julbaz.mediamonitoring.am

Իսրայելի պաշտպանության բանակը (IDF) պաշտոնապես հայտարարել է, որ Բեյրութում իրականացված օդային հարվածի հետևանքով սպանվել է «Հեզբոլլահի» առաջնորդ Նաիմ Քասեմի անձնական քարտուղար և խորհրդական Ալի Յուսուֆ Հարշին։ Թիրախային հարվածն իրականացվել է Լիբանանի մայրաքաղաքի Թալլեթ Խայաթ թաղամասում՝ խմբավորման հիմնական հենակետ համարվող Դահիե թաղամասից դուրս։ 

Ըստ զինվորականների՝ Հարշին ոչ միայն Քասեմի վստահելի անձն էր, այլև նրա զարմիկը, ով առանցքային դեր էր խաղում առաջնորդի գրասենյակի և անվտանգության կառավարման գործում։

Զուգահեռաբար, Իսրայելի ռազմաօդային ուժերը գիշերվա ընթացքում հարվածներ են հասցրել Լիտանի գետի վրայով անցնող երկու «կենտրոնական» անցումների։ Իսրայելական կողմի պնդմամբ՝ այդ ուղիներն օգտագործվում էին «Հեզբոլլահի» կողմից հազարավոր միավոր զենքեր, հրթիռներ և արձակման կայանքներ Հարավային Լիբանան տեղափոխելու համար։

Մարտի 3-ին՝ ժամը 12․37-ին, ցուցադրաբար անտեսելով իրավական նորմերը, «ԲՄՎ»-ի վարորդը դրիֆթ էր կատարել մայրաքաղաքի Ուլնեցու և Պարույր Սևակի փողոցների խաչմերուկում։

Պարեկային ծառայության Երևան քաղաքի գնդի աշխատակիցները ավտոմեքենան հայտնաբերել և տեղափոխել են պահպանվող հատուկ տարածք։

Համայնքային ոստիկանության Քանաքեռ-Զեյթունի բաժնի և պարեկների համատեղ միջոցառումներով պարզվել է, որ իր մեքենայով դրիֆթը կատարել է Գեղարքունիքի մարզի Ձորագյուղի բնակիչ 27-ամյա մի երիտասարդ։

Կազմված փաստաթղթերը ներկայացվել են Քանաքեռ-Զեյթունի վարչական շրջանի քննչական բաժին, որտեղ էլ խուլիգանության հատկանիշներով նախաձեռնվել է քրեական վարույթ։
Նախաքննությամբ հանգամանքները պարզվում են։

Հայոց ցեղասպանության հուշահամալիրի հիմնանորոգման և բարեկարգման աշխատանքներին հետևելու նպատակով ՀՀ կրթության, գիտության, մշակույթի և սպորտի նախարար Ժաննա Անդրեասյանն այսօր հերթական այցն է կատարել հուշահամալիր։ Նրան ուղեկցել են ԿԳՄՍՆ գլխավոր քարտուղար Հասմիկ Հակոբյանը և ՀՑԹԻ տնօրենի ժամանակավոր պաշտոնակատար Հրաչյա Թաշչյանը։

Ցեղասպանության հուշահամալիրի նախագծի հեղինակային խմբի ճարտարապետները և կապալառու շինարարական ընկերության ներկայացուցիչները նախարարին ներկայացրել են աշխատանքների ընթացքը՝ նշելով, որ մույթների նորոգումը, ինչպես նաև ամրացման և բարեկարգման մնացած աշխատանքներն ավարտական փուլում են և ընթանում են ըստ նախագծի։ Նախարարը հերթական անգամ ընդգծել է աշխատանքների որակի ու ժամկետների պահպանման խնդիրը։

Թուրքիայի նախագահ Ռեջեփ Էրդողանը ԱՄՆ նախագահ Դոնալդ Թրամփի հետ հեռախոսազրույցում քննարկել է տարածաշրջանային զարգացումները և Իրանում հրադադարը: 

Էրդողանն այն բնութագրել է որպես կրիտիկական հնարավորություն, որը պետք է ողջամտորեն օգտագործել կայուն խաղաղության համաձայնագրի ապահովման և այդ գործընթացը խափանելու ցանկացած փորձ կանխելու համար:

