Category: News.am

Հայաստանի Հանրապետության գլխավոր դատախազ Աննա Վարդապետյանն այսօր Կառավարության նիստում անդրադարձել է նիստի օրակարգում ներառված՝ Կոտայքի մարզի Նոր Հաճն համայնքի Քանաքեռավան գյուղի շուրջ 20.6 հա մակերեսով, 323 միլիոն 800 հազար դրամ միջին շուկայական արժեքով գույքը Տարածքային կառավարման և ենթակառուցվածքների նախարարության պետական գույքի կառավարման կոմիտեին ամրացնելու նախապատմությանը։

Աննա Վարդապետյանը տեղեկացրել է, որ 20.6 հա մակերեսով անշարժ գույքի նկատմամբ Հայաստանի Հանրապետության սեփականության իրավունքը գրանցվել է 2026 թվականի ապրիլի 26-ին: Այն պետությանն է վերադարձվել Գլխավոր դատախազության՝ ապօրինի ծագում ունեցող գույքի բռնագանձման լիազորության շրջանակում՝ դատարանի կողմից հաստատված՝ հաշտության համաձայնության արդյունքում:

«Դատախազությունը 2023 թվականի օգոստոսի 29-ին ապօրինի ծագում ունեցող գույքի բռնագանձման հայցադիմում էր ներկայացրել Հակակոռուպցիոն դատարան՝ ընդդեմ Կոտայքի մարզի Աբովյան համայնքի նախկին ղեկավար Կարապետ Գուլոյանի օգնական Մանուկ Հակոբյանի և նրա կնոջ: 2026 թվականի փետրվարի 27-ին Դատախազությունը Մանուկ Հակոբյանի և նրա կնոջ հետ կնքել է հաշտության համաձայնություն, որով հայցապահանջում ներառված՝ 323 միլիոն 800 հազար դրամ միջին շուկայական արժեքով Կոտայքի մարզի Նոր Հաճն համայնքի Քանաքեռավան գյուղի շուրջ 20.6 հա մակերեսով անշարժ գույքը հանձնվել է Հայաստանի Հանրապետության սեփականությանը: Հաշտության համաձայնությունը դատարանի 2026 թվականի մարտի 5-ին վճռով հաստատվել է:Դատախազության՝ այս հայցապահանջում ներառված մյուս գույքերի բռնագանձման պահանջի մասով քաղաքացիական գործի քննությունը շարունակվում է»,- նշել է ՀՀ գլխավոր դատախազն ու անդրադարձել նաև Աբովյան համայնքի նախկին ղեկավար Կարապետ Գուլոյանի՝ ապօրինի ծագում ունեցող գույքի բռնագանձման գործով օրինական ուժի մեջ մտած վճռին:

«Կարապետ Գուլոյանի և նրա հետ փոխկապակցված անձանց մասով առկա է նաև Դատարանի՝ ապօրինի ծագում ունեցող գույքի բռնագանձման գործով 2026 թվականի ապրիլի 15-ին օրինական ուժի մեջ մտած վճիռ: Վճռով Աբովյան համայնքի նախկին ղեկավար Կարապետ Մուրադի Գուլոյանից և նրա կնոջից՝ Ռոզա Գագիկի Ծառուկյանից՝ որպես ապօրինի ծագում ունեցող գույքեր, ենթակա են բռնագանձման՝

·         Կոտայքի մարզի Առինջ գյուղի Պ. Սևակ թաղամասի 14-րդ փողոցի թիվ 8 հասցեի անշարժ գույքի՝ ապօրինի ճանաչված մասը՝ անշարժ գույքի շուրջ 90%-ը (գույքի նկատմամբ Հայաստանի Հանրապետության սեփականության իրավունքի գրանցումն ընթացքի մեջ է).

·         Կոտայքի մարզի Ծաղկաձոր համայնքի Տանձաղբյուր փողոցի 29/2 հողամասն՝ ամբողջությամբ (գույքի նկատմամբ Հայաստանի Հանրապետության սեփականության իրավունքի գրանցումն ընթացքի մեջ է).

·         «ԱԿԲԱ ԲԱՆԿ» ԲԲ ընկերության 2.000 հատ բաժնետոմս (Պետական գույքի կառավարման կոմիտեն պաշտոնապես՝ գրավոր, տեղեկացվել է՝ բաժնետոմսերի նկատմամբ ՀՀ սեփականության իրավունքը գրանցելու նպատակով).

·         2021 թվականին «Բելգլաս» ՍՊԸ-ին տրամադրված 294 հազար 900 ԱՄՆ դոլար փոխառության չվերադարձված մասի՝ 264 հազար ԱՄՆ դոլարի պահանջի իրավունքը.

·         1 միլիարդ 227 միլիոն 490 հազար դրամ՝ որպես Կարապետ Գուլոյանի օրինական եկամուտներով չհիմնավորվող ծախս.

·         58 միլիոն 120 հազար դրամ՝ որպես ապօրինի եկամտի մնացորդ, որը հանդիսանում է ապօրինի ծագում ունեցող գույքերի վերափոխման կամ օգտագործման արդյունքում առաջացած գումար.

·         934 հազար դրամ՝ որպես «ԷԼԵԿՏՐԱՄՈՆՏԱԺ» ԲԲ ընկերության` 2019 թվականին ձեռք բերված 267 բաժնետոմսերի արժեք:

  Գլխավոր դատախազ Աննա Վարդապետյանը նաև հիշեցրել է Կարապետ Գուլոյանի վերաբերյալ 2025 թվականին մեղադրական եզրակացությամբ դատարան հանձնված քրեական գործի մասին, համաձայն որի՝ Կարապետ Գուլոյանը, չարաշահելով իր լիազորությունները, Աբովյանի քաղաքապետարանի այլ պաշտոնատար անձանց կամ այլ քաղաքացիների օժանդակությամբ, ընդհանուր՝ 65 դրվագով Աբովյան համայնքի զբոսայգիների, պուրակների և փողոցների տարածքներում գտնվող հողերն ուղղակի վաճառքով կամ կեղծ աճուրդների միջոցով տարբեր անձանց է օտարել (այդ թվում՝ 2 դեպքով, պաշտոնեական դիրքն օգտագործելով, իր հետ փոխկապակցված անձանց հետ նախնական համաձայնությամբ, հանցավոր գործունեության հետևանքով ստացված, առանձնապես խոշոր չափերով գույքն օրինականացրել է:

Հայաստանի իշխանությունները խախտել են Ռուսաստանի դեմ քայլեր չձեռնարկելու խոստումը։ Այս մասին լրագրողներին ճեպազրույցում հայտարարել է Ռուսաստանի ԱԳՆ ներկայացուցիչ Մարիա Զախարովան։

«Հայաստանի ղեկավարությունը…, և նա, ի դեպ, Մոսկվա վերջին այցելությունների ընթացքում հավաստիացրել էր, որ Ռուսաստանի դեմ որևէ քայլ չի ձեռնարկի։ Եթե երաշխիքների հարցում այսպիսին է իրավիճակը, ապա նշանակում է՝ ոչ միայն Մոսկվայում և ոչ միայն Ռուսաստանի քաղաքացիների հետ է Հայաստանի ղեկավարությունն իրեն այդպես պահում՝ չպահելով իր խոստումները», — ասել է նա։

Ռուսաստանի հասարակությունը վրդովմունքով արձանագրել և հիշել է, որ Հայաստանը հարթակ է տրամադրել ահաբեկիչ Վլադիմիր Զելենսկուն, նշել է Զախարովան։

«Ռուսաստանի հասարակության մեջ խոր վրդովմունքով, անհասկացողությամբ, ոչ միայն տեսան, այլև հատկապես հիշեցին այն փաստը, որ Հայաստանը, որին մենք սովոր ենք համարել բարեկամ, եղբայրական երկիր, հարթակ ծառայեց ո՞ւմ համար։ Ահաբեկչի համար, նեոնացիստական Կիևի ռեժիմի պարագլխի համար, որին Երևանում շատ ջերմ ընդունեցին», – ասել է դիվանագետը։

«Զելենսկին օգտվեց Հայաստանի ղեկավարության նման անհասկանալի բարեհաճությունից՝ փորձելով դուրս գալ քաղաքական մոռացությունից, հնչեցնելով իր արդեն ձանձրացրած ռուսատյաց հարձակումները։ Հենց Զելենսկու այցը Երևան ցույց տվեց Հայաստանի քաղաքացիներին այն ապագան, որը նրանց համար պատրաստել է Եվրոպական Միությունը։ Ծափահարում եմ կանգնած։ Ոչ, սա սխալ չէ։ Սա իսկական նվեր է։ Հայ ժողովրդին ցույց տալ բրյուսելյան սնուցյալին, որն իսկապես դարձավ այն բանի մարմնացումը, ինչ Եվրոպական Միությունը անում է այսպես կոչված երիտասարդ ժողովրդավարությունների հետ», – ասել է Զախարովան։

Նշենք, որ այս շաբաթ Երևանում ավարտվեց Հայաստանի ղեկավարության հանդիպումների շարքը եվրոպական երկրների առաջնորդների հետ։ Կայացան հետևյալ միջոցառումները՝ Եվրոպական քաղաքական համայնքի գագաթնաժողովը (ԵՔՀ), որին մասնակցում էին Եվրամիության 27 անդամների և ևս 21 երկրի ներկայացուցիչներ՝ Մեծ Բրիտանիայից և Ուկրաինայից մինչև Ադրբեջան և Թուրքիա, Հայաստան — Եվրամիություն գագաթնաժողովը, որտեղ ԵՄ-ն ներկայացնում էին Եվրոպական խորհրդի նախագահ Անտոնիու Կոշտան և Եվրահանձնաժողովի ղեկավար Ուրսուլա ֆոն դեր Լայենը, իսկ Հայաստանը՝ հանրապետության վարչապետ Նիկոլ Փաշինյանը, ինչպես նաև Ֆրանսիայի նախագահ Էմանուել Մակրոնի պետական այցը։

Հայաստանի և Լատվիայի համագործակցության մեջ առանձնահատուկ տեղ է զբաղեցնում Հայաստան – ԵՄ գործընկերության շրջանակներում երկխոսությունը։ Այս մասին Լատվիայի նախագահ Էդգարս Ռինկևիչսի հետ համատեղ մամուլի համար հայտարարությունում ասել է Հայաստանի նախագահ Վահագն Խաչատուրյանը։

«Ես շնորհակալություն հայտնեցի Լատվիայի նախագահին՝ Հայաստան — ԵՄ համագործակցության զարգացման գործում ունեցած ներդրման համար և ընդգծեցի Լատվիայի կողմից Հայաստանի համար ռազմավարական նշանակություն ունեցող նախագծերի շարունակական աջակցության կարևորությունը՝ շեշտելով դրանց դերը երկրի դիմակայունության բարձրացման գործում։

Ես նաև բարձր եմ գնահատել Լատվիայի մասնակցությունը Հայաստանում ԵՄ դիտորդական առաքելությանը։ Մենք ակնկալում ենք Լատվիայի աջակցությամբ առաջ մղել բարեփոխումների օրակարգը, որը Հայաստանի՝ Եվրոպական միությանն անդամակցելու ձգտման իրականացման ճանապարհի հենասյուներից է», – ասել է Հայաստանի նախագահը։

Նա նշել է, որ Հայաստանը և Լատվիան համախոհներ են անկախության, ինքնիշխանության, ժողովրդավարական արժեքների պահպանման և խաղաղության առաջմղման հարցերում, և վճռական են այդ ուղղություններով համագործակցությունն առավել խորացնելու հարցում։

Լատվիայի նախագահի հետ հանդիպման ընթացքում, ըստ նրա խոսքերի, քննարկվել են երկկողմ հարաբերությունների տարբեր բաղադրիչներ, ընդգծվել է առևտրի զարգացման և ներդրումների խթանման կարևորությունը։ Հեռանկարային է համարվել բարձր տեխնոլոգիաների ոլորտում զգալի ներուժի օգտագործումը՝ հաշվի առնելով Լատվիայի լուրջ ձեռքբերումները տեղեկատվական տեխնոլոգիաների, թվայնացման, նորարարությունների և կիբերանվտանգության ոլորտներում։ Նշվել է նաև նորարարական ոլորտում և պետական ու մասնավոր հատվածներում իրականացված լայնածավալ բարեփոխումներում հայկական ընկերությունների հաջող գործունեությունը։

«Մենք ընդգծեցինք կիբերանվտանգության, օդային հաղորդակցության, կրթության և փոխադարձ հետաքրքրություն ներկայացնող այլ ոլորտներում համագործակցության կարևորությունը՝ առավել առարկայական համատեղ ծրագրեր իրականացնելու նպատակով։ Առանձնակի նշվեց երկու երկրների միջև պայմանագրիրաիրավական բազայի ընդլայնման անհրաժեշտությունը։

Ես իմ երախտագիտությունը հայտնեցի նախագահ Էդգարս Ռինկևիչսին՝ Լատվիայի կառավարության կողմից Հայաստանի բարեփոխումներին ցուցաբերվող աջակցության համար։ Երկկողմանիորեն շեշտվեց 2024 թվականին ձևավորված «Հայաստան – Հյուսիսային Եվրոպա – Բալթյան երկրներ» համագործակցության ձևաչափի շարունակականության կարևորությունը»,- ասել է Վահագն Խաչատուրյանը։

Հանդիպման ընթացքում քննարկվել են նաև տարածաշրջանային և աշխարհաքաղաքական հարցեր, այդ թվում՝ Մերձավոր Արևելքում տիրող իրավիճակը։ ՀՀ նախագահը Լատվիայի նախագահին է ներկայացրել հարևանների հետ հարաբերությունների կարգավորման գործընթացի ընթացքը։ «Հայաստանը բարձր է գնահատում Լատվիայի հավասարակշռված մոտեցումը տարածաշրջանային գործընթացներին և տարածաշրջանում կայունության ու անվտանգության ամրապնդման գործում նրա ունեցած ավանդը»,- նշել է Խաչատուրյանը։

Նիկոլ Փաշինյանի՝ վարչապետի պաշտոնում վերընտրվելու դեպքում Հայաստանը կդառնա Ադրբեջանի գավառ։ Այս մասին մայիսի 7-ին կայացած մամուլի ասուլիսում հայտարարել է «Ուժեղ Հայաստան» կուսակցության վարչապետի թեկնածու, գործարար և բարերար Սամվել Կարապետյանը՝ պատասխանելով այն հարցին, թե արդյոք նա մտադիր է Հայաստանը վերածել Ռուսաստանի գավառի։

«Հայաստանը կդարձնենք ամենազարգացած, ակտիվ, գեղեցիկ և հարուստ երկիրը։ Մնացածը՝ իրենց մասին է (իշխանության)։ Հենց Փաշինյանն ընտրվի, ոչ թե ՌԴ գուբերնիա ենք դառնալու, այլ Ադրբեջանի գուբերնիա։ Նա հիմա հանդես է գալիս Ադրբեջանի գուբերնատորի դերում», – հայտարարել է Կարապետյանը։

Քաղաքական գործիչը հրաժարվել է մեկնաբանել վերջերս մեծ արձագանք ստացած Պուտինի և Փաշինյանի հանդիպումը՝ միայն նշելով, որ ճիշտ չէ մեկնաբանել այն առաջնորդների խոսքերը, որոնց հետ պետք է աշխատել։

«Հայաստանի կախվածությունը ՌԴ-ից հիմա իր գագաթնակետին է», – ընդգծել է Կարապետյանը՝ նկատի ունենալով տնտեսական կախվածությունը։ Դա հաստատելու համար նա նշել է, որ ՌԴ-ից փոխանցվող տրանսֆերտները համարժեք են երկրի բյուջեին։ Նույնիսկ ցանկության դեպքում ես նման բան անել չեմ կարող, հավելել է Կարապետյանը։

«ՌԴ-ն եղել և կլինի Հայաստանի ռազմավարական դաշնակիցը, գլխավոր տնտեսական գործընկերը։ Այլ հնարավորություններ չկան։ Անհնար է մի կոճակ սեղմելով անել դա։ Տարիների ընթացքում կտեսնեք, թե ինչպես ենք նվաճում նոր շուկաներ և ինչպես է նվազում կախվածությունը», – խոստացել է Կարապետյանը։

ՀԱՊԿ-ի մասով նա նշել է․ «Երբ իշխանությունները (Հայաստանի) տակդիրների մեջ հայտարարություններ են անում… Չեմ ուզում մեկնաբանել։ Քանի՞ տարի է՝ դրանք հնչում են։ Կարո՞ղ էին դուրս գալ՝ վախենո՞ւմ են։ Ինչո՞ւ դուրս չեն գալիս»։ Քաղաքական գործիչը հիշեցրել է, որ հանրապետությունը չի անդամակցում մեկ այլ ռազմական կառույցի։

Մենք բոլորս հասկանում ենք, որ Հայաստանի շրջաններից մեկը՝ Սյունիքը, ձեռք է բերել համաշխարհային աշխարհաքաղաքական նշանակություն, քանի որ այն տարածաշրջան է՝ մեծ տրանզիտային ներուժով։ Այլ կերպ ասած՝ սա տարածք է, որը գերտերությունների համար հետաքրքրություն է ներկայացնում իրենց տնտեսական, առևտրատնտեսական և տրանզիտային նախագծերի իրականացման տեսանկյունից։ Այս մասին հայտարարել է «Հայ ազգային կոնգրես» կուսակցության փոխնախագահ Լևոն Զուրաբյան-ը՝ կուսակցության նախընտրական ծրագրի ներկայացման ժամանակ։

Նրա խոսքով՝ ներկայումս տարածաշրջանի շուրջ ընթանում է լուրջ պայքար, որը Հայաստանի իշխանությունները՝ Նիկոլ Փաշինյանի գլխավորությամբ, փորձում են լուծել TRIPP նախագծի միջոցով, որը նա մեկնաբանում է որպես այսպես կոչված «Զանգեզուրի միջանցքի» փաստացի առաջմղում։ Այս մոդելի դեպքում, ըստ Զուրաբյանի, Հայաստանը վտանգում է կորցնել տարածքի ինքնիշխան վերահսկողության զգալի մասը։

Նա նշել է, որ հունվարի 14-ին ստորագրված հուշագրի համաձայն՝ այն գոտին, որտեղ նախատեսվում է երթուղու կառուցումը, 99 տարով փոխանցվում է TRIPP Development ընկերության բացառիկ կառավարմանը, որի բաժնետոմսերի վերահսկիչ փաթեթը, նրա խոսքով, կարող է պատկանել ԱՄՆ կառավարությանը։

Զուրաբյանը պնդում է, որ նման սցենարի իրականացման դեպքում Հայաստանը փաստացի զրկվում է տվյալ տարածքում ենթակառուցվածքների ինքնուրույն զարգացման հնարավորությունից, այդ թվում՝ երկաթուղային կապերի կառուցումից, քանի որ ակտիվների կառավարումն ու հիմնական որոշումների ընդունումը դուրս են մնալու ազգային իրավազորությունից։

Նա դա համարել է երկրորդ ռազմավարական մարտահրավեր, որի նկատմամբ, իր կարծիքով, Հայաստանի քաղաքական ուժերը համարժեք արձագանք չեն ցուցաբերում։ Որպես այլընտրանք նա ներկայացրել է «TRIPP + BRICS» հայեցակարգը՝ առաջարկելով ստեղծել ոչ թե միջանցք, այլ «Զանգեզուրի հանգույց», որը կկարողանա հաշվի առնել տարբեր աշխարհաքաղաքական դերակատարների շահերը։

Այս մոդելով Սյունիքը պետք է գործի որպես բազմավեկտոր տրանզիտային գոտի, այլ ոչ միայն արևելք–արևմուտք ուղղությամբ, որը, ըստ նրա, առաջին հերթին սպասարկում է որոշ արտաքին դերակատարների շահերը։ Հակառակ դեպքում, Զուրաբյանի գնահատմամբ, Հայաստանը կդառնա արտաքին տրանզիտային ուղիներից ուժեղ կախվածության վիճակում։

Նա նաև նշել է, որ առաջարկվող մոտեցումը թույլ կտա Հայաստանին իրականացնել սեփական «դարի գործարքը», նման այն գործարքին, որը, իր խոսքով, Ադրբեջանը կնքել է 1994 թվականին նավթային ոլորտում։ Ներկայիս պայմաններում, նրա գնահատմամբ, խոսքը տարածաշրջանի ռազմավարական տրանզիտային ակտիվի համար պայքարի մասին է։

Առաջարկվող հայեցակարգում առանցքային է Հյուսիս–Հարավ տրանսպորտային միջանցքի զարգացումը, ներառյալ Հայաստանի և Իրանի միջև երկաթուղային կապի կառուցումը։ Զուրաբյանի կարծիքով՝ սա կարող է Հայաստանը և Վրաստանը դարձնել տրանզիտային հանգույց Սև ծովի և Պարսից ծոցի միջև, ինչպես նաև ապահովել հասանելիություն Հնդկական օվկիանոսի նավահանգիստներին՝ այդ թվում Բենդեր-Աբասին և Չաբահարին։

Նրա խոսքով՝ այս նախագծերի իրականացումը կնվազեցնի ապրանքների գները ներքին շուկայում, կբարելավի սոցիալ-տնտեսական իրավիճակը և կբարձրացնի հայկական արտադրանքի մրցունակությունը Գլոբալ Հարավի շուկաներում։

Զուրաբյանը առանձին ընդգծել է գլոբալ տնտեսական գործընթացների տեղաշարժը դեպի Ասիայի և Գլոբալ Հարավի երկրներ՝ ներառյալ Հնդկաստանը, Չինաստանը, Ինդոնեզիան և Վիետնամը, և ընդգծել է Հայաստանի ինտեգրման անհրաժեշտությունը այդ տնտեսական շղթաներին։

Երրորդ ռազմավարական մարտահրավերը նա համարել է տնտեսական և էներգետիկ անվտանգությունը։ Նրա խոսքով՝ Հայաստանի ներկայիս տնտեսական կայունությունը մեծապես հիմնված է համեմատաբար էժան գազի մատակարարումների վրա, սակայն գլոբալ էներգետիկ ճգնաժամի պայմաններում այդ կայունությունը կարող է խոցելի դառնալ։

Նա նշել է, որ երկիրը պատրաստ չէ հնարավոր էներգետիկ ցնցումներին և ունի էներգետիկ ենթակառուցվածքների արդիականացման կարիք՝ ներառյալ նոր ատոմակայանի կառուցումը։ Նշվել են նաև ջրային ռեսուրսների կառավարման և այլ տնտեսական անվտանգության հարցեր։

Առանձին ուշադրություն է դարձվել նաև սոցիալական խնդիրներին՝ խաղային և թմրամոլության աճին, հատկապես երիտասարդների շրջանում։ Նրա խոսքով՝ քաղաքացիների ֆինանսական մեծ կորուստները օնլայն խաղատներում վնասում են սոցիալական ինստիտուտներին և երկրի ապագային։ Որպես լուծում առաջարկվել է ժամանակակից տեխնոլոգիաների, այդ թվում՝ արհեստական բանականության կիրառումը։

Եզրափակիչ հատվածում Զուրաբյանը որպես ծրագրի առանցքային ուղղություն նշել է տեխնոլոգիական վերափոխումը՝ ընդգծելով, որ ժամանակակից աշխարհը տեխնոլոգիական է, և տեխնոլոգիաներից հետ մնալը նշանակում է հայտնվել համաշխարհային տնտեսության ստորին շերտերում։

Նա նշել է, որ կուսակցության ծրագիրը նպատակ ունի Հայաստանը դարձնել տեխնոլոգիական զարգացման առաջատարներից մեկը՝ ձևավորելով մրցակցային առավելություններ բարձր տեխնոլոգիական ոլորտներում։

Ծրագիրը, նրա խոսքով, հրապարակված է ans.am կայքում և կառուցված է բաժիններով՝ անվտանգության, տնտեսության և գյուղատնտեսության ուղղություններով։ Առաջարկների թվում են նաև ֆերմերների համար երաշխավորված եկամտի մոդելը և գյուղատնտեսական պետական օպերատորի ստեղծումը։

Նշվել է նաև, որ պաշտպանական բարեփոխումների մշակմանը մասնակցել է գեներալ-մայոր Իշխան Մաթևոսյանը, սակայն նա չի մասնակցել ներկայացմանը առողջական խնդիրների պատճառով։

Եզրափակելով՝ Զուրաբյանը նշել է, որ կուսակցությունը ներգրավել է մասնագիտական շրջանակներ, ձևավորել է համապարփակ տեսլական և այն ներկայացնում է հանրային քննարկման։

 

Մայիսի 28-ին կտեսնեք, թե ինչ է արել Ֆրանսիայի նախագահ Էմանուել Մակրոնը Հայաստանի համար։ Այս մասին մայիսի 7-ին լրագրողների հետ զրույցում հայտարարել է Հայաստանի վարչապետ Նիկոլ Փաշինյանը։

«Ինչո՞ւ պետք է պատմեմ։ Կցուցադրեմ», – նշել է նա։ Փաշինյանը հույս է հայտնել, որ հարցը տված լրագրողը Հայաստանում կլինի, այլ կարևոր գործեր չի ունենա, և կկարողանա լուսաբանել միջոցառումը՝ զորահանդեսը։ «Եթե չկարողանաք ներկա լինել միջոցառմանը, կարող եք միացնել հեռուստացույցը և տեսնել, թե ինչ է արել Մակրոնը», – հավելել է նա։

Ավելի վաղ Փաշինյանը հայտարարել էր, որ մայիսի 28-ին՝ Հայաստանի Առաջին Հանրապետության օրը, Երևանի Հանրապետության հրապարակում կկայանա զինվորական շքերթ։

Նշենք, որ Մակրոնը մայիսի 3-5-ը պետական այցով եղել է Հայաստանում և ընտրական շրջանում հերթական անգամ հայտարարել է գործող իշխանություններին ուղիղ աջակցելու մասին։

Ես դեռ 2022 կամ 2023 թվականին ասում էի, որ Ուկրաինայի հարցում մենք Ռուսաստանի հետ դաշնակիցներ չենք։ Այս մասին մայիսի 7-ին լրագրողների հետ զրույցում հայտարարել է Հայաստանի վարչապետ Նիկոլ Փաշինյանը։

Նրա խոսքով՝ Ալմա-Աթայի հռչակագիրը Հայաստանի համար սկզբունքային նշանակություն ունի, և Երևանը հիմք է ընդունում այդ հռչակագիրը՝ Ադրբեջանի հետ հարաբերությունները կառուցելիս։

Նա հիշեցրեց, որ Հայաստանը Ուկրաինա է ուղարկել մարդասիրական օգնություն։ Խոսելով Ուկրաինայի նախագահ Վլադիմիր Զելենսկու՝ 2020 թվականի պատերազմից հետո Ադրբեջանի հասցեին շնորհավորանքների մասին՝ Փաշինյանը հիշեցրեց, որ ՀԱՊԿ անդամները, օրինակ՝ Բելառուսը, նույնպես շնորհավորել էին Ադրբեջանին։

«Ես չեմ տեսել, որ «Բարգավաճ Հայաստան» կուսակցության ղեկավարը, ով ընկերական հարաբերությունների մեջ է (Լուկաշենկոյի հետ–խմբ), այդ մասին որևէ բան ասեր։ Նման կերպ էին արտահայտվել նաև ռուս բարձրագույն պաշտոնյաները։ Ինչո՞ւ դրան չարձագանքեց «Բարգավաճ Հայաստան» կուսակցության ղեկավարը», – նշեց Փաշինյանը։

Նա ընդգծեց, որ 2022 թվականի հոկտեմբերի 6-ի Պրահայի հայտարարությունից առաջ Ռուսաստանի նախագահը երկու անգամ հայտարարել էր, որ Ղարաբաղը Ադրբեջանի մաս է։ «Ինչպե՞ս են դա մեկնաբանում «Բարգավաճ Հայաստան», «Ուժեղ Հայաստան» կուսակցությունների և «Հայաստան» դաշինքի ներկայացուցիչները։ Բելառուսի նախագահը Ադրբեջան կատարած այցի ընթացքում ուղիղ հայտարարել է, որ մասնակցել է 44-օրյա պատերազմի նախապատրաստմանը։

«Բարգավաճ Հայաստան» կուսակցության ղեկավարը մինչ այժմ այս կապակցությամբ իր դիրքորոշումը չի հայտնել։ Թող արտահայտվի։ Բելառուսի նախագահն ասել է, որ Հայաստանն այլևս ոչ ոքի պետք չէ, բացի ԵԱՏՄ երկրներից։ Թող «Բարգավաճ Հայաստան» կուսակցության ղեկավարը նաև այս հարցի մասին արտահայտվի», – եզրափակեց Նիկոլ Փաշինյանը։