Category: Oragir.news

Թուրքական իշխանությունները տեղեկություններ չունեն Ֆրանսիայի նախագահ Էմանուել Մակրոնի՝ հայ-թուրքական փակ սահմանով Թուրքիա մեկնելու ենթադրյալ ծրագրերի մասին:

ՌԻԱ Նովոստիին այս մասին հայտնել են Թուրքիայի նախագահի աշխատակազմից:

Ավելի վաղ «Azfront» տելեգրամյան ալիքը, հղում անելով իր աղբյուրներին, հայտնել էր, որ Երևան կատարած այցի ժամանակ Մակրոնն իբր դիտարկել է փակ սահմանով Թուրքիա մեկնելու հնարավորությունը՝ նախագահ Էրդողանի հետ հանդիպելու համար:

«Մենք տեղեկություն չունենք (նման ծրագրերի մասին. խմբ.)»,- ասել է գործակալության զրուցակիցը:

Հիշեցնենք` Հայաստանի և Թուրքիայի միջև դիվանագիտական հարաբերություններ չկան, իսկ սահմանը 1993 թվականից փակ է Անկարայի նախաձեռնությամբ։

Թուրքիայի մերձիշխանական լրատվամիջոցներից «Beyaz belge haber»-ը տեղեկություններ է հրապարակել Թուրքիայի ռազմարդյունաբերական ոլորտի ձեռքբերումների մասին։ Նշվում է, որ Թուրքիայի ռազմարդյունաբերությանը հաջողվել է իր արտադրական կարողությունը տեղափոխել համաշխարհային շուկաներ։

«Արտաքին կախվածության մակարդակը 80 տոկոսից նվազել և հասել է 20 տոկոսի (60%)։ Իսկ ավելի քան 10 մլրդ դոլարի արտահանումներն ու 20 մլրդ դոլարի ոլորտային ծավալը վկայում են, որ Թուրքիան ոչ միայն արտադրող չէ, այլ նաև արտահանող և ուղղորդող երկիր»,- գրում է աղբյուրը։

Հատուկ շեշտվում է, որ զարգացման այդ գործընթացը տեղի է ունեցել Թուրքիայի նախագահ Ռեջեփ Թայիփ Էրդողանի ղեկավարությամբ և համարվում է «Թուրքիայի դարի» (Türkiye Yüzyılı) տեսլականի ամենաուժեղ դրսևորումներից մեկը։

Նաև նշվում է, որ Թուրքայի ռազմական արդյունաբերության զարգացումները բարձրացնում են երկրի միջազգային մրցունակությունը և ամրապնդում ռազմավարական անկախությունը։

«Նման ձեռքբերումներն ապահովում են Թուրքիայի ավելի ակտիվ դերակատարությունը համաշխարհային շուկայում»։

Աղբյուր՝ Ermenihaber

Քիչ առաջ ArmLur.am-ի աղբյուրները փոխանցել են, որ կյանքից հեռացել է Գևորգ Կալոշյանը։ Սրտի կանգ է եղել:

ArmLur.am-ը տեղեկացավ, որ Գևորգ Կալոշյանը վերջին ժամանակներում հայ-թուրքական գրեթե բոլորի հանդիպումների հայկական կողմի թարգմանիչն է եղել:

Նա նախօրեին ներկա է եղել նաև Գյումրի-Կարս երկաթգծի վերականգնման և գործարկման աշխատանքային խմբի հանդիպմանը:

Հանրայինն ունի արվեստագետների սև ցուցակ, կոնկրետ մարդկանց մուտքը արգելված է Հանրային, այս մասին «Հրապարակ»-ի հետ զրույցում ասել է դերասանուհի, հաղորդավարուհի Նազենի Հովհաննիսյանը։

«Իմ պատմությունը վաղուց է սկսվել: Բայց այստեղ հարցն այնքան իմ հեռանալը չէ, քանի որ աշխատավայր փոխելը լրիվ նորմալ է, հարցն այն է, որ վերջին տասը տարիների ընթացքում ես Հ1-ի սև ցուցակում եմ: Ասեմ` բոլորը չէ, որ հեռանում են: Հանրայինն ունի արվեստագետների սև ցուցակ, որոնց մուտքը արգելված է Հանրային: Նրանց մասին ոչինչ չեն խոսում, նրանց չեն ներկայացնում: Դա նրանց չգրված օրենքն է: Ես 2020 թվականից հստակ Հ1-ի սև ցուցակում եմ: Պատերազմից հետո դա եղավ: Բայց այդ ամենը Հանրայինի հետ կապ չունի, առհասարակ բոլոր այն մարդիկ, ովքեր ունեն ձայն, կշիռ և ինչ-որ կերպ հասարակության շրջանում կարող են կարծիք ձևավորել, Հանրայինի համար անհարմարություն են ստեղծում:

Ինչ վերաբերում է Հ1-ում աշխատանքային գործունեությունս դադարեցնելուն, ապա 2012 թվականից եմ ես հեռացել այնտեղից: Պատճառը` մենք այլևս չունեինք անելիք միմյանց հետ, և ես որոշեցի հեռանալ, հատուկ բան չկար: Ես ցավում եմ իմ այն բոլոր կոլեգաների համար, ովքեր աշխատելով Հանրայինում, ունեն խոսքի սահմանափակ իրավունք և ողջունում եմ իմ այն բոլոր կոլեգաներին, ովքեր հանուն իրենց խոսքի ազատության չեն մնում այնտեղ և նախընտրում են լինել ազատ, խոսել ազատ: Ամեն դեպքում` այնտեղից տարբեր մարդիկ տարբեր պատճառներով են հեռանում»,- ասել է նա:

Հիշեցնենք՝ վերջերս Հանրային հեռուստատեսությունից հեռացավ մոդել, հաղորդավարուհի Լուսինե Թովմասյանը. «… Պատճառը աշխարհի ամենահայտնի դասական երաժիշտներից մեկի՝ Lang Lang-ի, ով Հայաստան էր հրավիրված պետական միջոցներով, ինչպես նաև Սերգեյ Սմբատյանի հետ իմ իրականացրած հարցազրույցն էր…»,- գրել էր նա։

Հաղթանակի օրվա Ռուսաստանի գլխավոր շքերթը հիմա կախված է մեզանից, այս մասին հայտարարել է Ուկրաինայի նապխագահ Վլադիմիր Զելենսկին։

«Ես ուզում եմ շնորհակալություն հայտնել յուրաքանչյուր պետության, յուրաքանչյուր առաջնորդի, ովքեր աջակցել են Ուկրաինային և մեր պետության առաջարկին՝ լիակատար հրադադարի վերաբերյալ։ Այսօրվա դրությամբ մենք տեսնում ենք, որ Ռուսաստանը մեր հրադադարի առաջարկին պատասխանել է միայն նոր հարվածներով, նոր հարձակումներով։

Այսօր, գործնականում ամբողջ օրը, ամեն ժամ, մենք ստանում ենք հարվածների մասին հաղորդագրություններ մեր երկրի տարբեր շրջաններից՝ Դոնբաս, Խարկովի մարզ, Դնեպրոպետրովսկի մարզ, Սումիի մարզ, Չեռնիգովի մարզ, Զապորոժիե, Խերսոն։ Ռուսաստանը չի դադարեցրել իր որևէ ռազմական գործունեություն։ Դժբախտաբար, չի դադարեցրել։ Ուկրաինան կկրկնի դա։ Կախված այսօրվա և վաղվա իրավիճակից, մենք նաև կորոշենք մեր լիովին արդարացի պատասխանները։

Ռուսաստանը մեզանից ստացել է հրադադարի և դիվանագիտության հստակ առաջարկ և գիտի, թե ինչպես կապվել Ուկրաինայի կամ նրա գործընկերների հետ՝ մանրամասները համաձայնեցնելու համար։ Եթե Մոսկվայում այդ մեկ մարդը, որը չի կարող ապրել առանց պատերազմի, հետաքրքրված է միայն շքերթով և ոչինչ ավելին, ապա դա այլ հարց է։ Սա է հարցը։ Ուկրաինան պատրաստ է աշխատել խաղաղության համար։

Ուկրաինան ձգտում է արժանապատվորեն ավարտել այս պատերազմը, պատերազմը մղեցին այն աստիճանի, որ նույնիսկ նրանց գլխավոր շքերթն այժմ կախված է մեզանից։ Եվ սա հստակ ազդանշան է. մենք պետք է դադարեցնենք այն։ Շնորհակալություն եմ հայտնում բոլոր նրանց, ովքեր մեզ հետ են, ովքեր Ուկրաինայի հետ են»,-նշել է Զելենսկին։

Վաշինգտոնը և Թեհրանը մոտ են զինված հակամարտության ավարտի մասին միաէջանոց հուշագրի ստորագրմանը։ Այս մասին հայտնել է Axios պորտալը՝ հղում անելով իր աղբյուրներին։

Նրանց փոխանցմամբ՝ Հորմուզի նեղուցում «Ազատություն» գործողությունը կասեցնելու ԱՄՆ ղեկավարության որոշումը կապված է բանակցություններում արձանագրված առաջընթացի հետ։

Հուշագրի նախագիծը հիմնված է ամերիկյան 14 կետից բաղկացած պլանի վրա, որը նախատեսում է տարածաշրջանում մարտական գործողությունների դադարեցում և 30-օրյա բանակցային փուլի մեկնարկ՝ նվիրված Հորմուզի նեղուցում նավագնացությանը, իրանական միջուկային ծրագրին և ամերիկյան պատժամիջոցների չեղարկման հեռանկարներին։

Հիշեցնենք, որ ավելի վաղ Թրամփը հայտարարել էր, որ քանի դեռ շրջափակումը մնում է լիարժեք ուժի մեջ, «Ազատություն» նախագիծը կարճ ժամանակով կդադարեցվի՝ տեսնելու համար, թե արդյոք համաձայնագիրը կարող է վերջնականացվել և ստորագրվել, իսկ Իրանի ԱԳ նախարար Աբբաս Արաղչին ասել էր, որ Իրանի իշխանությունները պատրաստ են ԱՄՆ-ի հետ արդարացի համաձայնագիր կնքել հակամարտության կարգավորման հարցով:

Իրանի Կարմիր մահիկի աշխատակիցները 40 օր տևած ռազմական գործողությունների ընթացքում ամերիկյան և իսրայելական զինված ուժերի հարվածների հետևանքով փլուզված շինությունների փլատակներից ողջ են դուրս բերել ավելի քան 7,000 իրանցու։

Այս մասին հայտնել է կազմակերպության գլխավոր քարտուղար Մեյսամ Աֆշարը, հաղորդում է ՏԱՍՍ-ը:

«Մենք հպարտ ենք, որ Կարմիր մահիկի փրկարարները փլատակներից ողջ են դուրս բերել 7,215 մարդու»,- ասել է Աֆշարը։ Ընդհանուր առմամբ, աշխատակիցներն իրականացրել են ավելի քան 6,000 փրկարարական գործողություն։

Իրանի Կարմիր մահիկի աշխատակիցները 40 օր տևած ռազմական գործողությունների ընթացքում ամերիկյան և իսրայելական զինված ուժերի հարվածների հետևանքով փլուզված շինությունների փլատակներից ողջ են դուրս բերել ավելի քան 7,000 իրանցու։

Այս մասին հայտնել է կազմակերպության գլխավոր քարտուղար Մեյսամ Աֆշարը, հաղորդում է ՏԱՍՍ-ը:

«Մենք հպարտ ենք, որ Կարմիր մահիկի փրկարարները փլատակներից ողջ են դուրս բերել 7,215 մարդու»,- ասել է Աֆշարը։ Ընդհանուր առմամբ, աշխատակիցներն իրականացրել են ավելի քան 6,000 փրկարարական գործողություն։

Թեհրանի առևտրի կենտրոնում տեղի է ունեցել խոշոր հրդեհ, որի հետևանքով զոհվել է 11 հոգի, ևս 26 մարդ ստացել է վնասվածքներ:

Միջադեպը տեղի է ունեցել երեկ Թեհրանի արևմուտքում՝ Շահրիյար շրջանում գտնվող «Արգավան» առևտրի կենտրոնում։

Դեպքի վայր ժամանած հրշեջ հաշվարկները մի քանի ժամ շարունակ իրականացրել են հրդեհաշիջման աշխատանքներ:

Հրդեհի առաջացման պատճառները պարզվում են:

Երևանի պետական համալսարանի տնօրինությունը նոր անակնկալ է մատուցել։ Նա ԵՊՀ ռեկտորի աշխատակազմի գործավարի թափուր պաշտոնի հայտարարություն է հրապարակել։ Եվ պահանջվող որակավորումների շարքում ընդգծել «գաղտնիության պահպանման կարողությունը»։

Հետաքրքիր է՝ ի՞նչ գաղտնիք է փորձում թաքցնել Մայր բուհը, որն իր պահանջների մեջ ներառել է «գաղտնիության պահպանման կարողություն» կետը։ Այսինքն՝ աշխատանքի հավակնորդ գործավարուհին ոչ ավելի, ոչ պակաս պետք է գաղտնապա՞հ լինի։ Սա՞ է թելադրում ԵՊՀ ռեկտոր Հովհաննես Հովհաննիսյանի տնօրինած կառույցը։

Հետաքրքիր է՝ ինչի՞ ականատեսը պետք է դառնա գործավարուհին, որ գաղտնի պահի։

Գուցե կաշառքի՞, կեղծված փաստաթղթերի՞, կասկածելի նվիրատվությունների՞, կամ գուցե բարոյական առումով կասկածելի դրսևորումների՞։

Համամաձայնեք, որ ինքնին նման ընդհանրացված ձևակերպումը լրջագույն հարցեր է առաջացնում ու տալիս ոչ անհիմն կասկածերի տեղիք: Կարծում ենք՝ ԿԳՄՍ նախարար Ժաննա Անդրեասյանը, Կոռուպցիայի կանխարգելման հանձնաժողովն, ինչպես նաև հանրային նշանակության հաստատությունների աշխատանքի թափանցիկության ու հաշվետվողականության ջատագովները պետք է պատասխանեն սույն հարցին։

Չէ՞ որ մեր երկրում կրթության ոլորտի քաղաքականություն մշակողն ու իրականացնողը նախարարությունն է, իսկ ԵՊՀ-ն Հայաստանի թիվ մեկ բարձրագույն ուսումնական հաստատությունն է, որ հանդիսանում է ոլորտի յուրատեսակ հայելին։