Նա նաև ընդգծել է, որ Թուրքիան կշարունակի՛ և կընդլայնի աջակցությունը դիվանագիտական նախաձեռնություններին՝ սերտորեն համագործակցելով Պակիստանի և այլ բարեկամ երկրների հետ՝ կայուն կարգավորման հասնելու համար:

Թուրքիայի նախագահն Իրանի շուրջ իրավիճակը քննարկել է նաև Պակիստանի վարչապետ Շահբազ Շարիֆի հետ, շնորհակալություն հայտնել վերջինիս այդ գործընթացում ունեցած դերի համար:

Մի կարևոր սարքավորում ենք ուզում ձեռք բերել: Այդ մասին Կառավարության նիստի ժամանակ ասաց ՏԿԵ նախարար Դավիթ Խուդաթյանը: Նա նշեց, որ քննարկվել է ճանապարհների շերտագրման սարք ձեռք բերելու հարցը:

«Այն մեզ թույլ է տալիս ամբողջությամբ շերտագրել և ԱԲ-ի հետ համադրելով՝ որոշել՝ ինչ տեսակի նորոգում պետք է անենք. այսինքն՝ սարքավորումը կանցնի ճանապարհի վրայով և մեզ խորհուրդ կտա այնտեղ միջին նորոգում անե՞նք, թե՞ հիմնանորոգում, մինչև ի՞նչ խորությամբ շերտ մենք այնտեղ փոխենք, և ի՞նչ հատիկային կազմով շերտ ստանանք: Երթևեկելով այդ ճանապարհով՝ մեզ կպատմի, օրինակ՝ ճանապարհի 70 սմ խորության վրա գտնվող ճաքերի մասին, ինչը մեզ թույլ կտա որոշել հիմնանորոգում անել, թե միջին նորոգում անել»,- ասաց Խուդաթյանը:

«Ասֆալտապատումը մոտեցնում ենք վիրահատության ճշգրտությանը և տրամաբանությանը»,- նշեց վարչապետ Նիկոլ Փաշինյանը:

«Շուկայի ուսումնասիրությամբ այս սարքավորումների գինը տատանվում է 1.2-1.5 մլն դոլարի արժեքով, հետևաբար, այո՛, այդ լրջությամբ սարքավորման մասին ենք խոսում, որը տարածաշրջանային նշանակության սարքավորում է»,- ասաց ՏԿԵ նախարարը:

45 տրոլեյբուսները, որոնք վարչապետի հանձնարարականով և Կառավարության ֆինանսավորմամբ Երևան քաղաքը ստանում է, մի փոքր ուշանալու են՝ կապված Իրանում իրավիճակի հետ: Այդ մասին Կառավարության՝ ապրիլի 9-ի նիստին ասաց Երևանի քաղաքապետ Տիգրան Ավինյանը: «Մայիսի կեսերին 45 տրոլեյբուսները կհասնեն Երևան»,- ասաց Ավինյանը՝ անդրադառնալով Երևանում տրանսպորտի բարելավմանն ուղղված ծրագրերին:

Վարչապետ Նիկոլ Փաշինյանը, անդրադառնալով Երևանում տրանսպորտի վիճակին, կարևորեց մետրոյի «Աջափնյակ» կայարանի կառուցման ծրագիրը. «Եկեք արձանագրենք, որ վերջին 30 տարում ՀՀ-ում մետրոյի ոչ մի նոր կայարան չի ստեղծվել և շահագործման չի հանձնվել, և սա էլի շատ մեծ նախագիծ է: Բայց որ այդ նախագիծն իրականացվելու է, երկու կարծիք չկա: Մենք բոլորս ուզում ենք, որ ժամկետները կարճ լինեն»: Ըստ Փաշինյանի՝ ռազմավարական նպատակն այն է, որ մետրոն շրջանաձև տեսք ստանա, ինչի արդյունքում երթևեկության տրամաբանությունը ևս կփոխվի, իսկ արդյունավետությունը կմեծանա:

Իրանի արտաքին գործերի նախարար Սեյեդ Աբբաս Արաղչին հայտարարել է, որ ԱՄՆ-ն պետք է ընտրություն կատարի՝ հրադադարի և «Իսրայելի միջոցով» պատերազմի շարունակության միջև։ Նրա խոսքով՝ ԱՄՆ-ի և Իրանի միջև համաձայնեցված երկշաբաթյա հրադադարի պայմանները «հստակ և միանշանակ» են։

