Month: April 2026

Ապրիլի 10-ին, ժամը 08։18-ին Լոռու մարզային օպերատիվ կառավարման կենտրոն ահազանգ է ստացվել, որ Վանաձոր-Ալավերդի միջպետական ավտոճանապարհի 3-րդ թունելի մուտքի մոտակայքում տեղի է ունեցել քարաթափում։

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։

Պարզվել է, որ մոտ 30 քմ տարածքում թափվել է մոտ 10 խմ քար․ ճանապարհը միակողմանի փակվել է։

Փրկարարները սահմանազատել են տարածքը և իրականացրել ճանապարհի մաքրման աշխատանքներ․ երթևեկությունը երկկողմանի վերականգնվել է։

Մեծ Բրիտանիայի վարչապետ Քիր Սթարմերը և ԱՄՆ նախագահ Դոնալդ Թրամփը քննարկել են Հորմուզի նեղուցով նավագնացության վերսկսման ուղիները: Այս մասին հայտարարություն է տարածել Մեծ Բրիտանիայի վարչապետի գրասենյակը՝ նշելով, որ հեռախոսազրույցը տեղի է ունեցել Սթարմերի՝ Կատար այցի ընթացքում։

Նշվում է, որ Սթարմերը ներկայացրել է Պարսից ծոցի երկրների և ռազմական պլանավորողների հետ իր քննարկումները՝ կապված Հորմուզի նեղուցով նավագնացության ազատությունը վերականգնելու անհրաժեշտության հետ, ինչպես նաև Բրիտանիայի ջանքերը՝ համախմբելու գործընկերներին և համաձայնության գալու նեղուցի բացման կենսունակ ծրագրի շուրջ։  

ՀՀ կառավարության միջոցներով և Հայաստանի տարածքային զարգացման հիմնադրամի (ՀՏԶՀ) պատվիրատվությամբ Շիրակի մարզի Ախուրյան խոշորացված համայնքի Հացիկ բնակավայրում ընթանում է նոր բուժամբուլատորիայի կառուցման շինարարությունը, որի իրականացման համար պետբյուջեից հատկացվել է շուրջ 142.5 միլիոն դրամ։

Նորակառույց կենտրոնը նախատեսված է ապահովելու բնակիչների համար հասանելի և ժամանակակից առաջնային բուժօգնություն։ Երկհարկանի կառույցում կգործի առողջության առաջնային պահպանման օղակը՝ հագեցած անհրաժեշտ գույքով և բժշկական տեխնիկայով։

Ախուրյան համայնքի ղեկավար Զավեն Մանուկյանի խոսքով՝ համայնքն իր հերթին իրականացրել է հողհատկացում, իսկ շինարարությունն ու անհրաժեշտ սարքավորումների տրամադրումն ամբողջությամբ կատարվում է պետական միջոցներով։

«Շատ եմ կարևորում հատկապես գյուղական բնակավայրերում ամբուլատորիաների առկայությունը»,- նշել է համայնքապետը, հավելելով, որ շինարարության ընթացքն ու տեմպերը գնահատվում են բավարար։ Շինարարի հավաստմամբ՝ շենքի շինարարությունը կավարտվի մոտ չորս ամսից։