julbaz.mediamonitoring.am

Գերմանիայի, Բելգիայի, Նիդերլանդների, Լյուքսեմբուրգի և Դանիայի առաջնորդները Մեծ Բրիտանիային և Եվրամիությանը կոչ են արել արագացնել ԵՄ էլեկտրաէներգիայի ներքին շուկա թագավորության վերադարձի շուրջ բանակցությունները, գրել է The Guardian-ը։

Նրանց կարծիքով՝ ավելի սերտ համագործակցությունը թույլ կտա նվազեցնել էներգիայի արժեքը և ընդլայնել Հյուսիսային ծովում վերականգնվող էներգետիկայի զարգացման հնարավորությունները։

Համապատասխան ուղերձն ուղարկվել է Եվրահանձնաժողովի նախագահ Ուրսուլա ֆոն դեր Լայենին և Եվրոպական խորհրդի նախագահ Անտոնիու Կոշտային՝ ԵՄ–Մեծ Բրիտանիա սպասվող գագաթնաժողովին ընդառաջ, որը պետք է կայանա նոյեմբերի 20-ին Բրյուսելում։

«Մենք կոչ ենք անում ձեզ և Մեծ Բրիտանիային գագաթնաժողովում համաձայնության գալ այս բանակցություններն ավարտելու հետագա քայլերի շուրջ», — նշվել է Գերմանիայի կանցլեր Ֆրիդրիխ Մերցի և մյուս չորս երկրների վարչապետների ստորագրած նամակում։

Ուղերձի հեղինակները Մեծ Բրիտանիան անվանել են էներգետիկ անցման կարևոր գործընկեր և ընդգծել, որ նրա ինտեգրումը ԵՄ էլեկտրաէներգիայի ներքին շուկային անհրաժեշտ է Հյուսիսային ծովի ներուժը բացահայտելու և տարածաշրջանն աշխարհում մաքուր էներգետիկայի խոշորագույն կենտրոնը դարձնելու համար։

Ավելի վաղ Մեծ Բրիտանիան և եվրոպական ևս ինը երկրներ պայմանավորվել էին արագացնել ծովային հողմաէներգետիկայի զարգացումը 2030-ական թվականներին և Հյուսիսային ծովում էներգետիկ ցանց ստեղծել։ Սակայն ԵՄ էլեկտրաէներգիայի ներքին շուկայից Մեծ Բրիտանիայի դուրս գալը բարդացնում է նման նախագծերի զարգացումը և ավելացնում ծախսերը։

Շուկա վերադարձը կարող է Լոնդոնից պահանջել ֆինանսական մուծումներ ԵՄ բյուջե, այդ թվում՝ պակաս զարգացած տարածաշրջանների աջակցության հիմնադրամներ։ Բրիտանացի պաշտոնյաները մտավախություն ունեն, որ հարկատուների միջոցները կուղղվեն Կենտրոնական և Արևելյան Եվրոպայի ենթակառուցվածքային նախագծերին։

Համաձայնագրի կողմնակիցները պնդում են, որ էներգետիկ շուկաների ավելի սերտ ինտեգրումը թույլ կտա ավելի արդյունավետ իրականացնել էլեկտրաէներգիայի առևտուրը և նվազեցնել բրիտանացի սպառողների ծախսերը։ Ոլորտային Energy UK կազմակերպության գնահատմամբ՝ ներկա պայմանների պահպանման դեպքում 2026–2029 թվականներին Մեծ Բրիտանիայի լրացուցիչ ծախսերը կարող են կազմել 10 միլիարդ ֆունտ սթեռլինգ՝ էներգիայի ավելի բարձր վճարների և բյուջետային մուտքերի կրճատման հետևանքով։

Առաջիկա գագաթնաժողովում կողմերը նաև ակնկալում են համաձայնագրեր կնքել սննդամթերքի և խմիչքների առևտրի, ածխածնային արտանետումների կրճատման և երիտասարդական փոխանակումների վերաբերյալ։

Իրաքը բանակցում է Նավթ արտահանող երկրների կազմակերպության (ՕՊԵԿ) հետ արտահանման սահմանաչափերն ավելացնելու շուրջ և մտադիր է ավելացնել նավթի արդյունահանումը։ Այս մասին Իրաքի INA տեղեկատվական գործակալության հարցազրույցում հայտնել է երկրի նավթի նախարար Բասեմ Մոհամեդ Խուդայրը։

Նախարարի խոսքով՝ Իրաքի արտադրական հզորությունները գերազանցում են արտահանման հնարավորությունները, սակայն երկիրը շարունակում է պահպանել ՕՊԵԿ-ի սահմանած սահմանափակումները։

«ՕՊԵԿ-ի հետ երկխոսություն է ընթանում արտահանման առավելագույն շեմն ավելացնելու շուրջ՝ հաշվի առնելով Իրաքի առանձնահատուկ հանգամանքներն ու այն դժվարությունների բնույթը, որոնց երկիրը բախվել է վերջին հինգ տասնամյակների ընթացքում», — նշել է Խուդայրը։

Նա ընդգծել է, որ արդյունահանման ավելացումը Իրաքին հնարավորություն կտար լրացուցիչ եկամուտներ ստանալ ենթակառուցվածքի զարգացման և պետական ծրագրերի իրականացման համար։

Նախարարը նաև հաստատել է, որ Իրաքը պահպանում է երկրի համար սահմանված արդյունահանման օրական 4,431 մլն բարել սահմանաչափը։