Category: Hraparak

ԱԺ «Հայաստան» խմբակցության պատգամավոր Մեսրոպ Մանուկյանը խորհրդարանում մի շարք կոշտ քննադատություններ է հնչեցրել՝ անդրադառնալով պետական և համայնքային միջոցների ծախսման արդյունավետությանը, Երևանի տրանսպորտային համակարգում նախկինում կատարված գնումներին և իշխանության ներկայացուցիչների հայտարարություններին։

Պատգամավորը, մասնավորապես, խոսել է քաղաքապետարանի կողմից իրականացված գնումներից մեկի մասին՝ պնդելով, որ պետական միջոցների ոչ արդյունավետ օգտագործման դեպքում պատասխանատվություն պետք է կրեն համապատասխան պաշտոնատար անձինք։ Նրա խոսքով՝ եթե պետական կամ համայնքային բյուջեից որևէ գնում իրականացվել է անհամաչափ գնով կամ անհրաժեշտ քանակից պակաս ապրանք է ձեռք բերվել, ապա դրա համար պետք է հետևանքներ լինեն։

Մանուկյանն անդրադարձել է նաև Երևանի հասարակական տրանսպորտում նախկինում կիրառված 100 դրամանոցների ընդունման սարքերին։ Նրա պնդմամբ՝ այդ սարքերը քաղաքապետարանը ձեռք է բերել շուկայական արժեքից զգալիորեն բարձր գնով։

Պատգամավորը նշել է, որ իր գնահատմամբ՝ սարքերի շուկայական գինը շուրջ 40 հազար դրամ է եղել, մինչդեռ քաղաքապետարանը դրանք ձեռք է բերել մոտ 140 հազար դրամով։ Նա նաև պնդել է, որ այդ գնումների վերաբերյալ իր բարձրաձայնումներին իրավապահ մարմինների կողմից պատշաճ արձագանք չի եղել։

Մանուկյանը հարց է բարձրացրել նաև այդ սարքերի հետագա ճակատագրի վերաբերյալ։ Նրա խոսքով՝ որոշ ժամանակ անց դրանք այլևս չեն օգտագործվել, քանի որ Երևանը պատրաստվում էր անցնել միասնական վճարային համակարգի։ Այդ համատեքստում պատգամավորը կասկածի տակ է դրել նախկինում կատարված ծախսերի նպատակահարմարությունը՝ հարցնելով, թե ինչու էին նման սարքեր ձեռք բերվում մեծ քանակով, եթե նախատեսվում էր նոր վճարային համակարգի ներդրում։

Խորհրդարանական ելույթի ընթացքում Մանուկյանը անդրադարձել է նաև ՊԵԿ նախկին նախագահ Արմեն Ավետիսյանի շուրջ հնչող մեղադրանքներին։ Նա տարակուսանք է հայտնել այն հանգամանքից, որ տարբեր ժամանակներում բազմաթիվ մեղադրանքներ են հնչել, սակայն, իր խոսքով, դրանց հետևանքով համապատասխան պատասխանատվության ենթարկված անձանց հարցում իրավիճակը անհասկանալի է մնում։

Փաստաբան Հովհաննես Խուդոյանը անդրադարձել է ոստիկանական գործողությունների հետևանքով ձեռքի մատները կորցրած Եսայու նկատմամբ հարուցված քրեական հետապնդմանը՝ պնդելով, որ տուժած անձը պատշաճ վերաբերմունքի փոխարեն հայտնվել է իրավապահների ուշադրության կենտրոնում։

Լրագրողների հետ զրույցում Խուդոյանը պատմել է, որ նախընտրական քարոզարշավի ընթացքում Եսային պատահաբար հանդիպել է ԱԺ նախագահ Ալեն Սիմոնյանին և նրա ուղեկցող խմբին։ Նա ցույց է տվել վնասված ձեռքը և նշել, որ տեղի ունեցածի համար պատասխանատվություն պետք է կրել օրենքով սահմանված կարգով։

Փաստաբանի փոխանցմամբ՝ այդ ընթացքում առաջացել է հարցուպատասխան՝ արդյոք այդ խոսքերը սպառնալիք են։ Եսային, ըստ Խուդոյանի, հստակեցրել է, որ որևէ սպառնալիք չի հնչեցրել և պարզապես պահանջել է, որպեսզի իր նկատմամբ տեղի ունեցածի համար պատասխանատվություն սահմանվի իրավական կարգով։

Դրանից հետո, ըստ փաստաբանի, Եսայու բնակարանում և այլ վայրերում խուզարկություններ են իրականացվել, առգրավումներ կատարվել, իսկ նրա նկատմամբ քրեական հետապնդում է սկսվել՝ Ալեն Սիմոնյանին սպառնալիք հնչեցնելու ենթադրյալ հիմքով։

Խուդոյանի գնահատմամբ՝ ստեղծված իրավիճակում պետական կառույցների վերաբերմունքը հակասում է տուժած անձի նկատմամբ ակնկալվող մոտեցմանը։ Նրա խոսքով՝ այն մարդը, որն իր առողջությանը ծանր վնաս է հասցրել ոստիկանական գործողությունների հետևանքով, պետք է ստանար առավել մեծ ուշադրություն և պաշտպանություն, այլ ոչ թե հայտնվեր քրեական հետապնդման ներքո։

Փաստաբանը պնդել է, որ իր պաշտպանյալի խոսքը ոչ թե սպառնալիք, այլ իր նկատմամբ հասցված վնասի համար օրենքով սահմանված կարգով պատասխանատվություն պահանջելու ձևակերպում է եղել։

«Այո, ոստիկանության գործողությունների հետևանքով ձեռքի մատները կորցրած Եսայուն մեղադրանք են առաջադրել՝ Ալեն Սիմոնյանին իբրև սպառնալու համար»,- նշել է փաստաբանը։

Բագրատ Սրբազանն անդրադարձել է Ազգային ժողովում ընդդիմության գործունեությանը՝ ընդգծելով, որ անհրաժեշտ է աջակցել խորհրդարանական ընդդիմությանը։

Ասուլիսի ժամանակ նա ընդդիմադիր պատգամավորներին հորդորել է ավելի ակտիվ գործել և քաղաքական պայքարում պահպանել բարեկրթության սկզբունքը։ Նրա գնահատմամբ՝ ընդդիմության ներկայացուցիչները պետք է ոչ թե սահմանափակվեն հայտարարություններով, այլ իրենց գործողություններով ցույց տան, թե ինչպես են պատկերացնում արդյունավետ քաղաքական գործունեությունը։

Միաժամանակ Սրբազանը քննադատել է իշխանական խմբակցության ներկայացուցիչների հայտարարությունները՝ դրանք բնութագրելով որպես կեղծ և իրականությանը չհամապատասխանող։

Նա հատկապես անընդունելի է համարել խորհրդարանի ամբիոնից հոգևորականների հասցեին հնչող վիրավորական համեմատությունները։ Սրբազանի խոսքով՝ նման արտահայտությունների պայմաններում դժվար է խոսել քաղաքական բարեկրթության կամ բարոյական նորմերի պահպանման մասին։

Բագրատ Սրբազանը նշել է, որ այս իրավիճակում անհրաժեշտ է համախմբվել և աջակցել Ազգային ժողովում գործող ընդդիմադիր ուժերին։

«Հրապարակի» զրուցակիցը Խոսքի ազատության պաշտպանության կոմիտեի նախագահ Աշոտ Մելիքյանն է:

– Հեռուստատեսության եւ ռադիոյի հանձնաժողովը շաբաթներ առաջ տուգանել էր «Կենտրոն» հեռուստաընկերությանն այն բանի համար, որ հեռուստաընկերությունը լրատվական թողարկման 25 տոկոսը տրամադրել է Գագիկ Ծառուկյանի դեմ հարուցված քրեական վարույթին, դրանով խախտելով օրենքը, որով համաչափության պահանջ է դրված տեսալսողական մեդիայի նկատմամբ: Հանձնաժողովը հուլիսի 8-10-ն իրականացրել է «ՄՈՒԼՏԻ ՄԵԴԻԱ-ԿԵՆՏՐՈՆ ԹԻՎԻ» ՓԲԸ «ԿԵՆՏՐՈՆ» տեսալսողական ծրագրի հուլիսի 6-8-ն ընկած ժամանակահատվածի տեսագրությունների մշտադիտարկում, որի արդյունքում «արձանագրվել է», որ լրատվական «նույն թեմայի վերաբերյալ լուսաբանումը գերազանցել է հաղորդման եթերաժամի 25 տոկոսը»։ Զավեշտալի է եւ տարակուսելի, որ նույն հանձնաժողովը չի անդրադառնում մեր հարկերից սնվող Հանրային հեռուստաընկերությանը, մշտադիտարկում չի իրականացնում, չի պատժում, չի արձանագրում, որ մեր հարկերից սնվող Հանրայինը դարձել է իշխող քաղաքական ուժի խոսափողն ու սպասարկողը: Հանրայինի հասարակական-քաղաքական հաղորդաշարերը գրեթե ամբողջությամբ զբաղված են իշխանական քարոզչությամբ, ի՞նչ 25 կամ 45 տոկոսի մասին կարող է խոսք լինել: Դա էլ քիչ է, Հ1-ը զբաղված է Նիկոլ Փաշինյանի քաղաքական հակառակորդներին, ընդդիմադիրներին սեւացնելու գործով: Ի՞նչ գնահատական կտաք այս ամենին: Ի՞նչ եք կարծում` օբյեկտի՞վ է այս ամենը:

– Ես որեւէ հիմք չունեմ՝ հաստատելու կամ հերքելու այն տվյալները, որոնց հիման վրա որոշում է կայացրել ՀՌՀ-ն, բայց եթե ելնեմ իմ դիտարկումներից կամ իմ ղեկավարած կազմակերպության դիտարկումից, ապա պետք է ասեմ, որ Հայաստանում լրատվական դաշտը խիստ բեւեռացված է, եւ կողմնակալ լուսաբանումները, այս կամ այն ուժին սատարելը, ցավոք, դարձել են նորմալ: Լրատվամիջոցների մեծ մասը կա՛մ սերտաճել է ինչ-որ քաղաքական ուժի հետ, կա՛մ ասոցացվում է որեւէ ուժի հետ: Այս պայմաններում ես չեմ զարմանում, որ ցանկացած լրատվամիջոց ավելի շատ ուշադրություն է դարձնում այն քաղաքական ուժին, որի կողմից ֆինանսավորվում է: Բնականաբար, այս երեւույթը բնորոշ է նաեւ հեռարձակման ոլորտին, եւ որեւէ մեկի համար ՀՌՀ-ի եզրակացությունը նորություն չպետք է լինի: Հասկանալի է, որ «Կենտրոն» հեռուստաընկերության սեփականատերը Գագիկ Ծառուկյանն է, եւ այդ հեռուստատեսությունն ավելի շատ սպասարկում է Ծառուկյանի քաղաքական, ֆինանսական շահերը, քան հանրային շահը: Նույն բանը կարող եմ ասել նաեւ «Հինգերորդ ալիք»-ի մասին, որը սպասարկում է «Հայաստան» դաշինքի շահը, նույնը կարող ենք ասել «Երկիր մեդիա»-ի մասին, որը պրոդաշնակցական հեռուստաալիք է, «Ֆրի նյուզ»-ի մասին կարող ենք նույն բանն ասել, որը իշխանական է, եւ, իհարկե, նույնը կարելի է ասել Հանրային հեռուստաընկերության մասին, որը բոլոր իշխանությունների ժամանակ սպասարկել է այդ ժամանակվա իշխանության շահերը: Այսօր թեպետ ասում են, որ Հանրայինի դռները բաց են բոլոր ընդդիմադիր ուժերի առաջ եւ այլն, սակայն ակնհայտորեն իրենց բոլոր հրապարակումները պրոիշխանական են:

– Բայց չէ՞ որ մասնավորի եւ Հանրայինի միջեւ կա մեծ տարբերություն, այնպես, ինչպես լրատվական գործունեություն իրականացնող այլ միավորների, օրինակ` կայքերի եւ թիվիների մեջ է մեծ տարբերությունը: Մասնավորն ունի սեփականատեր, իսկ Հանրայինը հանրության հարկերից է ֆինանսավորվում եւ պարտավոր է հանրային շահը սպասարկել:

– Այս պարագայում խնդիր է առաջանում, որ ՀՌՀ-ն նկատել է միայն «Կենտրոն» հեռուստաընկերության բացը, եթե օբյեկտիվ մոնիտորինգ իրականացվի, անհնար է, որ չնկատեն, թե մյուս հեռուստաալիքները որ ուժերի քաղաքական շահերն են սպասարկում: Այստեղ ինչ-որ տեղ, իհարկե, քաղաքական կոնյունկտուրայի հետ հաշվի նստելու տպավորություն է ստեղծվում: Երբ Գագիկ Ծառուկյանի դեմ գործ հարուցվեց, ՀՌՀ-ն սեւեռվեց «Կենտրոն»-ի վրա: Այստեղ հարցեր են առաջանում` ինչո՞ւ է ոչ բալանսավորված լուսաբանումը բացառապես «Կենտրոն» հեռուստաընկերության պարագայում նկատվել: Եթե խնդրին մոտենանք օբյեկտիվորեն, ապա գրեթե բոլոր մասնավոր հեռուստաընկերություններում, ինչպես նաեւ Հանրայինում, կգտնենք նման խնդիրներ:

– Ի դեպ, Հանրայինն ունի կարմիր լոգոտիպով երկրորդ հեռուստաալիքը, որը փոխարինեց «Շողակաթ» հեռուստաընկերությանը` պետական բյուջեից ֆինանսավորման իմաստով: Այստեղ իրավիճակն ավելի սարսափելի է, եթե դասական Հ1-ը գոնե ժամանցային, մշակութային հաղորդումներ ունի, որոնց ժամանակ իշխանության մասին չի խոսվում, ապա այստեղ իրավիճակն ավելի վատ է` գրեթե 24 ժամ իշխանության գովքն է, ու վերջ:

– Այնքան էլ համաձայն չեմ, այնտեղ էլ կան հաղորդումներ, որոնք չունեն հասարակական, քաղաքական նշանակություն: Պետք է հստակ մոնիտորինգ անցկացնել, այնուամենայնիվ, որ Հանրային հեռուստաընկերությունն իշխանական է, դրանում ոչ մեկը չունի կասկած եւ չի կարող հերքել:

ՀԳ․ Մեր տեղեկություններով, այս հարցերը բարձրացվել են նաեւ ՀՌՀ նախագահի` Տիգրան Հակոբյանի մոտ, որն արդարացել է, թե ինքը մի քանի անգամ բանավոր զգուշացում արել է Հ1-ի ղեկավարությանը:

Հայաստանում առաջիկա օրերին օդի ջերմաստիճանը զգալիորեն կբարձրանա։ Կանխատեսումների համաձայն՝ օգոստոսի 24-ը կարող է դառնալ 2026 թվականի ամենաշոգ օրը։

«Հիդրոօդերևութաբանության և մոնիթորինգի կենտրոնի» տնօրեն Լևոն Ազիզյանի փոխանցմամբ՝ հատկապես հովտային գոտիներում շոգը կուժգնանա, և օդի առավելագույն ջերմաստիճանը կարող է հասնել +38…+40 աստիճանի։

Այսպիսով, առաջիկա օրերին հանրապետության մի շարք շրջաններում սպասվում է ամառային շոգի հերթական ալիք, իսկ օգոստոսի 24-ին ջերմաստիճանը կարող է հասնել տարվա առավելագույն ցուցանիշներին։