Ավելի քան 170 մարդ է փրկվել Ֆրանսիայից Միացյալ Թագավորություն ապօրինի միգրանտներով նավի հրդեհից։
Միգրանտներով նավակը լքել էր Նորմանդիայի Վել-լե-Ռոզ ափամերձ գյուղը երկուշաբթի երեկոյան։ Նրան հետևում էին ծովային փրկարարական ծառայությունները: Գիշերը փրկարարական նավակով Ֆրանսիայի հյուսիսում գտնվող Բուլոն-սյուր-Մեր են հասցվել հինգ ուղևորներ, որոնք օգնություն էին խնդրել:
Նավամատույցում մնացածները հրաժարվել են փրկարարական ծառայությունների առաջարկած օգնությունից:
Բրիտանացի սահմանապահները նույնպես մասնակցել են փրկարարական գործողությանը. այն դարձել է ամենախոշորը Լա Մանշում 2018 թվականից ի վեր:
«Համառորեն ձգտելով հասնել Միացյալ Թագավորություն՝ միգրանտները փորձում են հատել նեղուցը անհուսալի նավակներով և հրաժարվում են Ֆրանսիայի կողմից ցուցաբերվող օգնությունից՝ բացառությամբ ծայրահեղ իրավիճակների: Հաշվի առնելով գերբեռնված նավերի կառուցվածքային անկայունությունը՝ [իշխանությունների կողմից] որոշում է կայացվել չստիպել միգրանտներին տեղափոխվել պետական փրկարարական նավակներ, որպեսզի նրանց կյանքը նավաբեկության դեպքում վտանգի չենթարկվի»,- նշել են ծովային պրեֆեկտուրայում:
Ինչպես տեղեկացնում է Արգենտինայում ՀՀ դեսպանությունը, Արգենտինայի Հանրապետության Պատգամավորների պալատում տեղի է ունեցել Հայաստանի Հանրապետության հետ բարեկամության խորհրդարանական խմբի կազմավորման պաշտոնական արարողությունը։
Միջոցառմանը մասնակցել են խմբի նախագահ, պատգամավոր Մարիա Լուիսա Գոնսալես Էստեվարենան, խմբի անդամները, Պատգամավորների պալատի միջազգային և ինստիտուցիոնալ հարաբերությունների վարչության ներկայացուցիչները, ինչպես նաև Հայաստանի Հանրապետության դեսպան Հովհաննես Վիրաբյանը և դեսպանության երրորդ քարտուղար Ռուզաննա Ազրոյանը։
Դեսպան Վիրաբյանը շնորհակալություն է հայտնել պատգամավոր Գոնսալես Էստեվարենային՝ Արգենտինա-Հայաստան բարեկամության խորհրդարանական խմբի նախագահի պարտականությունները ստանձնելու, իսկ մյուս պատգամավորներին՝ խմբին անդամակցելու համար։ Նա նաև առանձնահատուկ երախտագիտությունէ հայտնել խմբի նախկին նախագահ, պատգամավոր Լիլիա Լեմոյնեին՝ նախորդ երկու տարիների ընթացքում ծավալված արդյունավետ և սերտ համագործակցության համար։
Հանդիպման ընթացքում կողմերը մտքեր են փոխանակել հայ-արգենտինյան միջխորհրդարանական համագործակցության զարգացման հեռանկարների շուրջ՝ ընդգծելով խորհրդարանական դիվանագիտության կարևոր դերը երկկողմ հարաբերությունների հետագա ամրապնդման գործում։ Մասնավորապես, քննարկվել են բարեկամության խորհրդարանական խմբի շրջանակներում համագործակցության ընդլայնման հնարավորությունները, նախանշվել են ապագա համատեղ ծրագրերն ու նախաձեռնությունները։ Երկուստեք ընդգծվել է նաև Արգենտինայի հայ համայնքի նշանակալի դերը՝ որպես երկու երկրների միջև բարեկամության, փոխըմբռնման և բազմաոլորտ համագործակցության ամրապնդման կարևոր կամուրջ։
Կողմերը վերահաստատել են իրենց պատրաստակամությունը շարունակելու սերտ համագործակցությունը՝ նպաստելով Հայաստանի և Արգենտինայի միջև միջխորհրդարանական կապերի հետագա ամրապնդմանը և երկու երկրների բարեկամական հարաբերությունների առավել խորացմանը։
«Երևան» բժշկագիտական կենտրոնը համալրվել է գերժամանակակից նորագույն սարքավորումով, որը հնարավորություն է տալիս կարճատեսությունը, հեռատեսությունը, աստիգմատիզմը և տեսողական մի շարք այլ խնդիրներ լուծել ավելի արագ և արդյունավետ։
Նորարական տեխնոլոգիայի շնորհիվ սարքը հնարավորություն է տալիս բացառել բժշկական հնարավոր սխալները, ինչպես նաև վիրահատությունն անցկացնել առանց ցավի, իսկ հետագա ապաքինումը՝ հնարավորինս արագ:
Համակարգն ունի նախավիրահատական ախտորոշման հնարավորություն, որը ճշգրտորեն ապահովում է դրա կատարումը, իսկ հավաքված տվյալներն ինքնաշխատ կերպով փոխանցում է լազերային համակարգին:
Հուլիսի 24-ին ՆԳ նախարար Արփինե Սարգսյանն ամփոփել է Ոստիկանության Սյունիքի մարզի ստորաբաժանումների 2026 թվականի առաջին կիսամյակի աշխատանքը։ Ներկա էին նախարարության և Ոստիկանության ղեկավար կազմի ներկայացուցիչներ։ Քրեական ոստիկանության Սյունիքի մարզային վարչության պետը ներկայացրել է հաշվետու ժամանակահատվածում կատարված աշխատանքը։
2026 թվականի առաջին վեց ամսում Քրեական ոստիկանությանը վերաբերելի հանցագործության 171 դեպք է արձանագրվել՝ 6 տոկոսով պակաս նախորդ տարվա նույն ժամանակահատվածի համեմատ։
Մարդու դեմ ուղղված հանցագործությունները նվազել են 33, սեփականության դեմ ուղղվածները՝ 20,7, իսկ տնտեսական գործունեության դեմ ուղղվածները՝ 85,7 տոկոսով։ Նվազել են նաև բնակարանային գողության դեպքերը, աճել՝ պետական իշխանության, ծառայության և կառավարման կարգի դեմ ուղղված, ծանր և առանձնապես ծանր հանցագործությունները։ Հաշվետու ժամանակահատվածում Սյունիքի մարզում հրազենի գործադրմամբ հանցագործության դեպք չի արձանագրվել։ Ընդհանուր պատկերում մարզում աճել են հասարակական անվտանգության, հասարակական կարգի և բնակչության առողջության դեմ ուղղված հանցագործությունները, ինչը հիմնականում պայմանավորված է Պարեկային ծառայողների կողմից առանց վարորդական իրավունքի տրանսպորտային միջոց վարելու դեպքերի հայտնաբերմամբ։
Համայնքային ոստիկանության Կապանի բաժնի սպասարկման տարածքում գրանցված հանցագործության 234 դեպքից բացահայտվել է 203-ը։ Բացահայտման ցուցանիշը կազմել է 86,8 տոկոս։ Սեփականության դեմ ուղղված հանցագործություններն աճել են 40, իսկ պետական իշխանության, ծառայության և կառավարման կարգի դեմ ուղղվածները՝ 42,9 տոկոսով։ Աճել են նաև ընտանեկան բռնության, նվազել՝ անչափահասների նկատմամբ կատարված դեպքերը։
Համայնքային ոստիկանության Գորիսի բաժնում արձանագրվել է հանցագործության 130 դեպք՝ նախորդ տարվա նույն ժամանակահատվածի համեմատ 29,3 տոկոսով պակաս։ Դեպքերի նվազմանը զուգահեռ նվազել է նաև բացահայտման ցուցանիշը՝ կազմելով 73,8 տոկոս։ Սեփականության դեմ ուղղված հանցագործությունները նվազել են 58,6, մարդու դեմ ուղղվածները՝ 17,4 տոկոսով։ Նվազել են նաև ընտանեկան բռնության դեպքերը։ Աճել են անչափահասների կողմից կատարված հանցագործությունները։
Համայնքային ոստիկանության Սիսիանի բաժնում գրանցվել է հանցագործության 86 դեպք, բացահայտվել՝ 66-ը։ Աճը կազմել է 30,3 տոկոս։ Աճել են հասարակական անվտանգության, հասարակական կարգի և բնակչության առողջության դեմ ուղղված, նվազել՝ սեփականության դեմ ուղղված հանցագործությունները։
Համայնքային ոստիկանության Մեղրիի բաժնի սպասարկման տարածքում գրանցվել է հանցագործության 57 դեպք, բացահայտվել՝ 48-ը։ Բացահայտման ցուցանիշը կազմել է 84,2 տոկոս: Աճել են սեփականության դեմ ուղղված հանցագործությունները։ Հաշվետու ժամանակահատվածում անչափահասների կողմից կատարված հանցագործություն չի արձանագրվել։ Պարեկային ծառայության Սյունիքի մարզի գումարտակի ծառայողները 72 հանցագործության դեպք են բացահայտել։ Տարբեր վարչական իրավախախտումներով կազմվել է 23 531 արձանագրություն, այդ թվում՝ չամրակապված վարելու 6378, արագության գերազանցման 2250 դեպք։ Ոստիկանության գվարդիայի Կապանի և Գորիսի պետական պահպանության բաժնի պետերը ներկայացրել են կատարած աշխատանքը, ընդգծել, որ օբյեկտների պահպանության ու հասարակական կարգի ապահովմանը զուգահեռ նաև բացահայտել են մի շարք հանցագործություններ։
Շնորհակալություն հայտնելով աշխատանքի համար՝ ՆԳ նախարարն ընդգծել է, որ առաջնահերթ ուշադրություն պետք է դարձնել ծանր և առանձնապես ծանր հանցագործությունների կանխարգելմանն ու բացահայտմանը՝ յուրաքանչյուր դեպքով ապահովելով հետևողական և թիրախային աշխատանք։
Արփինե Սարգսյանը հանձնարարել է անզիջում պայքար մղել քրեական ենթամշակույթի դեմ, գործուն միջոցներ ձեռնարկել հատկապես այդ ենթամշակույթը կրող հետախուզվողների հայտնաբերման ուղղությամբ։
Հանձնարարվել է շարունակել անօրինական զենք-զինամթերքի հայտնաբերման աշխատանքը, ակտիվացնել՝ թմրամիջոցների ապօրինի շրջանառության, ապօրինի ծառահատումների դեմ պայքարը։
Ընտանեկան բռնության դեպքերի մասով ՆԳ նախարարը համայնքային ոստիկաններին հանձնարարել է յուրաքանչյուր ահազանգի նկատմամբ լինել հետևողական, ապահովել պատշաճ վերահսկողություն և բռնության նոր դրսևորումները կանխելու նպատակով սերտորեն համագործակցել գործընկեր կառույցների հետ։
Արփինե Սարգսյանը հանձնարարել է վերլուծել հատկապես ցածր արդյունավետություն արձանագրած ստորաբաժանումների աշխատանքը, վեր հանել առկա խնդիրներն ու ձեռնարկել կոնկրետ միջոցներ։ Նախարարը կարևորել է նաև ծառայողների մասնագիտական կարողությունների զարգացումը։
Ոստիկանության հենասյունային բոլոր ծառայություններին հանձնարարվել է շարունակել ակտիվ աշխատանքը բակային տարածքներում, գյուղական բնակավայրերում և զբոսաշրջային կենտրոններում։
Նախարար Սարգսյանը խստորեն հանձնարարել է վերլուծել ճանապարհատրանսպորտային պատահարների աճի պատճառներն ու ըստ այդմ ձեռնարկել կանխարգելիչ միջոցառումներ։
Հանձնարարվել է ակտիվացնել հանցագործությունների կանխարգելման և բացահայտման գործում Ոստիկանության գվարդիայի համագործակցությունը մյուս ստորաբաժանումների հետ։
ՆԳ նախարարը շեշտել է, որ քաղաքացիների հետ շփումներում ծառայողները պետք է լինեն բարեհամբույր, իսկ օրինախախտումների նկատմամբ՝ խիստ և անզիջում։
Տավուշի մարզի դատախազությունը, պետական շահերի պաշտպանության հայց հարուցելու լիազորության շրջանակում, հայցադիմումներ էր ներկայացրել Հակակոռուպցիոն դատարան՝ ընդդեմ ֆիզիկական երկու անձի՝ «Դիլիջան» ազգային պարկի տարածքում գտնվող՝ 0.5 հա և 1.25 հա մակերեսով, 119 միլիոն 600 հազար դրամ շուկայականին մոտարկված կադաստրային արժեքով հողամասերի կառուցապատման իրավունքը հարկադիր դադարեցնելու պահանջներով։
Հակակոռուպցիոն դատարանի՝ 2026 թվականի հուլիսի 22-ի և 24-ի վճիռներով՝ Տավուշի մարզի դատախազության հայցերը բավարարվել են:
Վճիռներն օրինական ուժի մեջ մտնելուց հետո, հողամասերի կառուցապատման իրավունքը կդադարեցվի, «Դիլիջան» ազգային պարկի տարածքում գտնվող՝ 0.5 հա և 1.25 հա մակերեսով հողատարածքները կվերադարձվեն Հայաստանի Հանրապետության տիրապետմանը:
ՀՀ մարդու իրավունքների պաշտպանի աշխատակազմի ներկայացուցիչները, այդ թվում` հոգեբան-փորձագետը, օգոստոսի 4-ին մշտադիտարկման չհայտարարված այց են իրականացրել Երևանի թիվ 135 մսուր-մանկապարտեզ ՀՈԱԿ (այսուհետ՝ նաև Մանկապարտեզ)։ Այցի ընթացքում ուսումնասիրվել են Մանկապարտեզի շենքային և սանիտարահիգիենիկ պայմանները, մատչելիության ապահովման հետ կապված հարցերը, խմբերի համալրվածությունը, հաստիքային ապահովվածությունը, անձնակազմի և սաների միջև հարաբերությունները, նրանց իրավունքների և շահերի պաշտպանության վիճակը:
Ուսումնասիրվել է նաև Մանկապարտեզում տեսահսկման համակարգերի կիրառման պայմաններում երեխաների անձնական տվյալների մշակման գործընթացը՝ ներպետական և միջազգային չափորոշիչների պահանջների պահպանման տեսանկյունից։
Մանկապարտեզի տնօրինության հետ քննարկվել են մատչելիության բարելավման, երեխաների իրավունքների ապահովման, այդ թվում՝ կրթության առանձնահատուկ պայմանների կարիք ունեցող երեխաների իրավունքների լիարժեք ու անխոչընդոտ իրացմանը վերաբերող հարցեր և այլն:
Պաշտպանի աշխատակազմի ներկայացուցիչներն այցի ընթացքում ունեցել են առանձնազրույցներ։
Մշտադիտարկման այցի ընթացքում Մանկապարտեզի տնօրինությունը և անձնակազմն արդյունավետ համագործակցել են Պաշտպանի աշխատակազմի ներկայացուցիչների հետ:
Մշտադիտարկման չհայտարարված այցի արդյունքները, ներառյալ` Պաշտպանի կողմից բազմիցս բարձրաձայնվող համակարգային խնդիրները, կամփոփվեն, և առաջիկայում դրանք արտացոլող փաստաթուղթն ու առաջարկությունները կներկայացվեն ոլորտի իրավասու մարմիններին:
«Վեոլիա ջուր» ընկերությունը տեղեկացնում է իր հաճախորդներին և սպառողներին, որ վթարային աշխատանքներով պայմանավորված օգոստոսի 5-ին՝ ժամը 10:45-18:00-ն, կդադարեցվի Մարալիկ քաղաքի ջրամատակարարումը:
Ընկերությունը հայցում է սպառողների ներողամտությունը պատճառված անհանգստության և կանխավ շնորհակալություն հայտնում ըմբռնման համար:
Երևանում օգոստոսի 4-ին կայացել է Անիի պատմական կամրջի վերականգնման հարցերով Հայաստան-Թուրքիա համատեղ աշխատանքային խմբի երկրորդ հանդիպումը։ «Արմենպրես»-ի փոխանցմամբ՝ հանդիպման ընթացքում կողմերն ընդգծել են Անիի պատմական կամրջի համատեղ վերականգնման մասին 2026թ. մայիսի 4-ին Երևանում ստորագրված արձանագրության կարևորությունը։ Կողմերը պայմանավորվել են շարունակել ստորագրված արձանագրության շուտափույթ իրականացմանն ուղղված ջանքերը:
Հայաստանը և Թուրքիան Երևանում Եվրոպական քաղաքական համայնքի 8-րդ գագաթնաժողովի շրջանակում մայիսի 4-ին ստորագրել են Անիի կամրջի վերականգնման վերաբերյալ փոխըմբռնման հուշագիր։ Հայաստանի Հանրապետության և Թուրքիայի Հանրապետության սահմանին տեղակայված պատմական Անիի (Մետաքսի ճանապարհի) կամրջի վերականգնման աշխատանքների իրականացման վերաբերյալ արձանագրությունը ստորագրել են Հայաստանի Ազգային ժողովի նախագահի տեղակալ, Հայաստան-Թուրքիա կարգավորման գործընթացի հատուկ ներկայացուցիչ Ռուբեն Ռուբինյանը և դեսպան, Թուրքիա-Հայաստան կարգավորման գործընթացի հատուկ ներկայացուցիչ Սերդար Քըլըչը։ Հուշագրի ստորագրման արարողությունը տեղի է ունեցել Անիի կամրջի վերականգնման հարցով աշխատանքային խմբի առաջին հանդիպման շրջանակներում։
Իսրայելի զինվորականները հայտարարել են Հարավային Լիբանանի Սարբին գյուղում տասնյակ մետրեր ձգվող ստորգետնյա թունելի ոչնչացման մասին, որն, ըստ նրանց պնդման, օգտագործվել է «Հեզբոլահ» շարժման կողմից՝ զինծառայողների դեմ հարձակումներ նախապատրաստելու և իրականացնելու համար։
Բացի այդ, Իսրայելի զինված ուժերը տարածաշրջանում հայտնաբերել են զենքի պահեստ՝ հրթիռներով ու արձակման կայանքներով, ինչպես նաև տասնյակ այլ տեսակի սպառազինություն, այդ թվում՝ հակատանկային հրթիռներ, Կալաշնիկովի ինքնաձիգներ և մարտական այլ սարքավորումներ:
Հիդրոօդերևութաբանության և մոնիթորինգի կենտրոնի տվյալներով՝ առաջիկա օրերին հանրապետության ողջ տարածքում սպասվում է ջերմային ֆոնի էական բարձրացում:
Սպասվող բարձր ջերմաստիճանի հետևանքով հրդեհների ու պայթյունների առաջացման ռիսկի կտրուկ աճով պայմանավորված ՝ ՀՀ քաղաքաշինության, տեխնիկական և հրդեհային անվտանգության տեսչական մարմինը հորդորում է բնակչությանը ցուցաբերել առավելագույն զգոնություն:
«Առանձնակի ուշադրություն և խստագույն վերահսկողություն է պահանջվում հատկապես պայթյունավտանգ օբյեկտների տարածքում, մասնավորապես՝ ավտոգազալիցքավորման (ԱԳԼՃԿ) և ավտոբենզալիցքավորման (ԱԲԼԿ) կայաններում:
Տեսչական մարմինը հորդորում է նշված տնտեսվարողներին, պատասխանատու անձանց և քաղաքացիներին․
ցուցաբերել բարձր իրավագիտակցություն և առավելագույն զգոնություն տնտեսվարող սուբյեկտների տարածքում,
խստագույնս վերահսկել գազալցակայանների և բենզալցակայանների տարածքում հրդեհային անվտանգության կանոնների անշեղ պահպանումը,
բացառել ծխելու, բաց կրակի օգտագործման կամ կայծ առաջացնող ցանկացած գործողության դեպք,
ապահովել տարածքների ամենօրյա հսկողությունը և անհրաժեշտ տեխնիկական/հակահրդեհային միջոցների սարքինությունը։
Տեղեկացնում ենք, որ քաղաքացիներից ստացվող ահազանգերն ու բողոքները հիմնականում վերաբերում են լցակայանների տարածքում քաղաքացիների կողմից անպատասխանատու վարքագծին և անվտանգության կանոնների անտեսմանը՝ մասնավորապես ծխելու դեպքերին։
Ուստի բոլոր պատասխանատուներին, քաղաքացիներին հորդորում և խնդրում ենք չանտեսել ստեղծված հրդեհավտանգ իրավիճակը և ձեռնարկել բոլոր կանխարգելիչ միջոցառումները՝ կանխելու հնարավոր արտակարգ պատահարներն ու ապահովելու քաղաքացիների, անձնակազմի և գույքի անվտանգությունը։
Ցուցաբերե՛ք բարձր պատասխանատվություն՝ դրանով իսկ նպաստելով հրդեհների ու տեխնածին վտանգների կանխարգելմանը»,- ասվում է հաղորդագրությունում։
