Պաշտպանության նախարար Սուրեն Պապիկյանի հանձնարարությամբ շարունակվում են հանդիպում-քննարկումները ժամկետային զինծառայող սերժանտների, բանակային դիրքերի ավագների հետ․ հայտնում են պաշտպանության նախարարությունից։
«Օրակարգում ոչ կանոնագրքային փոխհարաբերությունների կանխարգելմանը, բանակ թափանցող արատավոր բարքերն արմատախիլ անելուն ուղղված աշխատանքներին վերաբերող հարցերն են»,- ասված է հաղորդագրությունում։
ՀՀ ԱԳ նախարարի տեղակալի ժամանակավոր պաշտոնակատար Վահան Կոստանյանը Կիև աշխատանքային այցի շրջանակներում հանդիպում է ունեցել Ուկրաինայի Գերագույն ռադայի արտաքին քաղաքականության և միջխորհրդարանական համագործակցության հանձնաժողովի նախագահ Օլեկսանդր Մերեժկոյի հետ:
Զրուցակիցները քննարկել են Հայաստան-Ուկրաինա համագործակցության օրակարգը՝ կարևորելով փոխադարձ հետաքրքրություն ներկայացնող տարբեր ոլորտներում փոխգործակցության ակտիվացումը:
Վահան Կոստանյանն ու Օլեկսանդր Մերեժկոն անդրադարձ են կատարել նաև միջխորհրդարանական կապերի զարգացմանը, մասնավորապես երկու երկրների խորհրդարանների համապատասխան հանձնաժողովների միջև կապերի առավել ակտիվացմանը՝ փոխայցելությունների և պարբերական շփումների միջոցով:
Մտքեր են փոխանակվել նաև տարածաշրջանային և միջազգային օրակարգի մի շարք հարցերի շուրջ։
Այսօր՝ օգոստոսի 15-ին, վրաերթ է տեղի ունեցել Երևանում․ գրում էshamshyan.com -ը։
«Ժամը 10։00-ի սահմաններում Միկոյան փողոցում Գեղարքունիքի մարզի բնակիչ, 50-ամյա Ալիկ Պ․-ն իր վարած, թիվ 35 երթուղին սպասարկող «MAN» մակնիշի ավտոբուսով վրաերթի է ենթարկել հետիոտնի։
Վարորդը փախուստի չի դիմել, ահազանգել է շտապօգնություն, և օպերատիվորեն ժամանած շտապօգնության բժիշկների հերթապահ խումբը վրաերթի ենթարկվածին նախ տեղում առաջին բուժօգնություն է ցուցաբերել, ապա տեղափոխել «Սուրբ Գրիգոր Լուսավորիչ» բժշկական կենտրոն։
Դեպքի փաստով քննչական բաժնում նախաձեռնվել է քրեական վարույթ, որտեղ էլ պարզվում է վրաերթի ենթարկվածի ինքնությունը։
Ըստ տեղեկությունների՝ ավտոբուսը հաշվառված է Երևանի քաղաքապետարանի հաշվեկշռում և սպասարկում է թիվ 35 երթուղին»,- նշում է լրատվամիջոցը։
Դերասան Միխայիլ Եֆրեմովի նախկին փաստաբան, ադրբեջանական ծագում ունեցող Էլման Փաշաևի որդին՝ Էլվին Փաշաևը, դարձել է սպանության և խարդախության վերաբերյալ քրեական գործի ութ մեղադրյալներից մեկը: Այս մասին ասվում է РИА Новости-ի տրամադրության տակ եղած դատական նյութերում:
Գործով ընդհանուր առմամբ մեղադրվում է ութ մարդ։ Նրանց մեղսագրվում է սպանություն, առանձնապես խոշոր չափերի խարդախություն և առանձնապես խոշոր չափերի խարդախության փորձ։ Էլվին Փաշաևին մեղադրանք է ներկայացվել միայն առանձնապես խոշոր չափերի խարդախության փորձի համար։ Նա գտնվում է քննչական մեկուսարանում։
Ըստ իրավապահ մարմինների տվյալների, կրտսեր Փաշաևը, որն իր հոր հիմնադրած «Էլման Գրուպ» իրավաբանական ընկերության գլխավոր տնօրենն է, ուղեկցել է բնակարանի վաճառքի գործարքը դրա սեփականատիրոջ անհետացումից հետո։
Փաշաևի պաշտպանությունը РИА Новости-ին հայտնել էր, որ սպանության դրվագը կապված է մի տղամարդու անհայտ կորելու հետ, ինչը տեղի է ունեցել երիտասարդին մեղսագրվող իրադարձություններից շատ առաջ։
Դատական նյութերը վկայում են նաև, որ քննության շրջանակում նախատեսվում է դիակի արտաշիրիմում՝ մոլեկուլային-գենետիկական փորձաքննություն անցկացնելու համար։
Երեկվանից համացանցը ցնցել է արմավիրցի հոր և որդու մասնակցությամբ կադրերը, որտեղ վերջիններս ծայրահեղ անմխիթար պայմաններում են գտնվում, հյուծված ու սոված։ Տեսանյութում երևում է, որ 57 ամյա տղամարդը գետնին պառկած է, չի կարողանում շարժվել, նստել, անգամ խոսել, իսկ նրա տարեց հայրը խնդրում է, որ օգնեն որդուն, բժիշկ կանչեն։ Նրանց մասին պատմող տեսանյութ էր հրապարակել «Հանուն ձեր ապագայի» ՀԿ-ի համահիմնադիր Արկադի Կիրակոսյանը։
Մեզ հետ զրույցում Կիրակոսյանը նշեց, որ տեսանյութն իրեն է ուղարկել քաղաքացիներից մեկը, ահազանգելով տղամարդկանց՝ անմարդկային պայմաններում գտնվելու մասին։ «Ես անձամբ հաջորդ օրը գնացել եմ Արմավիր, քանի որ ահազանգը եղել է կեսգիշերին մոտ, իսկ ես Գյումրիում եմ բնակվում։ Կեսօրին արդեն տարածքային սոցիալական աշխատողները պետի գլխավորությամբ տեղում էին, շտապ օգնություն էին կանչել և նրանց տեղափոխել էին Արմավիր ԲԿ։ Այնտեղ անալիզներ վերցրեցին, գնահատեցին վիճակը, ասացին, որ ջրազրկված է ու սովամահ վիճակում, բայց կյանքին վտանգ չի սպառնում։ Պատասխանատու ձևով հայտարարում եմ, որ Արմավիր ԲԿ-ում մեզ ստիպում էին որ հանենք, ասում էին տարեք մասնավոր խնամքի կենտրոն։ Ասում էին ընդունարանի աշխատանքը խաթարված է, տեղում անալիզը վերցրել են ու դուրս են գրել։ Մինչև ժամը 16։00 ես էլ եմ եղել հիվանդնոցում, դեռ այնտեղ էին, բայց հետո տեղեկացա որ դուրս են գրել, չգիտեմ թե ուր են տարել»։
Աշխատանքի և սոցիալական հարցերի նախարարությունից մեր հարցին ի պատասխան հայտնեցին․ «Տեսանյութում երևացող ընտանիքի դեպքը գտնվում է Աշխատանքի և սոցիալական հարցերի նախարարության Միասնական սոցիալական ծառայության ուշադրության կենտրոնում: Մեր սոցաշխատողը կատարել է տնայց, որից հետո կանչվել է շտապօգնություն, որպեսզի իրականացվի նշված անձանց առաջին բուժօգնության ցուցաբերումը: Այս պահին նշված անձինք գտնվում են հիվանդանոցում, ինչից հետո անհապաղ կտեղափոխվեն խնամքի հաստատություն, որտեղ առաջիկա օրերին կազմակերպվելու է վերջիններիս անհրաժեշտ բուժօգնությունն ու խնամքը, ինչից հետո անդրադարձ կկատարվի նաև վերջիններիս երկարաժամկետ կեցության և սոցիալական վիճակի բարելավման հարցերին»:
Նախարարությունից չհայտնեցին սակայն, թե որ հիվանդանոցում են այս պահին գտնվում տղամարդիկ, նշելով, որ հարցը գտնվում է Առողջապահության նախարարության տիրույթում։ Մեզ չհաջողվեց կապ հաստատել Առողջապահության նախարարության հետ, սակայն կարողացանք պարզել, որ 57-ամյա որդուն Արմավիրից տեղափոխել են Երևան, հիմա գտնվում է Երևանի 8-րդ հիվանդանոցում։
