julbaz.mediamonitoring.am

Ռուսաստանի արտգործնախարար Սերգեյ Լավրովը կոչ է արել հիշել Ռուսաստանի վրա Եվրոպայի հնարավոր հարձակման հետևանքների մասին Ռուսաստանի նախագահ Վլադիմիր Պուտինի խոսքերը ։

«Ռուսաստանի նախագահ Վլադիմիր Պուտինն ասել է, նա դա մի քանի անգամ կրկնել է. «Մենք մտադիր չենք հարձակվել որևէ մեկի վրա։ Դա հիմարություն է, ապուշություն։ Դա ընդհանրապես որևէ պետական մտածողության բացակայություն է։ Բայց եթե այդ խոսակցությունները նշանակում են ձեր հարձակման նախապատրաստում, ապա հավաստիացնում եմ ձեզ՝ պատերազմը բոլորովին այլ և շատ կարճ կլինի»։ Ես խորհուրդ կտայի հիշել այս խոսքերը», — հայտարարել է Լավրովը «Մեծ խաղ» հաղորդման եթերում՝ Առաջին ալիքով։

Ռուսաստանի ԱԳՆ ղեկավարն ընդգծել է, որ Ռուսաստանը չի պատրաստվում հարձակվել Եվրոպայի վրա։

Լավրովը հայտարարել է նաև, որ Մոսկվային անհանգստացնում է Արևմուտքի իրականացվող Արկտիկայի ռազմականացման քաղաքականությունը։

Նրա տվյալներով՝ վերջերս ԱՄՆ-ը, Նորվեգիան և այլ երկրներ տարածաշրջանում անցկացրել են ռազմական զորավարժություններ, որոնց սցենարը, ինչպես պնդում է նախարարը, Ռուսաստանի հետ զինված հակամարտություն էր ենթադրում։

Իրանի Իսլամական հեղափոխության պահապանների կորպուսի ռազմածովային ուժերը նավամատույցների մոտ և խարիսխային կանգառներում գտնվող լցանավերի անձնակազմերին նախազգուշացրել են՝ ամերիկացի զինվորականների կողմից իրանական նավթատար նավերի վրա հարձակումների մասին հաղորդումներից հետո անհապաղ լքել նավերը, հայտնում է IRIB-ը։

«Հաշվի առնելով ԱՄՆ ահաբեկչական բանակի չարամիտ գործողությունները, որոնք ուղղված են Իրանի Իսլամական Հանրապետության մի քանի նավթատար լցանավերի դեմ, բոլոր լցամավերի անձնակազմերին նախազգուշացնում ենք, որ նրանք պետք է անհապաղ լքեն իրենց նավերը՝ թե՛ խարիսխային կանգառներում, թե՛ նավամատույցների մոտ, քանի որ դրանք թիրախներ կդառնան»,- ասվում է ԻՀՊԿ ռազմածովային ուժերի հայտարարության մեջ։

Իրանական հեռուստատեսության թղթակիցը Ջասքի ափից հայտնել է Ջասք նավահանգստի շրջանում՝ ափին մոտ, իրանական նավթատար լցանավերի վրա հարձակման մասին։ Նրա տվյալներով՝ դրանից կարճ ժամանակ անց որոտացել է ևս մեկ պայթյուն, սակայն դրա աղբյուրն ու վայրը դեռևս չեն հաստատվել։

Պետական հեռուստատեսության մեկ այլ թղթակից, հղում անելով Խարգ կղզու աղբյուրներին, հայտնել է խարիսխային կանգառում գտնվող ևս մեկ իրանական նավթատար լցանավի վրա հարձակման մասին։

Հեռուստաալիքի տվյալներով՝ այդ նավի անձնակազմը տարհանվել է հարձակումից հետո առաջին իսկ րոպեներին։ Ավելի ուշ հաղորդվել է Ջասքի ջրատարածքի մոտ գտնվող երկրորդ լցանավի վրա հարվածի մասին։

Հաղորդվում է, որ երկու լցանավերի անձնակազմերն էլ փրկարարական նավակներով շարժվում են դեպի Ջասքի ափ։

Associated Press-ը, հղում անելով քննության ընթացքին ծանոթ աղբյուրներին, հայտնում է, որ ԱՄՆ արդարադատության նախարարությունը Ֆլորիդայում մեծ ժյուրիի առջև նախկին պետական պաշտոնյաներից ցուցմունքներ է պահանջում՝ նախագահ Դոնալդ Թրամփի դեմ ամերիկյան հետախուզական համայնքի ներկայացուցիչների ենթադրյալ դավադրության հետաքննության շրջանակում։

Նոր ծանուցագրերը վկայում են քննության սրման մասին, որը շարունակվում է արդեն մոտ մեկ տարի։ Քննչական մարմինը փորձում է պարզել՝ արդյո՞ք հետախուզական համայնքի այն ներկայացուցիչները, որոնք վերջին տասնամյակի ընթացքում զբաղվել են Թրամփով, դրանց թվում՝ 2016 թվականի ընտրություններին Ռուսաստանի ենթադրյալ միջամտությունը քննողները, կարող էին գործել նախագահի դեմ դավադրության շրջանակում և խախտել նրա իրավունքները։

Վերջին օրերին քննիչները կապ են հաստատել որոշ հավանական վկաների փաստաբանների հետ և նրանց նախազգուշացրել առաջիկա ծանուցագրերի մասին։ Մինչ այժմ անհայտ է՝ որքան է մեծ ժյուրիի նիստերին կանչվածների ճշգրիտ թիվը։

Քննության կենտրոնական ուղղություններից մեկը դարձել է 2016 թվականի ընտրություններին Ռուսաստանի միջամտության նկատմամբ ամերիկյան իշխանությունների արձագանքը և հետախուզական համայնքի այն գնահատականը, ըստ որի՝ Ռուսաստանի նախագահ Վլադիմիր Պուտինի հրահանգով Մոսկվան ընտրություններին միջամտել է հօգուտ Թրամփի։

Թրամփը տարիներ շարունակ մերժել է վերոնշյալ եզրակացությունները՝ հետաքննությունները որակելով իր հաղթանակի օրինակարգությունը կասկածի տակ դնելու «խորքային պետության» փորձ։ Միաժամանակ, ՀԴԲ-ի և ԱՄՆ արդարադատության նախարարության քննությունը բավարար ապացույցներ չի հայտնաբերել Ռուսաստանի և Թրամփի նախընտրական շտաբի միջև հանցավոր դավադրության մասին, թեև պարզել է, որ քարոզարշավի մասնակիցները հույս ունեին շահ ստանալ Մոսկվայի գործողություններից։

Հետագա ստուգումները բացահայտել են ռուսական միջամտության քննությունն իրականացրած աշխատակիցների սխալները, սակայն չեն հայտնաբերել իրավապահ մարմինների ղեկավարների հանցավոր գործողությունների կամ հակաթրամփյան դավադրության գոյության ապացույցներ։

Ներկայում քննչական մարմինը փորձում է պարզել՝ արդյոք հետախուզական համայնքի ներկայացուցիչների գործողություններում կարո՞ղ էին հանցագործության տարրեր լինել։ Գործում հիշատակվող անձանց թվում է ԿՀՎ նախկին տնօրեն Ջոն Բրեննանը։ Նրա փաստաբաններն ավելի վաղ հայտարարել էին, որ Բրեննանը դարձել է քննության օբյեկտ՝ Կոնգրեսին սուտ ցուցմունք տալու կասկածանքով։ Ինքը՝ Բրեննանը, բազմիցս հերքել է դա։

Քննությունն անցկացվում է Ֆլորիդայում։ Ապրիլին արդարադատության նախարարությունը պետական ծառայության վերադարձրեց Ռոնալդ Ռեյգանի վարչակազմի ժամանակների նախկին դատախազ Ջո դիՋենովային, որը դարձավ գլխավոր դատախազի խորհրդական և քննիչների ու դատախազների խմբի ղեկավարներից մեկը։

ԴիՋենովայի թիմը միաժամանակ ուսումնասիրում է Թրամփի նկատմամբ դաշնային իրավապահ մարմինների գործողություններին առնչվող այլ դրվագներ, դրանց թվում՝ 2022 թվականին նրա Մար ա Լագո նստավայրում կատարված խուզարկությունը, որի ընթացքում ՀԴԲ գործակալները մեծ քանակությամբ գաղտնի փաստաթղթեր էին առգրավել։

Առայժմ անհայտ է՝ արդյոք քննությունը կհանգեցնի՞ որևէ մեկին մեղադրանք առաջադրելուն, և կոնկրետ ինչ հանցագործություններ կարող են վերագրվել ենթադրյալ գործի մասնակիցներին։

Վրաստանում իրականացվում են որոնողափրկարարական միջոցառումներ՝ Ադրբեջանի քաղաքացի Հաֆիզ Սուլեյմանովին գտնելու համար, որը անհետացել է Թուրքիայից սահմանը հատելուց հետո, հաղորդում է Georgia Online-ը։

Անհետացածի զարմուհի Գյունայ Ալիզադեի պատմելով՝ ընտանիքն օգոստոսի 28-ից չի կարողանում կապ հաստատել նրա հետ։ Հարազատները ստուգել են սահմանային տեսախցիկների գրառումները և պարզել, որ Սուլեյմանովը Թուրքիայից անցել է Վրաստան։ Դրանից հետո նրա գտնվելու վայրն անհայտ է։

Ինչպես պատմել է Ալիզադեն, տղամարդը դեռ Թուրքիայում կորցրել էր հեռախոսը, ուստի նրա հետ անմիջականորեն կապ հաստատել հնարավոր չէ։ Ընտանիքն ինքնուրույն սկսել է որոնումները և դիմել համապատասխան մարմիններին։

«Մենք ստուգել ենք սահմանային տեսախցիկների գրառումները և պարզել, որ նա Թուրքիայից անցել է Վրաստան։ Հայտնի է միայն այդքանը, դրանից հետո նրա մասին որևէ տեղեկություն չունենք։ Քանի որ նա հեռախոսը կորցրել է Թուրքիայում, այժմ նրա հետ կապ հաստատել հնարավոր չէ։ Մեր ընտանիքն արդեն սկսել է որոնումները և դիմել համապատասխան մարմիններին։ Խնդրում ենք նրանց, ովքեր տեսել են նրան կամ տեղեկություն ունեն նրա գտնվելու վայրի մասին, հայտնել ոստիկանությանը կամ մեզ»,- ասել է զարմուհին։

Վրաստանի ՆԳՆ-ում հաստատել են, որ Սուլեյմանովի որոնումներն արդեն ընթանում են, և որոնողափրկարարական միջոցառումներ են իրականացվում։

Տաջիկստանում ռուսական ռազմական բազան գտնվում է արտաքին սպառնալիքներին հակազդելու պատրաստ վիճակում, իսկ Մոսկվան և Դուշանբեն դրա կիրառման շուրջ սերտ համագործակցություն են հաստատել։ Այդ մասին ТАСС-ի հաղրոդմամբ, Տաջիկստանի անկախության 35-ամյակի առթիվ պաշտոնական ընդունելության ժամանակ հայտարարել է Ռուսաստանի պաշտպանության նախարար Անդրեյ Բելոուսովը։

Ըստ նրա՝ Ռուսաստանն ու Տաջիկստանն ակտիվորեն զարգացնում են ռազմական համագործակցությունը։ Մասնավորապես, Մոսկվան մասնակցում է տաջիկական ավիացիոն, անօդաչու համակարգերի և հատուկ նշանակության ստորաբաժանումների կազմավորմանը։

Երկու երկրների զինված ուժերը համատեղ անցկացնում են օպերատիվ և մարտական պատրաստության միջոցառումներ, փոխանակվում են հատուկ ռազմական գործողության փորձով և զբաղվում են ռազմական կադրերի պատրաստմամբ։

«Առանձնահատուկ ուշադրություն ենք դարձնում տաջիկա-աֆղանական սահմանի ամրապնդմանը»,- նշել է Բելոուսովը։

Ռուսաստանի պաշտպանական գերատեսչության ղեկավարը միաժամանակ բարձր է գնահատել Տաջիկստանի զինված ուժերը՝ հայտարարելով, որ դրանք ունակ են պաշտպանելու երկրի շահերն ու ինքնիշխանությունը։

Ալբանիայի մայրաքաղաք Տիրանայում բախումներ են տեղի ունեցել ոստիկանության և ցուցարարների միջև, որոնք փորձել են ճեղքել դեպի խորհրդարանի շենք տանող ճանապարհը։ Ակցիան դարձել է Ջարեդ Քուշների՝ ԱՄՆ նախագահ Դոնալդ Թրամփի փեսային առնչվող լայնածավալ առողջարանային նախագծի դեմ բողոքների 100-րդ օրը, հայտնում է Associated Press-ը։

Ցույցի մասնակիցները փորձել են հաղթահարել Տիրանայի կենտրոնում տեղակայված ոստիկանական պատնեշը և պաշտպանիչ հանդերձանքով ոստիկանների ուղղությամբ ձվեր ու լոլիկներ են նետել։ Ոստիկանությունն իր հերթին ցուցարարներին թույլ չի տվել մոտենալ խորհրդարանին։ Մի քանի ցուցարարներ ձերբակալվել են, սակայն նրանց ներկայացված մեղադրանքների մասին դեռևս չի հաղորդվել։

Բողոքի ակցիաները Ալբանիայի մայրաքաղաքում անցկացվում են գրեթե ամեն երեկո։ Սկզբում դրանք ուղղված էին բացառապես պահպանվող առափնյա տարածքում շքեղ առողջարանի կառուցման նախագծի դեմ, սակայն ժամանակի ընթացքում վերածվել են կառավարության դեմ լայնածավալ ելույթի։

Նախագծին աջակցում է Ալբանիայի վարչապետ Էդի Ռաման։ Նա պնդում է, որ ներդրումները կօգնեն արդիականացնել երկիրը, որը տասնամյակներ շարունակ մեկուսացված է եղել կոմունիստական ռեժիմի պայմաններում։ Նախագծի քննադատները բնապահպանական վնասի և առափնյա գոտի բնակչության մուտքի սահմանափակման մտավախություն ունեն։

Վարդագույն ֆլամինգոների պատկերներով պաստառների պատճառով, որոնք, ըստ ցուցարարների, կարող են տուժել շինարարությունից, ակցիաները ստացել են «ֆլամինգոների հեղափոխություն» անվանումը։

Բախումների ընթացքում ցուցարարները վանկարկել են՝ «Ձերբակալե՛լ Ռամային»։ Ոստիկանությունը պատգամավորներին ուղեկցել է խորհրդարանի շենք ելումուտ անելիս։