X-ում հրապարակված գրառման մեջ Արաղչին ընդգծել է, որ համաձայնագիրը վերաբերում է նաև Լիբանանին՝ հղում անելով Պակիստանի վարչապետ Շահբազ Շարիֆի հայտարարությանը։ «ԱՄՆ-ն պետք է ընտրի՝ հրադադար, թե՞ շարունակական պատերազմ Իսրայելի միջոցով։ Այն չի կարող ունենալ երկուսն էլ»,-նշել է նա՝ անդրադառնալով Լիբանանում վերջին հարվածներին։

Իրանի ԱԳ նախարարը նաև հայտարարել է, որ «աշխարհը տեսնում է Լիբանանում տեղի ունեցող կոտորածները» և ընդգծել, որ «գնդակն ԱՄՆ-ի դաշտում է»՝ կոչ անելով Վաշինգտոնին գործել իր պարտավորություններին համապատասխան։

ԱՄՆ փոխնախագահ Ջեյ Դի Վենսը լավատեսորեն է տրամադրված Իրանի հետ բանակցություններին և հույս է հայտնել, որ Թեհրանը կցուցաբերի ողջամիտ վարքագիծ առաջիկա քննարկումների ընթացքում։

«Կարծում եմ՝ շատ բան է խաղադրույքին. եթե նրանք մեզ չտան այն, ինչ մեզ անհրաժեշտ է, կարծում եմ՝ ամեն ինչ վատ կդասավորվի։ Բայց ես լավատես եմ, որ իրանցիները խելամիտ կլինեն», – լրագրողներին ասել է Վենսը՝ Հունգարիայից մեկնելուց առաջ։

Նա ընդգծել է, որ բանակցությունների ընթացքում Միացյալ Նահանգները կպահանջի, որ Իրանը չհարստացնի ուրանը՝ միջուկային զենք ստեղծելու նպատակով։

Ավելի վաղ ԱՄՆ նախագահ Դոնալդ Թրամփը հայտարարել էր Իրանի հետ երկշաբաթյա հրադադարի վերաբերյալ համաձայնագրի մասին: Հետագայում Իրանի Ազգային անվտանգության գերագույն խորհուրդը տեղեկացրել էր, որ Միացյալ Նահանգները համաձայնել է Իրանի` տասը կետից բաղկացած առաջարկին, և Թեհրանն ապրիլի 10-ին Պակիստանի Իսլամաբադ քաղաքում կսկսի բանակցություններ ԱՄՆ-ի հետ։

Բանակցություններում ԱՄՆ պատվիրակությունը կգլխավորի Վենսը։ Պատվիրակության կազմում են նաև ԱՄՆ նախագահի հատուկ դեսպանորդ Սթիվ Ուիտկոֆը և Ջարեդ Քուշները:

Փրկարար ծառայությունը տեղեկացնում է, որ ՀՀ տարածքում ավտոճանապարհները հիմնականում անցանելի են:

Փակ են Արագածոտնի մարզում «Ամբերդ» բարձր լեռնային օդերևութաբանական կայանից Ամբերդ ամրոց և Քարի լիճ տանող ավտոճանապարհները։

Վարորդներին հորդորում ենք երթևեկել բացառապես ձմեռային անվադողերով։

Լարսի մասին

Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը փակ է բոլոր տեսակի տրանսպորտային միջոցների համար։

Ապրիլի 8-ին՝ ժամը 22։58-ին, ՆԳՆ 112 օպերատիվ կառավարման կենտրոն ահազանգ է ստացվել, որ Երևան-Գառնի ավտոճանապարհին՝ «Ջրվեժ» արգելոցապարկային համալիրի մոտակայքում, տեղի է ունեցել ՃՏՊ, կա արգելափակված քաղաքացի. անհրաժեշտ է փրկարարների օգնությունը։ Այս մասին հայտնում է ՆԳՆ փրկարար ծառայությունը։

Դեպքի վայր են մեկնել ՆԳՆ Փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական խումբը և Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ։

Պարզվել է, որ բախվել են «Mercedes-Benz» և VAZ մակնիշների ավտոմեքենաները․ ինչի հետևանքով VAZ մակնիշի ավտոմեքենայի ուղևորը արգելափակվել է։

Փրկարարները հոսանքազրկել են VAZ մակնիշի ավտոմեքենան, ուղևորին դուրս բերել ավտոմեքենայից և մոտեցրել շտապօգնության մեքենային․ տուժածը հոսպիտալացվել է։