julbaz.mediamonitoring.am

2027 թվականի հունվարի 1-ից դադարելու է սոցիալական փաթեթի գործող ծրագիրը։ Տարիներ շարունակ այն պետական համակարգում աշխատող տարբեր խմբերի համար առողջապահական և կրթական մի շարք հնարավորություններ էր ապահովում, սակայն ժամանակի ընթացքում ծրագիրը, ըստ պատասխանատուների, աստիճանաբար սպառել է իրեն։ Դրա առանձին բաղադրիչները առաջիկայում ներառվելու են այլ գործող համակարգերում։

Առողջապահական բաղադրիչի հիմնական փոփոխությունը կապված է առողջության համընդհանուր ապահովագրության համակարգի հետ։ 2026 թվականի հունվարի 1-ից ներդրված համակարգը միավորում է տարբեր ոլորտների աշխատողների և քաղաքացիների խմբեր, իսկ 2027 թվականից նախատեսվում է ընդլայնել դրա շրջանակը։ Սոցփաթեթի առողջապահական բաղադրիչն այդ համակարգում ներառվելու է, և նախկինում սոցփաթեթի շահառուների համար նախատեսված ֆինանսական միջոցները ևս ուղղվելու են առողջության ապահովագրության համակարգին։

Առողջության ապահովագրության հիմնադրամի տնօրենի ԺՊ Հայկ Բաբայանի ներկայացմամբ՝ այդ փոփոխության արդյունքում ընդլայնվելու է քաղաքացիներին հասանելի բժշկական ծառայությունների և հետազոտությունների շրջանակը։ Այսինքն՝ սոցփաթեթի առողջապահական բաղադրիչի դադարեցումը չի նշանակելու, որ քաղաքացին զրկվում է առողջապահական հնարավորություններից․ փոխվում է այն համակարգը, որի միջոցով դրանք հասանելի են դառնալու։

Միաժամանակ փոփոխություն է առաջանալու նաև կանխարգելիչ հետազոտությունների հարցում։ Սոցփաթեթի գործող համակարգում քաղաքացին հնարավորություն ուներ տարեկան որոշակի ստուգումներ անցնել նաև այն դեպքում, երբ առողջական գանգատներ չուներ։ Համընդհանուր առողջության ապահովագրության գործող փուլում այդ հնարավորությունը դեռ ամբողջությամբ նույն ձևով չի պահպանվում։ Պատասխանատուների փոխանցմամբ՝ համակարգի ամբողջական ներդրումից հետո՝ 2029 թվականից, նախատեսվում է նաև քաղաքացիների համար տարեկան կանխարգելիչ ստուգումների հնարավորություն։

Սոցփաթեթի մյուս կարևոր ուղղություններից մեկը կրթական բաղադրիչն էր։ Կրթության ոլորտում վերջին տարիներին ներդրվել են այլ մեխանիզմներ, այդ թվում՝ կամավոր ատեստավորման համակարգը։ Դրա արդյունքում շուրջ 9500 ուսուցիչ արդեն ստանում է ատեստավորման արդյունքով սահմանված բարձրացված լրավճար։

ԿԳՄՍ նախարարությունում այժմ քննարկվում է նաև ուսուցիչների համար լրավճարների դրույքաչափերի բարձրացման հնարավորությունը։ Միաժամանակ նախարարությունը նախաձեռնել է «Ուսուցչի կարգավիճակի մասին» օրենքի նախագիծ, որով նախատեսվում է սահմանել ուսուցիչների սոցիալական մի շարք երաշխիքներ։

Այսպիսով, սոցփաթեթի կրթական բաղադրիչի ավարտը չի դիտարկվում որպես ուսուցիչների համար նախկին հնարավորությունների պարզապես վերացում․ ոլորտում սոցիալական աջակցության այլ մեխանիզմներ են ձևավորվում։

Փոփոխությունների ֆոնին քաղաքացիների շրջանում առանձին հարց է առաջանում նաև արդեն կուտակված գումարների վերաբերյալ։ Մասնավորապես՝ արդյոք սոցփաթեթի դադարեցման դեպքում քաղաքացիների հաշիվներում տարիների ընթացքում կուտակված միջոցները կզրոյանա՞ն։

Աշխատանքի և բարեկեցության նախարարության աշխատանքային իրավունքի քաղաքականության վարչության պետի պարտականությունները կատարող Լուսինե Հարությունյանի փոխանցմամբ՝ այդ գումարները չեն կորչելու։ Դրանք շարունակելու են մնալ քաղաքացիների հաշիվներում և կարող են օգտագործվել սոցփաթեթի շրջանակում նախատեսված համապատասխան ծառայությունների համար, այդ թվում՝ ուսման վարձի, հիփոթեքային վճարների և ծրագրով նախատեսված այլ ուղղություններով։

Այսպիսով, 2027 թվականի հունվարի 1-ից փոփոխությունը սոցփաթեթի ամբողջական «զրոյացում» չէ։ Փոխվում է դրա գործողության տրամաբանությունը․ առողջապահական բաղադրիչը տեղափոխվում է համընդհանուր ապահովագրության համակարգ, իսկ կրթության ոլորտում նախկին մեխանիզմներին զուգահեռ զարգացվում են այլ սոցիալական և մասնագիտական աջակցության գործիքներ։ Միաժամանակ արդեն կուտակված սոցփաթեթի միջոցները պահպանվելու են քաղաքացիների հաշիվներում։

Շողեր Ղլիջյան

 

 

Հայաստանի ազգային հավաքականի գլխավոր մարզիչ Եղիշե Մելիքյանը Հանրային հեռուստաընկերության եթերում անդրադարձել է իր հնարավոր հրաժարականի մասին խոսակցություններին։

Հարցին, թե արդյոք հավաքականում աշխատելու այս մեկ տարվա ծանր օրերի ընթացքում երբևէ մտածել է հրաժարական տալու մասին, մարզիչը պատասխանել է. «Այդ հույսով էլ մնացեք, ես նոր եմ սկսել։ Եթե կան մարդիկ, որոնք նման հույս ունեն, թող կտրեն այդ հույսները։ Ես ո՛չ լեգեոներ մարզիչ եմ, ո՛չ էլ այստեղ եմ եկել գումար վաստակելու։ Հավաքականի մարզաշապիկն ու համազգեստը կրել եմ դեռ 15 տարեկանից. դա մեծ պատասխանատվություն է և իմ կյանքն է։ Ես այստեղ անելու գործ ունեմ, իսկ իմ գործը նոր է միայն սկսվում»,- պատասխանել է Մելիքյանը։

Հայաստանի ազգային ընտրանին վաստակած 4 միավորով զբաղեցնում է Ազգերի լիգայի C2 խմբի մրցաշարային աղյուսակի 3-րդ հորիզոնականը։ Մեր թիմը հաջորդ հանդիպումը կանցկացնի նոյեմբերի 12-ին՝ Վազգեն Սարգսյանի անվան Հանրապետական մարզադաշտում հյուրընկալելով Կիպրոսի հավաքականին։

 

Եվրոպական միությունը պատրաստ է աջակցել Հայաստանին՝ ԵՄ-ին ավելի մոտենալու գործընթացում։ Եվրոպական խորհրդարանում կայացած ճեպազրույցի ժամանակ այս մասին հայտարարել է ԵՄ ընդլայնման հարցերով եվրահանձնակատար Մարթա Կոսը:

«Մենք պատրաստ ենք, և եթե նրանք կատարում են իրենց պարտավորությունները, մենք նույնպես կատարում ենք մերը: Հայաստանն իրապես շարժվում է դեպի Եվրոպական Միություն: Այս պահին այն միակ երկիրն է, որի հետ մենք վիզային ռեժիմի ազատականացման շուրջ բանակցություններ ենք վարում »,- ասել է Կոսը։

Գլխավոր դատախազության ապօրինի ծագում ունեցող գույքի բռնագանձման գործերով վարչությունը պահանջ է ներկայացրել դատարանին՝ ՀՀ պետական եկամուտների կոմիտեում տարբեր պաշտոններ զբաղեցրած Արմեն Լիպարիտի Մանուկյանից (Երևանի նախկին քաղաքապետ Ռոբերտ Նազարյանի դստեր ամուսին) և նրան փոխկապակցված անձանցից հօգուտ Հայաստանի Հանրապետության բռնագանձել՝

1.  3 անշարժ գույք, որից 2-ը՝ Երևան քաղաքում, 1-ը՝ Կոտայքի մարզում.
2.  1 տրանսպորտային միջոց.
3.  2 իրավաբանական անձում մասնակցություն.
4.  211 միլիոն 795 հազար դրամ՝ որպես ապօրինի դրամական միջոցների մնացորդ.
5.  236 միլիոն 633 հազար դրամ՝ որը չի հիմնավորվում անձի օրինական եկամուտներով, ունի ապօրինի ծագում, փոխանցվել է բարեխիղճ ձեռքբերողի կամ հնարավոր չէ նույնականացնել և բռնագանձել:

«Էրեբունի-Երևան 2808» տոնակատարությամբ պայմանավորված՝ հոկտեմբերի 9-ին՝ ժամը 09:00-ից մինչև հոկտեմբերի 10-ը՝ ժամը 24:00-ն, երթևեկության համար փակ կլինեն Հյուսիսային պողոտային հարող Պուշկինի և Տերյան փողոցները, ինչպես նաև Թումանյան – Աբովյան փողոցների խաչմերուկից մինչև Արամի և Աբովյան խաչմերուկի հատվածը՝ ժամը 10:00-ից մինչև 20:00-ն:

Այս մասին տեղեկացնում են Երևանի քաղաքապետարանից:

Արդեն հինգերորդ տարին անընդմեջ «Հայաստանի կրթական նախաձեռնություն» կրթական հիմնադրամի «Դասավանդի՛ր հանուն Հայաստանի» ծրագիրն իրականացնում է «ՈւսանողականFest»-ը՝ ստեղծելով հարթակ Հայաստանի բոլոր բուհերի ուսանողների համար՝ զարգանալու, նոր կապեր ստեղծելու, տարբեր ոլորտների մասնագետների փորձին ծանոթանալու և նրանց հետ անմիջական երկխոսություն ունենալու համար։

Այս տարի «ՈւսանողականFest 2026»-ը տեղի կունենա հոկտեմբերի 10-ին՝ Արմենիա Մարիոթ հյուրանոցում, և ակնկալվում է մեկ հարկի տակ համախմբել ավելի քան 500 ուսանողի։

Ֆեսթի առանցքում իրական պատմություններն են՝ մասնագիտական ճանապարհի, հաջողությունների, դժվարությունների, կարևոր որոշումների ու դրանցից քաղած դասերի մասին։ Մասնակիցները հնարավորություն կունենան ոչ միայն լսելու տարբեր ոլորտներում կայացած խոսնակներին, այլև ուղղելու իրենց հարցերը և անմիջականորեն հաղորդակցվելու նրանց հետ։

Այս տարվա խոսնակներն են՝

• Լարիսա Հովհաննիսյան՝ «Հայաստանի կրթական նախաձեռնություն» հիմնադրամի և «Դասավանդի՛ր հանուն Հայաստանի» հիմնադիր,
• Ռուբեն Եսայան՝ ժամանակակից գրող, բլոգեր և սցենարիստ,
• Անի Խաչիկյան՝ դերասանուհի,
• Դավիթ Տոնոյան՝ բժիշկ-ուրոլոգ, անդրոլոգ։

Խոսնակները ուսանողների հետ կկիսվեն իրենց մասնագիտական և անձնական ճանապարհի պատմություններով՝ ներկայացնելով ոչ միայն հաջողությունները, այլև դրանց հետևում եղած դժվարությունները, ձախողումները, կարևոր շրջադարձերն ու մարտահրավերները հաղթահարելու փորձը։

«ՈւսանողականFest»-ի նպատակն է երիտասարդներին հնարավորություն տալ հանդիպելու տարբեր մասնագիտական ուղիներ ընտրած մարդկանց, բացահայտելու նոր հեռանկարներ և ստանալու այն հարցերի պատասխանները, որոնք կարող են կարևոր լինել սեփական կրթական ու մասնագիտական ճանապարհը կառուցելիս։

Հինգերորդ տարին շարունակ «ՈւսանողականFest»-ը միավորում է տարբեր բուհերի և մասնագիտությունների ուսանողներին՝ ձևավորելով միջավայր, որտեղ հնարավոր է սովորել ոչ միայն հաջողության պատմություններից, այլև դրանց հասնելու ճանապարհից։ Միջոցառմանը մասնակցելու համար անհրաժեշտ է պարզապես լրացնել հայտ:

Կայացավ «Կողք կողքի» 7-րդ միջազգային ներառական երաժշտական արվեստի փառատոնը: Փառատոնի գլխավոր հովանավորն է Երևանի քաղաքապետարանը։ Այն անցկացվում է ՀՀ ԿԳՄՍ նախարարության և «Իմ քայլը» հիմնադրամի աջակցությամբ։

 

Բացօթյա համերգի ընթացքում զարգացման առանձնահատկություններ ունեցող երեխաներն ու պատանիները հնարավորություն ունեցան մեկ բեմից հանդես գալ հայ և արտասահմանյան հանրահայտ երգիչների ու երաժշտական խմբերի հետ։