Month: April 2026

Իրավապահ մարմինները բերման են ենթարկել «Ուժեղ Հայաստան» կուսակցության 14 անդամների։ Կուսակցության ներկայացուցիչները ներկայում հավաքվել են Հակակոռուպցիոն կոմիտեի շենքի մոտ՝ տեղեկություններ ստանալու և իրավիճակին ծանոթանալու համար։

Կուսակցության մամուլի խոսնակ Մարիաննա Ղահրամանյանի խոսքով՝ բերման ենթարկվածների նկատմամբ առաջադրված մեղադրանքները կապված են բարեգործության սահմանափակումների հետ։

Հակակոռուպցիոն կոմիտեն հայտնել է, որ բերման ենթարկվածները ձերբակալվել են «ընտրակաշառք տալու և ստանալու մեղադրանքներով»:

Կոմիտեն ԶԼՄ-ներին հայտնել է, որ անհրաժեշտության դեպքում կտրվի լրացուցիչ տեղեկատվություն:

Երևանի քաղաքապետարանից հայտնում են, որ ապրիլի 17-ից Ղազար Փարպեցի փողոց 4 հասցեից մինչև Ղազար Փարպեցու – Արամի փողոցների խաչմերուկ երթևեկությունը կկազմակերպվի միակողմանի, Արամի փողոցից մուտքը Ղազար Փարպեցի փողոց կարգելվի:

Ինչպես նաև Ղազար Փարպեցու փողոց 6 հասցեի հարակից ճանապարհահատվածից մինչև Ղազար Փարպեցու – Արամի փողոցների խաչմերուկ ուղղության ձախակողմյան հատվածում կանգառը կարգելվի:

Թուրքիայի ՆԳ նախարարության անվտանգության գլխավոր վարչությունը հայտնել է Շանլըուրֆա և Քահրամանմարաշ նահանգների կրթական հաստատություններում տեղի ունեցած զինված հարձակումների գործով լայնածավալ ձերբակալությունների մասին։ Իրավապահ մարմինների իրականացրած հատուկ գործողությունների արդյունքում արդեն իսկ բերման է ենթարկվել 83 անձ։

Հարձակումներից հետո թուրքական հատուկ ծառայություններն ուժեղացրել են վերահսկողությունը նաև թվային հարթակներում։ Հաղորդվում է, որ սահմանափակվել է հանցագործությունների հետ առնչություն ունեցող 940 սոցիմեդիայի հաշիվների հասանելիությունը, ինչպես նաև փակվել է 93 «Telegram» խումբ, որոնք օգտագործվել են հնարավոր համակարգման կամ քարոզչության նպատակով։

Հիշեցնենք, որ արյունալի իրադարձությունները մեկնարկել էին ապրիլի 14-ին, երբ Շանլըուրֆայի Սիվերեկ շրջանի վարժարաններից մեկում հրաձգության հետևանքով զոհվել էր մեկ և վիրավորվել 16 մարդ։ Իրավիճակն էլ ավելի է սրվել ապրիլի 15-ին, երբ Քահրամանմարաշի դպրոցներից մեկում տեղի ունեցած հարձակման հետևանքով զոհերի թիվը հասել է 9-ի, իսկ վիրավորներինը՝ 13-ի։

Ներքին գործերի նախարար Արփինե Սարգսյանը, ՆԳ նախարարության և Ոստիկանության ղեկավար կազմը Ոստիկանության օրը՝ ապրիլի 16-ին, ծաղկեպսակ ու ծաղիկներ են խոնարհել Հայաստանի ներքին գործերի առաջին նախարար Արամ Մանուկյանի կիսանդրուն և Իրավակարգի զինվորի հուշարձանին։