Արկադի Կիրակոսյանը հայտնեց, որ Արմավիրի մարզի քրեական ոստիկանությունից իր հետ կապ են հաստատել, փորձել տեղեկություն ստանալ տարեց տղամարդու մասին, քանի որ այս պահին նրա գտնվելու վայրը անհայտ է։
Իրանի ԱԳՆ-ի պաշտոնական ներկայացուցիչ Էսմայիլ Բաղային քննադատել է Իրանի և Մերձավոր Արևելքի նկատմամբ ԱՄՆ-ի քաղաքականությունը՝ հայտարարելով, որ ամերիկյան պետական կառավարման համակարգը և արտաքին քաղաքականությունը մեծապես հենվում են ստի վրա։ Իր գնահատականը նա ուղեկցել է Ֆյոդոր Դոստոևսկու «Կարամազով եղբայրներ» վեպից մի մեջբերումով։
«Դոստոևսկու «Կարամազով եղբայրներ»-ից այս հատվածը դիպուկ նկարագրում է այն իրավիճակը, որում հայտնվել են ամերիկյան պետական կառավարման համակարգը և ԱՄՆ-ի արտաքին քաղաքականությունը Իրանի ու տարածաշրջանի նկատմամբ՝ «ստից» իրենց ծայրահեղ կախվածության պատճառով», — գրել է Բաղային X սոցիալական ցանցում։
This passage from Dostoevsky’s “The Brothers Karamazov” aptly describes the situation in which the U.S. system of governance & foreign policy regarding Iran and the region finds itself due to its extreme reliance on ‘lies’:
“The man who lies to himself and listens to his own lie…
— Esmaeil Baqaei (@IRIMFA_SPOX) August 15, 2026
Իրանի արտաքին քաղաքական գերատեսչության ներկայացուցիչը մեջբերել է Դոստոևսկու վեպի ծերունի Զոսիմայի խոսքերը. «Ինքն իրեն ստողը և իր իսկ սուտը լսողը հասնում է այն վիճակին, որ այլևս ոչ մի ճշմարտություն չի տարբերում ո՛չ իր մեջ, ո՛չ էլ շուրջը, և, հետևաբար, կորցնում է հարգանքը թե՛ իր, թե՛ ուրիշների նկատմամբ»։
Ադրբեջանական մամուլում տեղ գտած հրապարակումների համաձայն, 2025 թվականին այդ երկրի Պետական նավթային ընկերությունը՝ SOCAR-ը, նավթի վաճառքից ունեցել է մոտ 50,77 միլիարդ դոլարի եկամուտ։ 29,75 միլիարդ դոլարը ստացվել է Շվեյցարիային վաճառված էներգակիրներից, որը կազմում է 58,6 տոկոսը։ 24 թվականի համեմատ, այս ցուցանիշը նվազել է 6,1 տոկոսով։ Հիմնական օպերացիոն եկամուտը ադրբեջանական նավթային ընկերությունը ստացել է Թուրքիայում՝ 9,71 միլիարդ դոլար։ 24 թվականի համեմատ՝ Թուրքիայում SOCAR-ի բիզնես գործունեությունից ստացված եկամուտները ավելացել են 71,1 տոկոսով։
Իսրայելի ռազմաօդային ուժերը հարվածել են Լիբանանի հարավում գտնվող Անսար գյուղի բնակելի տանը, որի հետևանքով զոհվել է յոթ մարդ, վիրավորվել՝ երեքը, հայտնել է Լիբանանի շտապօգնության ծառայությունը ՌԻԱ Նովոստիին։
«Անսարի ծայրամասում, Ազ-Զարիյա գյուղի մոտ գտնվող տան վրա ավիահարվածի հետևանքով զոհվել է յոթ մարդ, ևս երեքը՝ վիրավորվել։ Տունն ամբողջությամբ ավերվել է», – ասել է գործակալության աղբյուրը։
Աղբյուրի փոխանցմամբ՝ փրկարարական խմբերը շարունակում են մաքրել փլատակները և դուրս բերել զոհվածներին ու վիրավորներին։ Գործողությանը մասնակցում են «Քաշաֆ ալ-Ռիսալա ալ-Իսլամիյա» շարժման, Իսլամական առողջապահության կոմիտեի և Լիբանանի քաղաքացիական պաշտպանության շտապօգնության աշխատակիցները։
Վիրավորներին տեղափոխում են Նաբաթիե քաղաքի հիվանդանոցներ։