julbaz.mediamonitoring.am

 Վետերանների օրվան նվիրված արարողությունից հետո ԱՄՆ պաշտպանության նախարար Փիթ  Հեգսեթը, նրա կինը՝ Ջենիֆերը, և նախարարության մի քանի աշխատակիցներ լուսանկարվում էին հուշահամալիրի մոտ։ Երբ խումբը սկսել է հեռանալ, տեսագրության մեջ լսվում են ծիծաղ և բարձրաձայն խոսակցություններ։ Հուշահամալիրի մոտ հերթապահող զինծառայողը կանգ է առել և այցելուներին բարձրաձայն հիշեցրել լռություն պահպանելու և հարգանք դրսևորելու անհրաժեշտության մասին։

«Բոլոր այցելուները պետք է մշտապես լռություն պահպանեն և ակնածանք դրսևորեն»,- պահանջել է զինծառայողը։

Խոսքը ԱՄՆ բանակի՝ «Հին գվարդիա» անունով հայտնի 3-րդ հետևակային գնդի մասնագետի կոչում ունեցող Թոմաս Իգլեսիասի մասին է։ Նրա ստորաբաժանումը շուրջօրյա հսկում է Անհայտ զինվորի գերեզմանը։

Ազգային ժողովում առաջարկվում է քրեական պատասխանատվություն սահմանել պոռնկությամբ զբաղվող երեխայի ծառայությունից օգտվելու համար՝ լրացնելով հատկապես 16 տարին լրացած, բայց դեռ չափահաս չդարձած երեխաների պաշտպանության իրավական բացը։ Այս կարգավորումը նոյեմբերի 12-ին ԱԺ պետական-իրավական հարցերի մշտական հանձնաժողովի նիստում ներկայացրել է ներքին գործերի նախարարի տեղակալ Արմեն Մկրտչյանը՝ զեկուցելով Քրեական օրենսգրքում լրացումներ և փոփոխություններ նախատեսող նախագիծը։

Փոխնախարարը շեշտել է, որ 16 տարին լրանալը չի վերացնում երեխային, նրա առողջությանն ու զարգացմանը վնասող գործունեությունից պաշտպանելու անհրաժեշտությունը։ «16 տարին լրացած երեխայի սեռական ազատության առկայությունը դեռևս չի նշանակում, որ նա կարող է ներգրավվել իր համար վտանգ ներկայացնող այնպիսի գործունեության մեջ, ինչպիսին է պոռնկությունը, քանի որ պոռնկությունը վնասում է երեխայի բարոյականությանը, առողջությանն ու լիարժեք զարգացմանը։ Նախագծով առաջարկվում է քրեական պատասխանատվություն սահմանել պոռնկությամբ զբաղվող երեխայի ծառայությունից օգտվելու համար»,– ասել է Մկրտչյանը։

Նրա գնահատմամբ՝ առաջարկվող կարգավորումը չի կարող դիտարկվել որպես անձնական կյանքին միջամտություն, քանի որ նման ծառայությունից օգտվելը վնասում է նաև հանրային բարոյականությանն ու սոցիալական հարաբերություններին։

Ներկայացված նախագծով նախատեսվել է նաև առավել խիստ պատասխանատվություն, երբ արարքը կատարվել է 12-ից 16 տարեկան երեխայի նկատմամբ։

Մկրտչյանը հայտնել է, որ ԱԺ փորձագիտական և վերլուծական վարչությունն առաջարկել է այդ ծանրացնող հանգամանքը նախատեսել Քրեական օրենսգրքի 200-րդ հոդվածում։ Փոխնախարարի խոսքով՝ առաջարկությունն ընդունելի է Կառավարության համար։

Նա պարզաբանել է, որ այդ հոդվածով արդեն քրեականացված են 16 տարին չլրացած անձի նկատմամբ սեռական հարաբերությունը կամ սեքսուալ բնույթի այլ գործողությունները։ Հետևաբար, նշված տարիքային խմբի նկատմամբ կատարված արարքը նպատակահարմար է կարգավորել հենց երեխայի սեռական անձեռնմխելիությունը պաշտպանող հոդվածում։

«Տվյալ արարքում հիմնական օբյեկտը հանդիսանում է երեխայի սեռական անձեռնմխելիության պաշտպանությունը, ոչ թե հասարակական կարգի և բարոյականության հարաբերությունների պաշտպանությունը, ինչը այս պարագայում լրացուցիչ օբյեկտ է հանդիսանում»,– նշել է փոխնախարարը։

ՖԻՖԱ-ի նախկին նախագահ Յոզեֆ Բլատերը քննադատել է կազմակերպության ներկայիս ղեկավար Ջանի Ինֆանտինոյին՝ մեղադրելով նրան իրականությունից կտրված լինելու և բռնապետական կառավարման ոճի մեջ։

«ՖԻՖԱ-ն տառապում է։ Ներկայումս այն ղեկավարում է մի մարդ, ով թույլ է տվել, որ իրեն կուրացնեն։ Թրամփին ՖԻՖԱ-ի խաղաղության մրցանակ շնորհելը խայտառակություն է։ Ինչո՞ւ նա պետք է նման բան աներ։ Ինֆանտինիոն խաղաղության մրցանակ է շնորհում մի մարդու, որը դրանից կարճ ժամանակ անց պատերազմ սկսեց Իրանի դեմ։ Սա խելագարություն է։

Նա ազգային ֆուտբոլային ասոցիացիաներին ասում է՝ եթե քվեարկեք իմ օգտին, շատ ավելի շատ գումար կստանաք, քան նախկինում։ Նա բռնապետ է։ ՖԻՖԱ-ում աշխատողներն ինձ ասում են, որ ոչ ոքի թույլ չի տրվում նրա հետ վերելակ նստել։ Նա անձեռնմխելի է։

Ինֆանտինիոն անցել է բոլոր սահմանները։ Նա ամբողջությամբ կտրվել է իրականությունից», – Der Spiegel-ին տված հարցազրույցում ասել է Բլատերը։

Բլատերը նաև կտրուկ է արտահայտվել Ինֆանտինոյի հոգեկան առողջության մասին՝ ասելով, որ նրան, թերևս, վաղ թե ուշ պետք է ուղարկել հոգեբուժարան։

radar armenia

Մարտին Լյութեր Քինգ կրտսերի՝ պատմության մեջ մտած «Ես երազանք ունեմ» (I Have a Dream) ելույթի միակ հայտնի ձեռագիր վերջնական տարբերակը 2027 թվականի հունվարի 22-ին Յոթ էջից բաղկացած ձեռագիրը  Նյու Յորքի Christie’s աճուրդի տանը։ Յոթ էջից բաղկացած ձեռագիրը Քինգը գրել է 1963 թվականի օգոստոսի 28-ի վաղ առավոտյան՝ Վաշինգտոնի հյուրանոցներից մեկում։ Նույն օրը նա ելույթ է ունեցել Վաշինգտոնում անցկացված երթի ժամանակ, որին մասնակցել է շուրջ 250 հազար մարդ։

Փաստաթուղթը տասնամյակներ շարունակ պահպանվել է Քինգի օգնական Էդվարդ Քլեյթոնի գրասեղանի դարակում։ Այն 1990-ականների վերջին հայտնաբերել է նրա կինը՝ Քսերնոնա Քլեյթոնը, սակայն միայն 2024 թվականին պարզվել է, որ դա ելույթի միակ հայտնի ձեռագիր վերջնական տարբերակն է։

Հատկանշական է, որ ձեռագրում բացակայում են «Ես երազանք ունեմ» հայտնի բառերը, որոնք Քինգը ինքնաբուխ ավելացրել է ելույթի ժամանակ։ Փոխարենը պահպանվել է նրա հայտնի եզրափակիչ միտքը՝ «Վերջապես ազատ ենք, վերջապես ազատ ենք, փառք Ամենակարող Աստծուն, մենք վերջապես ազատ ենք»։ Աճուրդից ստացված հասույթը կուղղվի մի շարք բարեգործական կազմակերպությունների, այդ թվում՝ Քսերնոնա Քլեյթոնի հիմնադրամին և Քինգի կենտրոնին։ Ձեռագրի արժեքը կհայտարարվի ըստ պահանջի, սակայն սպասվում է, որ այն կվաճառվի ավելի քան 10 միլիոն դոլարով։

Դուբլինում Եվրոպական քաղաքական համայնքի գագաթնաժողովի շրջանակում հանդիպել են Ադրբեջանի նախագահ Իլհամ Ալիևը և Ուկրաինայի նախագահ Վոլոդիմիր Զելենսկին:

Կողմերը քննարկել են առևտրատնտեսական կապերի ամրապնդումը, մասնավոր հատվածի փոխգործակցությունը և պատվիրակությունների փոխայցելությունների կազմակերպումը:

Զելենսկին շնորհակալություն է հայտնել Բաքվին մարդասիրական օգնության, մասնավորապես՝ էներգետիկ սարքավորումների մատակարարման համար։

Հորմուզի նեղուցում երկու գերլցանավ է պայթել, հայտնել է Իրանի Իսլամական հեղափոխության պահապանների կորպուսը։ «Անցած գիշեր Հորմուզի նեղուցում խախտում իրականացնող երկու լցանավի հետ կապված միջադեպեր են տեղի ունեցել։ Չնայած ԻՀՊԿ ռազմածովային ուժերի՝ Հորմուզի նեղուցում հարավային երթուղու վտանգավորության վերաբերյալ բազմակի նախազգուշացումներին, նավերը շարժվել են չարտոնված երթուղով։ Ուժգին պայթյունի հետևանքով դրանք կանգ են առել», – ասվում է ԻՀՊԿ-ի մամուլի ծառայության հաղորդագրության մեջ։

Կորպուսը նշել է, որ երկու նավերն էլ սուպերտանկերներ են եղել և ընդհանուր առմամբ տեղափոխել են ավելի քան 4 միլիոն բարել նավթ։ Հորմուզի նեղուցը նավթի և հեղուկացված բնական գազի համաշխարհային մատակարարումների հանգուցային երթուղիներից մեկն է։

Նեղուցով նավագնացությունը զգալիորեն սահմանափակվել է փետրվարի 28-ին Իրանի դեմ ԱՄՆ-ի և Իսրայելի կողմից ռազմական գործողության սկսվելուց հետո։ Թեհրանը հայտարարել է, որ մտադիր է պահպանել սահմանափակումները մինչև իր պահանջների կատարումը, այդ թվում՝ ամերիկյան շրջափակման և պատժամիջոցների վերացումը։

Գործադիրի որոշմամբ՝ Արդարադատության նախարարության «Ազգային արխիվ» ՊՈԱԿ-ի Արարատի մարզային մասնաճյուղում կստեղծվեն աշխատանքային նորմալ պայմաններ և հնարավորություն կստեղծվի պատշաճ կազմակերպել արխիվային փաստաթղթերի պահպանությունը։

Ըստ հիմնավորման՝ Ազգային արխիվի Արարատի մարզային մասնաճյուղն իր գործունեությունը ծավալում է Արտաշատ համայնքի կողմից տրամադրված 986,2 քմ տարածքով շենքում։

Մասնաճյուղի շենքը գտնվում է անմխիթար վիճակում, չկան ջեռուցման համակարգ, սանիտարահիգիենիկ, ջերմախոնավային և անվտանգության համար անհրաժեշտ պայմաններ, ինչի պատճառով հնարավոր չէ պատշաճ կազմակերպել արխիվային փաստաթղթերի պահպանությունը և քաղաքացիների սպասարկումը, ինչպես նաև աշխատակիցների համար ստեղծել աշխատանքային բավարար պայմաններ։

Գործադիրն ընդունել է որոշում՝ ՀՀ-ում ագրոպարենային ոլորտի սարքավորումների լիզինգի աջակցության ծրագրի շահառուների շրջանակն ընդլայնելու և թողարկվող արտադրանքի պահման հնարավորությունները բարելավելու հարցում աջակցություն ցուցաբերելու նպատակով։

Ծրագրի շրջանակներում շահառուները կարող են ձեռք բերել գինեգործության ոլորտում օգտագործվող կաղնեփայտե տարաներ։ Հիմնավորման համաձայն՝ կաղնեփայտե տակառներն օգտագործվում են նաև սննդամթերքի ու խմիչքի արտադրության այլ ոլորտներում, մասնավորապես՝ պտղահատապտղային գինիների և օղիների, ինչպես նաև խնձորի քացախի արտադրության ոլորտներում՝ արտադրանքը պահելու, հնացնելու և ավելի բարձրարժեք ու պահանջված արտադրանք ստանալու նպատակով։

Ըստ այդմ՝ առաջարկվում է ծրագրի շրջանակում գինեգործության ոլորտում գործող շահառուներից բացի՝ կաղնեփայտե տակառների ձեռքբերման հնարավորություն տալ նաև սննդամթերքի ու խմիչքի արտադրության ոլորտներում գործունեություն իրականացնող տնտեսվարողներին։

Արաբական Միացյալ Էմիրությունների իրավապահ մարմինները ձերբակալել են PFL-ի թեթև քաշային կարգի անպարտելի չեմպիոն Ուսման Նուրմագոմեդովին։ Պատճառը նոյեմբերի 11-ին Աբու Դաբիի հյուրանոցներից մեկում UFC-ի նախկին չեմպիոն Մերաբ Դվալիշվիլիի վրա կատարված խմբակային հարձակումն է։

Միջադեպին արձագանքել և Նուրմագոմեդովի ձերբակալության մասին առաջինը հայտնել է վրացական ծագմամբ իսպանացի հայտնի մարտիկ Իլիա Թոփուրիան, որը սոցիալական ցանցերում խիստ քննադատության է ենթարկել ռուսաստանցի մարտիկին ու նրա թիմակիցներին։ «Դուք վախկոտների ոհմակ եք և ստիպված եք լինելու պատասխան տալ ձեր արածի համար։ Ըստ առկա տեղեկությունների՝ Ուսմանը ձերբակալվել է իր կողքին գտնվող վախկոտների հետ միասին։ Եվ այս մարդի՞կ են համարձակվում խոսել խոնարհության ու հարգանքի մասին։ Ինչպիսի՜ խայտառակություն։ Պատիվը, հարգանքն ու խոնարհությունը պարզապես բառեր չեն, որոնք պետք է քարոզել. դրանք արժեքներ են, որոնցով պետք է ապրել, իսկ դուք դրանցից ոչ մեկը չդրսևորեցիք»,- գրել է Թոփուրիան։

Զուգահեռաբար հայտնի են դարձել նաև հնարավոր իրավական հետևանքները։ Ըստ Home of Fight պարբերականի՝ ԱՄԷ-ի Հանցագործությունների և պատիժների մասին դաշնային օրենքի 390-րդ հոդվածի համաձայն՝ Դվալիշվիլիի վրա հարձակվելու համար Նուրմագոմեդովին կարող է սպառնալ մինչև 1 տարվա ազատազրկում կամ շուրջ 2700 դոլար տուգանք: Հատկանշական է, որ այս հոդվածի կիրառման համար Դվալիշվիլիի կողմից պաշտոնական բողոք չի պահանջվում. որպես հիմք կարող են ծառայել բացառապես տեսաապացույցները։

Ներկայումս ոստիկանությունը հարցաքննում է Ուսմանին և միջադեպի մյուս մասնակիցներին։ Բացի այդ, ըստ նույն օրենքի 392-րդ հոդվածի, 3 և ավելի անձանց կողմից հարձակում գործելը համարվում է ծանրացնող հանգամանք։

Հյուրանոցի սրահում Ուսման Նուրմագոմեդովի ապտակից սկսված ծեծկռտուքի արդյունքում Մերաբ Դվալիշվիլին ստացել էր արյունահոսող վերքեր և հեմատոմաներ։