվել է շուրջ 1,3 մլրդ դրամի հարկման օբյեկտ։ Արդյունքում չի հաշվարկվել և չի վճարվել շուրջ 492 միլիոն ՀՀ դրամի հարկեր՝ պետությանը պատճառելով առանձնապես խոշոր չափերի վնաս։
Օպերատիվ-հետախուզական միջոցառումների արդյունքում ՀՀ քրեական օրենսգրքի համապատասխան հոդվածով նախատեսված առերևույթ հանցանքի վերաբերյալ հաղորդում է ներկայացվել ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչություն, որտեղ նախաձեռնվել է քրեական վարույթ։
Ընկերությունում իրականացվող միջոցառումների ընթացքում հետաքննության և օպերատիվ հետախուզության վարչության և հարկ վճարողների ընթացիկ հսկողության հարկային տեսչություն-վարչության աշխատակիցները օպերատիվ հսկողության տակ են պահել նաև առևտրի կենտրոնում գործող խանութների ընթացիկ գործունեությունը և ուշագրավ է այն հանգամանքը, որ այդ օրերին խանութների ընդհանուր ֆիսկալ շրջանառությունը նախորդ ժամանակահատվածի համադրելի օրերի համեմատ կտրուկ ավելացել է շուրջ 110 տոկոսով։
Պետական եկամուտների կոմիտեն առևտրի կենտրոններին և դրանցում գործող հարկ վճարողներին հորդորում է զերծ մնալ հարկային մարմին ներկայացված հաշվարկ-հաշվետվություններում ակնհայտ կեղծ տվյալներ ներառելու և հարկվող օբյեկտները թերհայտարարագրելու արատավոր վարքագծից։ Հետաքննության և օպերատիվ հետախուզության վարչությունը հետևողական է լինելու նման արատավոր երևույթները կանխելու և դրանց կազմակերպիչներին բացահայտելու հարցում։
Ծանուցում. ենթադրյալ հանցանքի համար կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։
ՀՀ վարչապետ Նիկոլ Փաշինյանը և ՌԴ վարչապետ Միխայիլ Միշուստինը Եվրասիական միջկառավարական խորհրդի նիստից առաջ կարճ զրույց են ունեցել:
ԵԱՏՄ կառավարությունների ղեկավարների հանդիպումը տեղի է ունենում Ղրղզստանում՝ Չոլպոն-Ատա քաղաքում, որտեղ արդեն մեկնարկել է խորհրդի ընդլայնված կազմով նիստը:
Պատվիրակությունների ղեկավարները նիստի անցկացման վայր են ժամանել էլեկտրամոբիլներով, Միշուստինն ու Փաշինյանը նստել են միասին՝ ակտիվ զրուցելով։
ԵԱՏՄ միջկառավարական խորհրդի նիստում ՀՀ վարչապետ Նիկոլ Փաշինյանը անդամ պետություններ վարչապետերին է ներկայացրել Հայաստանի կողմից կազմակերպության բյուջե կատարված մուտքերը։ Վարչապետը ընդգծել է, որ Հայաստանը ԵԱՏՄ ընդհանուր բյուջե է մուտք արել ավելի շատ միջոցներ, քան ստացել է։
«Սա ուղիղ ապացույց է մեր պատասխանատու մոտեցմանը ԵԱՏՄ պարտավորություններին»,- ընդգծել է Փաշինյանը։
Նա նաև ներկայացրել է թվային տվյալներ, որոնք ավելի առարկայական են ընդգծել ԵԱՏՄ-ում Հայաստանի ստանձնած պարտավորությունների կատարումն ու դերը կազմակերպության շրջանում։
«2025թ.-ին Հայաստանը ԵԱՏՄ-ը ընդհանուր մաքսային բյուջե է մուտք արել շուրջ 319 մլն դոլար, այն դեպքում, երբ Հայաստանի օգտին ընդհանուր միջոցները կազմել են շուրջ 170 մլն դոլար։ Այսպես, Հայաստանը ԵԱՏՄ ընդհանուր բյուջե է մուտք արել ավելի շատ միջոցներ, քան ստացել է»,- ընդգծել է վարչապետը։
Սննդամթերքի անվտանգության տեսչական մարմնի կողմից «Թարզու Լևոն» ընկերությանը պատկանող գազավորված ըմպելիքների արտադրամասում (Գեղարքունիքի մարզ, գյուղ Ծովազարդ, ապրանքանիշը՝ «Սևան-Անուշ») իրականացված ստուգման ընթացքում պարզվել է, որ խախտվել են «Սննդամթերքի անվտանգության մասին» Մաքսային միության տեխնիկական կանոնակարգի պահանջները, մասնավորապես՝
– սննդամթերքի հետ անմիջական շփման մեջ գտնվող սարքավորումները, գործիքները, պարագաները չեն ենթարկվել պատշաճ մաքրման և ախտահանման,
– սննդի կառույցն ապահովված չի եղել անձնակազմի համար հանդերձարանով,
– սանհանգույցի դուռը բացվել է դեպի արտադրամաս:
Տեսչական մարմնի ղեկավարի որոշմամբ՝ գազավորված ըմպելիքների արտադրամասի արտադրական գործունեությունը կասեցվել է մինչև հայտնաբերված խախտումները վերացնելը: