Category: TopNews.am

ԱՄՆ նախագահ Դոնալդ Թրամփը ցանկանում է այցելել Ուզբեկստան։ Ինչպես «Արմենպրես»-ը տեղեկանում է ուզբեկական Daryo հարթակից, այս մասին Ուզբեկստան կատարած այցի ընթացքում հայտնել է գլոբալ գործընկերության հարցերով ԱՄՆ հատուկ բանագնաց Պաոլո Զամպոլլին։

«Գիտեմ, որ նա ցանկանում է գալ Ուզբեկստան։ Նախագահի աշխատանքային գրաֆիկը չափազանց հագեցած է, սակայն նա ինձ ասել է, որ ցանկանում է այցելել Ուզբեկստան։ Ես նույնպես մշտապես բարձրացնում եմ այդ հարցը։ Ուստի մի օր նա անպայման կայցելի Ուզբեկստան։ Հուսով ենք, որ այդ այցը տեղի կունենա հնարավորինս շուտ», – հայտարարել է Զամպոլլին։

Նա նշել է, որ Ուզբեկստանն այժմ դարձել է այնպիսի ուղղություն, ուր պետք է այցելեն Սպիտակ տան և ԱՄՆ վարչակազմի ներկայացուցիչները։ Պաշտոնյան հավելել է, որ գոհ է երկու երկրների միջև հարաբերությունների զարգացումից։ «Ես շատ հպարտ եմ, որ մեր երկրները բարեկամացել են։ Սա ընդամենը սկիզբն է։ Մենք շատ լավ հիմք ենք ստեղծել», – ասել է նա։

Բանագնացը նաև Ուզբեկստանը ներկայացրել է որպես աշխարհի լավագույն 10 ուղղություններից մեկը, ուր արժե այցելել ճամփորդելու հնարավորություն ունեցող մարդկանց։ Նա հավելել է, որ Ուզբեկստանը նաև գրավիչ երկիր է դարձել ներդրումների համար։

Նախագահ Շավքաթ Միրզիյոևը բազմիցս հրավիրել է Թրամփին՝ այցելելու Ուզբեկստան իր համար հարմար ժամանակ։

Փետրվարին Միրզիյոևը Թրամփի հրավերով մեկնել էր Վաշինգտոն՝ մասնակցելու Խաղաղության խորհրդի առաջին նիստին։ Թրամփն Ուզբեկստանի նախագահին հրավիրել է նաև Խաղաղության խորհրդի հաջորդ նիստին և Մայամիում կայանալիք Մեծ քսանյակի (G20) գագաթնաժողովին։

Հոկտեմբերի կեսերին սպասվում է ԱՄՆ պետքարտուղար Մարկո Ռուբիոյի այցը Սամարղանդ՝ ավելի քան 100 ամերիկյան ընկերություն ներկայացնող գործարար պատվիրակության գլխավորությամբ։

Ռուսաստանն օգտագործել է բոլոր հասանելի միջոցները՝ Կիևում օտարերկրյա դեսպանություններին զգուշացնելու Ուկրաինայի մայրաքաղաքում գործունեությունը շարունակելու վտանգների մասին: Յուրաքանչյուր երկիր այժմ ինքը պետք է որոշում կայացնի Կիևում աշխատանքը շարունակելու մասին: «Արմենպրես»-ի փոխանցմամբ՝ այս մասին լրագրողների հետ զրույցում հայտնել է ՌԴ նախագահի մամուլի քարտուղար Դմիտրի Պեսկովը:

«Մեր արտաքին գործերի և պաշտպանության նախարարությունները բազմիցս համապատասխան զգուշացումներ են արել: Որոշումը կախված է այն երկրներից, որոնք դիվանագիտական ​​ներկայացուցչություններ ունեն Կիևում», – նշել է Կրեմլի ներկայացուցիչը։

Նա հավելել է, որ դեսպանությունների որոշումը՝ Կիևից տարհանել աշխատակիցներին թե ոչ, չի ազդի զինվորականների աշխատանքի վրա։

«Որոշումն այն երկրներինն է, որոնք դիվանագիտական ​​​​ներկայացուցչություններ ունեն Կիևում», – պատասխանել է Պեսկովն այն հարցին, թե արդյոք եվրոպացի դիվանագետներն անտեսում են Մոսկվայի նախազգուշացումները և պատասխանատվություն են կրում հետևանքների համար:

«Մեր զինվորականները շարունակում են իրենց աշխատանքը», – հավելել է Կրեմլի խոսնակը։

Ուկրաինական գերատեսչություններն ու ձեռնարկությունները 15 փաստաթուղթ են ստորագրել գերմանական ընկերությունների հետ՝ ձեռք բերելով 8,5 միլիարդ եվրոյի պայմանավորվածություններ։ Փաստաթղթերը ստորագրվել են կիրակի օրը՝ հոկտեմբերի 4-ին, ուկրաինա-գերմանական բիզնես ֆորումի շրջանակներում, որին մասնակցել են Ուկրաինայի նախագահ Վլադիմիր Զելենսկին և Գերմանիայի կանցլեր Ֆրիդրիխ Մերցը։

«Եթե այս պատերազմի ընթացքում Գերմանիան օգնում էր, և դա ներդրում էր մեր հակաօդային պաշտպանության հզորացման գործում, ապա այժմ մենք պատվեր կունենանք։ Մեծ փաթեթ։ Ես նաև ակնկալում եմ, որ մենք ամբողջությամբ պատվերներով կապահովենք Գերմանիայի ընկերությանը։ Բացառիկ տեխնոլոգիաներ են։ Կուժեղացնենք մեր ՀՕՊ-ը, գումարը կվերցնենք եվրոպական վարկի երկրորդ մասից»,- Զելենսկու խոսքերն է մեջբերում Ուկրաինայի նախագահի աշխատակազմի մամուլի ծառայությունը։

Գերմանիայի կանցլեր Ֆրիդրիխ Մերցը նշել է, որ Ուկրաինան և Գերմանիան պայմանավորվել են ամրապնդել համագործակցությունը էներգետիկայի, գյուղատնտեսության, պաշտպանության, թվայնացման և շինարարության ոլորտներում։ «Ուկրաինայի վերականգնումը տնտեսական հսկայական հնարավորություններ է ստեղծում թե՛ Ուկրաինայի, թե՛ Գերմանիայի համար։ Մենք կարող ենք շատ բան սովորել ձեր փորձից»,- ասել է Մերցը։

Մերցը նաև ընդգծել է, որ Կիևին Բեռլինի ցուցաբերած օգնությունը միակողմանի չէ։ «Գերմանիան օգնում է Ուկրաինային, բայց Ուկրաինան էլ օգնում է մեզ. օրինակ՝ անօդաչու թռչող սարքերից պաշտպանվելու իր փորձով, ինչպես նաև գերմանական արդյունաբերությանը միլիարդավոր եվրոների պատվերներ տրամադրելով։ Այսօր մենք ստորագրել ենք համապատասխան համաձայնագրերը։ Այս գործընկերությունը միակողմանի չէ»,- գրել է նա X հարթակում։

Սա Ֆրիդրիխ Մերցի երկրորդ այցն է Կիև դաշնային կանցլերի պաշտոնում։ Առաջին անգամ նա Ուկրաինա էր ժամանել 2025 թվականի մայիսին՝ Բունդեսթագում երդմնակալությունից ընդամենը չորս օր անց։

Վարչապետ Նիկոլ Փաշինյանը ներկա է գտնվել Ակբա բանկի նոր գլխամասային գրասենյակի բացման արարողությանը։

Վարչապետը շրջել է գրասենյակով, ծանոթացել՝ ստեղծված պայմաններին, բանկի կողմից մատուցվող ծառայություններին։

Գրասենյակը  կառուցել է իտալական Ռենկո ընկերությունը։ Շենքը համապատասխանում է LEED միջազգային սերտիֆիկացմանը, պահպանվել են բնապահպանական  բոլոր կանոնները՝ ջրի և էներգիայի խնայողությունից մինչև օդի որակ ու կանաչ գոտիների ստեղծում։ Այն զբաղեցնում է շուրջ 14650 քառակուսի մետր տարածք,  նախատեսված է ավելի քան 1000 աշխատակցի համար։

Միջոցառման շրջանակում բացվել է նաև Ակբա բանկի առաջին գլխավոր գործադիր տնօրեն Ստեփան Գիշյանին նվիրված հուշատախտակը։

Հնդկաստանը վերջին ամիսներին ավելի ակտիվ է ներգրավվել Ռուսաստանի և Ուկրաինայի միջև բանակցային գործընթացում։ Հնդկաստանի արտգործնախարար Սուբրամանյամ Ջայշանկարի խոսքով՝ Նյու Դելին երկու կողմերի հետ քննարկում է Սև ծովում նավագնացության անվտանգության ապահովումը, ինչպես նաև հացահատիկի և էներգակիրների արտահանումը։

Ջայշանկարը նշել է, որ քննարկվում են նաև հնարավոր պայմանավորվածություններ՝ հետագա հարձակումներից խուսափելու վերաբերյալ։ Նրա խոսքով՝ Հնդկաստանը երկար ժամանակ կոչ է արել հակամարտությունը լուծել երկխոսության և դիվանագիտության միջոցով, իսկ այժմ փորձում է ավելի անմիջական դեր ունենալ այդ գործընթացում։

Սիթի սահմանափակ պատասխանատվությամբ ընկերությանը պատկանող հացի և լավաշի արտադրամասում (ք. Երևան, Փափազյան 8) իրականացվել է վերահսկողություն, որի ընթացքում Սննդամթերքի անվտանգության տեսչական մարմնի տեսուչներն արձանագրել են սանիտարահիգիենիկ նորմերի խախտումներ, մասնավորապես՝

– արտադրական շինությունների նախագծումը, կառուցվածքը, դասավորվածությունը չեն կանխարգելել կեղտի կուտակումը, անցանկալի բորբոսների առաջացումը և մասնիկների թափվելու վտանգը,

– պատերը չեն ունեցել հարթ մակերես և չեն պահվել նորոգ վիճակում, հնարավոր չի եղել լվանալ, անհրաժեշտության դեպքում՝ ախտահանել,

– առաստաղը չի ունեցել հարթ մակերես և չի պահվել նորոգ վիճակում,

– սննդամթերքի հետ շփման մեջ գտնվող սարքավորումները և գործիքները չեն ենթարկվել պատշաճ մաքրման և ախտահանման։

Սննդամթերքի անվտանգության տեսչական մարմնի ղեկավարի որոշմամբ՝ կասեցվել է «Սիթի» ՍՊԸ-ին պատկանող հացի և լավաշի արտադրամասի արտադրական գործունեությունը։

Խախտումների վերացման համար սահմանվել է վերջնաժամկետ: