Month: April 2026

Ապրիլի 18-ին Երևանում կկայանա AI Conf Armenia 2026-ը՝ արհեստական բանականությանը նվիրված հայկական խոշորագույն համաժողովը, որը չորրորդ անգամ կմեկտեղի ոլորտի առաջատար մասնագետներին, գիտնականներին, գործարարներին և բոլոր նրանց, ովեր հետաքրքված է ԱԲ հայկական հեռանկարով։   

Կազմակերպչական հանձնաժողովի այսօր կայացած ամփոփիչ հանդիպման ընթացքում տրվեց պաշտոնական հետհաշվարկը։ Տեխնոլոգիական համայնքում ընդունված ավանդույթի համաձայն՝ հանձնաժողովի ղեկավարները՝ Երևանի պետական համալսարանի ռեկտոր Հովհաննես Հովհաննիսյանը, Առաջատար տեխնոլոգիաների ձեռնարկությունների միության (ԱՏՁՄ/UATE) տնօրեն Սարգիս Կարապետյանը, Krisp ընկերության տնօրեն Արտավազդ Մինասյանը, «Երևանէն» գիտակրթական հիմնադրամի տնօրեն Հրանտ Խաչատրյանը  և ԵՊՀ պրոռեկտոր Ռաֆայել Բարխուդարյանը ստորագրեցին AI Conf 2026-ի առաջին պաշտոնական պաստառը։

Այսօր հաստատված օրակարգի շուրջ AI Conf համաժողովը «Մայր ԲՈՒՀ»-ի հարկի տակ մեկտեղելու է ոլորտի առաջնորդներին՝ վերաիմաստավորելու արհեստական բանականության ասպարեզում վերջին տարում Հայաստանում տեղի ունեցած բեկումնային փոփոխությունները։ Միջոցառմանը հանդես կգա ավելի քան 20 առաջատար բանախոս պետական և մասնավոր հատվածներից:  

AI Conf-ին մասնակցելու նպատակով ԱՄՆ-ից Հայաստան է ժամանում NVIDIA ընկերության փոխնախագահ Ռև Լեբարեդյանը, ով հանդես կգա «ԱԲ գործակալները և թոքենների տնտեսությունը» բանախոսությամբ։ NVIDIA-ն ԱԲ-ով զբաղվող աշխարհի ամենաառաջադեմ ընկերություններից է, ինչպես նաև շուկայական արժեքով աշխարհի ընկերություններից ամենաթանկը։

Հատուկ հյուրերի շարքում է Perceptron-ի հիմնադիր Արմեն Աղաջանյանը՝ «Արհեստական բանականության հայկական դոկտրին» բանախոսությամբ։

Հանդիսատեսի համար AI Conf-ի մուտքը, ինչպես և նախորդ տարիներին, ազատ է, և այս տարի ակնկալվում է ռեկորդային հոսք՝ շուրջ 2000 մասնակից։ Համաժողովի դահլիճն ամբողջությամբ տրամադրվելու է երիտասարդ գիտնականներին, ուսանողներին, տեխնոլոգիական ձեռներեցներին և բոլոր նրանց, ում հետաքրքիր է ԱԲ հայկական հեռանկարը։

Վերջին տարիներին Հայաստանը գերհամակարգիչների և GPU ենթակառուցվածքների առումով արձանագրել է աննախադեպ աճ։ Մեկնարկած ներդրումային ծրագրերի բարեհաջող ընթացքի դեպքում արդեն հաջորդ տարի Հայաստանը կդառնա հաշվողական համախառն հզորությամբ աշխարհի թոփ 10 երկրներից մեկը։ Եվ գալիք AI Conf Armenia-ն մեծապես միտված է սրընթաց այս աճը վերաիմաստավորելուն և երկրի զարգացմանը ծառայեցնելու ուղիներ որոնելուն։

Համաժողովի կազմակերպիչներն են Երևանի պետական համալսարանը, «Երևանէն» գիտակրթական հիմնադրամը (YerevanN),  Krisp ընկերությունը և Առաջատար տեխնոլոգիաների ձեռնարկությունների միությունը (ԱՏՁՄ/UATE)։

Ֆլորիդայի շրջանային դատարանը մերժել է ԱՄՆ նախագահ Դոնալդ Թրամփի՝ The Wall Street Journal-ի հրատարակիչների դեմ ներկայացված, 10 միլիարդ դոլարի զրպարտության հայցը։ Այս մասին հաղորդվել է թերթի կայքում։

Հայցը վերաբերում է WSJ-ի 2025 թվականի հուլիսին հրապարակված հոդվածին, ըստ որի՝ Թրամփը բացիկ է նվիրել սեռական հանցագործությունների համար դատապարտված, այժմ արդեն հանգուցյալ ամերիկացի ֆինանսիստ Ջեֆրի Էփշտեյնին: Թրամփը հերքում է այդ տեղեկությունը և դատի է տվել պարբերականին:

Իր 17-էջանոց որոշման մեջ ԱՄՆ շրջանային դատավոր Դարին Գեյլսը նշել է, որ Թրամփը չի կարողացել ապացուցել, որ Մերդոկին պատկանող թերթը և դրա լրագրողները գործել են «չարամտորեն», այսինքն՝ նրանք դիտավորյալ հրապարակել են կեղծ տեղեկատվություն կամ անզգուշորեն անտեսել են ճշմարտությունը։

Նախկին նախագահ Բարաք Օբամայի նշանակած դատավորը Թրամփին ժամանակ է տվել մինչև ապրիլի 27-ը՝ բողոքը փոփոխելու և դատական ​​հայցը վերստին ներկայացնելու համար։ Թրամփի իրավաբանական թիմի խոսնակը հայտարարել է, որ նախագահը «ուժեղ հայց» կներկայացնի The Wall Street Journal-ի և մյուս պատասխանողների դեմ։

ԱՄՆ նախագահ Դոնալդ Թրամփը նախօրեին` ապրիլի 13-ին, հայտարարել է, որ Վաշինգտոնը կապահովի Իրանի միջուկային ծրագրի լիակատար վերացումը կամ ուժի, կամ բանակցությունների միջոցով։ Նա այս հայտարարությունն անում է բանակցություններում ստեղծված փակուղու ֆոնին։ «Իրանը չի ունենա միջուկային զենք, եւ մենք կվերադարձնենք այդ միջուկային «փոշին»։ Մենք այն կվերադարձնենք. կամ կստանանք նրանցից, կամ էլ կվերցնենք այն», – ասել է նա լրագրողներին Օվալաձեւ աշխատասենյակի մուտքի մոտ։

Իր հերթին Իրանի նախագահ Մասուդ Փեզեշքիանը նշել է, որ վարչակարգի արագ քայքայման շուրջ հաշվարկները չեն արդարացել։ «Թշնամիների մոլորությունը, թե երկիրը արագ կփլուզվի, փարատվել է վերջին ավելի քան քառասուն օրերի ընթացքում իրանցի ժողովրդի դիմադրության ու տոկունության շնորհիվ։ Քաղաքացիական ենթակառուցվածքներին հարվածելու վերաբերյալ հայտարարությունները ոչ թե ուժի, այլ անզորության նշան են»,- ասել է նա։

Այս պայմաններում ԵՄ-ն չի հասկանում ԱՄՆ գործողությունները Հորմուզի նեղու-ում։ Այս մասին էլ հայտարարել է ԵՄ արտաքին գործերի ու անվտանգության հարցերով բարձր ներկայացուցիչ Կայա Կալլասը։ Նա կոչ է արել հակամարտության դիվանագիտական լուծում գտնել «փոխադարձ հարգանքի հիման վրա»։