Category: Mamul.am

Իրանագետ Վարդան Ոսկանյանիֆեյսբուքյան գրառումը․ «Իրանի շուրջ զարգացումներում, ըստ էության, «լճացած» իրավիճակ է։

Հռետորաբանական մակարդակում տարբեր հայտարարություններ են հնչում թե՛ Թեհրանից, թե՛ Վաշինգտոնից, սակայն արտաքուստ որևէ նոր զարգացում չկա։

Տարբեր տեղեկատվական արտահոսքերից պարզ են դարձել կողմերի միջև Իսլամաբադում անցկացված բանակցությունների որոշ մանրամասներ, ըստ որոնց՝ միջուկային ծրագրի շուրջ անհամաձայնությունը եղել է ժամկետների վերաբերյալ. Իրանը պատրաստ է եղել 5 տարով դադարեցնել ուրանի հարստացումը, մինչդեռ ԱՄՆ -ի առաջարկը եղել է 20 տարի։

Իրանական կողմը չի համաձայնել նաև որևէ երրորդ կողմի փոխանցել արդեն իսկ 60 տոկոսով հարստացված ուրանի իր պաշարը, սակայն համաձայն է եղել նվազեցնել դրա հարստացման աստիճանը, ինչը ընդունելի չի եղել ամերիկյան կողմի համար։

Ամենայն հավանականությամբ, ԱՄՆ-ը նաև առաջարկել է համատեղ կառավարել Հորմուզի նեղուցը, որից հրաժարվել է Իրանը՝ պնդելով, որ այն իրանական շահերի գոտի է»։

Իսրայելի և Լիբանանի առաջնորդներն այսօր բանակցություններ կվարեն, հայտարարել է ԱՄՆ նախագահ Դոնալդ Թրամփը։

«Մենք փորձում ենք մի փոքր «շնչառության տարածք» ստեղծել Իսրայելի և Լիբանանի միջև։ Երկու առաջնորդների զրույցից անցել է երկար ժամանակ՝ մոտ 34 տարի», – գրել է Թրամփը TruthSocial սոցիալական ցանցում։

Նշենք, որ Իսրայելի և Լիբանանի միջև հակամարտության սրումը սկսվել է մարտի 2-ին՝ Իսրայելի և Միացյալ Նահանգների կողմից Իրանի վրա հարձակումների ֆոնին։

«Փաստ» օրաթերթը գրում է. «Երբ մեկուկես ամիս առաջ Փաշինյանն սկսեց իր ավտոբուսային «սննդաերթերը», դա իշխանական քարոզչությունը փաթեթավորեց որպես ՔՊ ներկուսակցական ընտրությունների հետ կապված քարոզարշավ: Դա, իհարկե, այդպես չէր, քանի որ թե՛ այցերը, թե՛ շփումները զուտ ներկուսակցական չէին: Բայց համարենք, որ այդ «պատճառաբանությունը» ինչ-որ տեղ կարող էր «կյանքի իրավունք» ունենալ:

Բայց հիմա, երբ ՔՊ-ի «ներկուսակցական ընտրությունները» տեղի են ունեցել ու ավարտվել են, ի՞նչ փաթեթավորմամբ են քպականները ավտոբուսով ընկել դռնեդուռ:

Եթե Փաշինյանը որպես վարչապետ է գնում, կարող է մի քանի պաշտոնյա հետը վերցնել և գնալ իր աշխատանքային պարտականությունները կատարելու, այսպես ասած՝ «աշխատանքային այցով»: Ընդ որում, ոչ թե փողոցները «չափչփելով», այլ աշխատանքային խորհրդակցություններով, կոնկրետ կազմակերպություններ այցերով (ասենք՝ ջրի ծորակներ ստուգելով), ինչպես Կոտայքի մարզ կատարած այցը: Բայց այդ դեպքում նա պետք է դա անի աշխատանքային օրերին: Եթե զուտ որպես կուսակցական այց է, ապա դա ցանկացած կուսակցության իրավունքն է: Սակայն ինչո՞ւ է ողջ իրավապահ համակարգը սպասարկում, ինչո՞ւ են ահռելի թվով ոստիկաններ ուղեկցում, որոնց տեղափոխող մի ավտոբուսն էլ հերթական մահաբեր վթարի պատճառ է դառնում, ինչո՞ւ է ողջ վարչական ռեսուրսը ոտքի հանվում, վերջապես՝ ինչո՞ւ է Փաշինյանն ասում. «Մեր նախընտրական ծրագրում գրված է…»:

Մի րոպե: Ի՞նչ նախընտրական ծրագիր: ՔՊ-ն, որպես ընտրությանը մասնակցող ուժ, դեռ անգամ գրանցված չէ ԿԸՀ-ում (երեկ նոր փաստաթղթերը հանձնել են): Ու ընդհանրապես, երկու օր առաջ է միայն սկսվել ԿԸՀ փաստաթղթեր ներկայացնելու գործընթացը: Ավելին, քարոզարշավն էլ դեռ չի էլ սկսվել, մոտ 23 օր կա: Այդ ի՞նչ նախընտրական ծրագիր են ներկայացնում:

Պատահական չէ, որ թե՛ քաղաքական գործիչները, թե՛ իրավաբանները նշում են, որ սա ընտրության արդար մրցակցության սկզբունքի կոպիտ խախտում է»:

«Ժողովուրդ» օրաթերթը ստացել է ՀՀ Ներքին գործերի նախարարության Միգրացիայի և քաղաքացիության ծառայության պաշտոնական գրությունը, որտեղ ներկայացված է 2026 թվականի հունիսի 7-ին կայանալիք ընտրությունների ընտրողների թվի վերաբերյալ տեղեկությունը։

Պաշտոնական փաստաթղթում նշվում է, որ «Հայաստանի Հանրապետության Ազգային ժողովի 2026թ. հունիսի 7-ին կայանալիք ընտրությունների ընտրողների թվի վերաբերյալ տեղեկանքն ըստ մարզերի և Երևան քաղաքի վարչական շրջանների» կցվում է գրությանը։

Ըստ այդ տեղեկանքի՝ ընտրողների ընդհանուր թիվը կազմում է 2 489 031։

Մարզերով պատկերն այսպիսին է.
     • Արագածոտն — 113 302
     • Արարատ — 220 058
     • Արմավիր — 224 696
     • Գեղարքունիք — 178 402
     • Լոռի — 213 703
     • Կոտայք — 238 979
     • Շիրակ — 209 519
     • Սյունիք — 101 648
     • Վայոց ձոր — 43 751
     • Տավուշ — 101 695

Երևանում ընտրողների թիվը բաշխված է այսպես.
     • Կենտրոն — 95 393
     • Քանաքեռ-Զեյթուն — 57 937
     • Էրեբունի — 91 130
     • Նուբարաշեն — 8 539
     • Նորք-Մարաշ — 10 916
     • Ավան — 39 919
     • Արաբկիր — 95 763
     • Դավթաշեն — 35 028
     • Աջափնյակ — 85 354
     • Մալաթիա-Սեբաստիա — 109 785
     • Շենգավիթ — 113 456
     • Նոր Նորք — 100 058

Այսպիսով, հունիսի 7-ի ընտրություններին ընդառաջ ամենամեծ ընտրազանգվածն ունի Կոտայքի մարզը՝ 238 979 ընտրողով, իսկ Երևանում ամենամեծ թվերը գրանցված են Շենգավիթում՝ 113 456, Մալաթիա-Սեբաստիայում՝ 109 785 և Նոր Նորքում՝ 100 058։

Անցած տարվա հոկտեմբերին ԿԳՄՍ նախարար Ժաննա Անդրեասյանն անակնկալ կերպով աշխատանքից ազատել էր մասնագիտական կրթության եւ ուսուցման վարչության պետ «Հրապարակ»-ը գրում է․ «Արմենուհի Պողոսյանին եւ մասնագիտական կրթության եւ ուսուցման համակարգման բաժնի պետ Կարեն Մանուկյանին:

Պատճառն ինչ-որ քոլեջի ուսանողի, իբրև, սխալ ֆինանսավորումն էր եղել, չնայած նախարարությունում վստահ էին, որ նախարարը, ըստ համակարգի աղբյուրների, փորձել էր ազատվել ոչ այնքան յուրային կադրերից։

ԿԳՄՍ նախարար Ժաննա Անդրեասյանի հրամանն անվավեր ճանաչելու պահանջով նախկին պաշտոնյաները դիմել էին դատարան։ Երեկ տեղեկացանք, որ երկուսն էլ հաղթել են դատարանում»:

Ազատ շաքարների չափից շատ օգտագործումը հանգեցնում է ավելորդ քաշի և ճարպակալման, մեծացնելով դրա հետ կապված ոչ վարակիչ հիվանդությունների` սրտանոթային հիվանդություններ, 2-րդ տիպի շաքարային դիաբետի և որոշ տեսակի քաղցկեղների առաջացման ռիսկը:
     Որո՞նք են ազատ շաքարները
     ● Արտադրողների, խոհարարների կամ սպառողների կողմից սննդամթերքներին և ըմպելիքներին ավելացված շաքարներ:
     ● Մեղրում, օշարակներում, մրգահյութերում և մրգահյութի խտանյութերում առկա բնական շաքարներ:
     Առողջապահության համաշխարհային կազմակերպության տվյալներով՝
     ✔ Շաքարները տալիս են էներգիա (1 գ = 4 կկալ), սակայն համարվում են ոչ անհրաժեշտ սննդանյութեր
     ✔ 2 տարեկանից փոքր երեխաներին խորհուրդ է տրվում խուսափել շաքար պարունակող սննդամթերք և ըմպելիքներ տրամադրելուց:
     ✔ 2 տարեկան և ավելի բարձր տարիքի երեխաները, դեռահասները և մեծահասակները պետք է սահմանափակեն ազատ շաքարների օգտագործումը՝ օրական էներգիայի ընդունման 10%-ից պակաս (50 գրամ կամ շուրջ12 թեյի գդալ՝ օրական շուրջ 2000 կկալ օգտագործող և նորմալ մարմնի քաշ ունեցող անձի համար)։
     Այսօր օգտագործվող շաքարի զգալի մասը «թաքնված» է վերամշակված մթերքներում, որոնք սովորաբար չեն ընկալվում որպես քաղցրավենիք։ Օրինակ՝ կետչուպի 1 ճաշի գդալը պարունակում է մոտ 4 գրամ (մոտ 1 թեյի գդալ) ազատ շաքարներ։ Շաքարով քաղցրացված գազավորված ըմպելիքի մեկ շիշը կարող է պարունակել 40 և ավելի գրամ (գրեթե 10 թեյի գդալ) ազատ շաքարներ։
     Ինչպե՞ս նվազեցնել շաքարի օգտագործումը
     ● Սահմանափակեք բարձր շաքար պարունակող սննդամթերքի և ըմպելիքների օգտագործումը (օրինակ՝ քաղցրացված ըմպելիքներ, քաղցրավենիք):
     ● Քաղցր նախուտեստները փոխարինեք թարմ մրգերով և հում բանջարեղենով:
     Հայաստանում նկատվում է, որ երեխաների շրջանում ֆիզիկական ակտիվությունը տարիքին զուգընթաց նվազում է, միաժամանակ աճում է քաղցրավենիքի օգտագործումը, իսկ ավելորդ քաշն ու գիրությունը շարունակում են մնալ տարածված խնդիր։

ՀՀԿ խորհրդի անդամ Հայկ Դերզյանի ֆեյսբուքյան գրառումը․ «1384 թվականին Լեհաստանի գահ բարձրացավ Յադվիգա Անժուացին (Jadwiga of Anjou)։ Այդ ժամանակ երկրում ընդունված էր, որ պետության ղեկավարն ունի միայն «թագավոր» (rex) տիտղոսը, և «թագուհի» հասկացությունը, որպես ինքնուրույն իշխան, պարզապես կիրառված չէր։ Միևնույն ժամանակ, որևէ տեղ հստակ չէր սահմանվում, որ այդ տիտղոսը պարտադիր պետք է կրի տղամարդ։
     Արդյունքում Յադվիգան թագադրվեց որպես Լեհաստանի «թագավոր»՝ ամբողջական իշխանությամբ։
     Այս օրինակը ցույց է տալիս, որ նույնիսկ ամենաբարդ իրավիճակներում, երբ թվում է՝ կանոններն այլ ելք չեն թողնում, իրականում լուծումը միշտ հնարավոր է գտնել։
     Այսօր էլ, երբ թե՛ աշխարհում, թե՛ մեր երկրում հաճախ տիրում է անորոշություն, կարևոր է հասկանալ՝ փակուղիներ չկան։ Ելքը միշտ կա»։

Քաղաքագետ Աղասի Ենոքյանը ֆեյսբուքյան իր էջում գրում է․ «Երկրորդ-երրորդ աղբյուրներից տեղեկատվություն է տարածվում, թե Կրեմլը պատրաստվում է փոխել Ռուսաստանի հայերի միության նախագահին եւ այդ պաշտոնում նշանակել Ռոբերտ Քոչարյանի նախկին մամլո խոսնակ Վիկտոր Սողոմոնյանին։
     Ներկա նախագահ Արա Աբրահամյանը Ռուսաստանում հզոր հայկական համայնքի առկայության հանգամանքում արել էր նվազագույնը, եթե չասենք` ոչինչ, այդ համայնքը գոյությունը ցույց տալու համար։ Ակնհայտ է, որ Վիկտորը նախանձախնդրությամբ է լծված համայնքը քաղաքական գործոն դարձնելու հարցում։
     Հիմա չեմ ուզում քննարկել, թե ինչ ուղղությամբ նա կտանի այդ համայնքը, իրեն անձամբ չեմ ճանաչում, մեկ-երկու անգամ բավական անբարետես հանգամանքներում հանդիպել եմ հորը, ով նախկինում կոմկուսի շրջկոմի աշխատակից էր։ Ավելին, այդ համայնքի գործունեությունն առաջին հերթին կախված է Կրեմլից, երկրորդ հերթին՝ ռուսաստանցի հայ օլիգարխներից։ Համայնքի ղեկավարի նպատակները երրորդական են։
     Այդ երիտասարդի գործունեության մասին մամուլն այժմ հեղեղված է հրապարակումներով, եւ նրանք այն մասին են, որ Վիկտորն իր պաշտոնը ստանալու համար, ցույց տալու համար, որ ինքը Հայաստանի քաղաքական կյանքում կարող ուժ է, փուռը տվեց Ռոբերտ Քոչարյանին եւ ՀՅ Դաշնակցությանը։
     Մեծ դժվարությամբ, բայց այնուամենայնիվ, ժողովուրդը կարող է մարսել այս երկու պատմական արժեքների փոշիացումը։ Սակայն ողբերգությունն այն է, որ այս երիտասարդի հասարակական-քաղաքական պուճուր ամբիցիաների եւ մանիպուլյացիաների պատճառով կարող է Նիկոլը պահպանել իշխանությունը, կարող է փուռը նետվել նաեւ Հայաստանի Հանրապետության տասնամյակների գոյությունը, հայ ժողովրդի բազմահազարամյա ապագան»։