julbaz.mediamonitoring.am

Իրանի նկատմամբ տնտեսական ճնշումը ԱՄՆ «ամենաարդյունավետ գործիքն» է, հայտարարել է ԱՄՆ փոխնախագահ Ջեյ Դի Վենսը։

Նա Վաշինգտոնի և Թեհրանի դիմակայությունն անվանել է «նուրբ հավասարակշռություն», քանի որ երկու կողմերն էլ ճնշում են գործադրում միմյանց վրա։ Միևնույն ժամանակ, նրա խոսքով՝ վերջին մի քանի շաբաթների ընթացքում Իրանը զգալիորեն ավելի մեծ ճնշում է զգացել, քան ԱՄՆ-ը։

«Սա նրբանկատ պար է, երբ երկու կողմերն էլ փորձում են ճնշում գործադրել միմյանց վրա։ Բայց ինչն ակնհայտ է վերջին մի քանի շաբաթվա ընթացքում, այն է, որ նրանք շատ ավելի մեծ ճնշում են զգացել, քան մենք», — ասել է Վենսը։

Վենսը նշել է, որ ԱՄՆ-ում բենզինի գները դեռևս մնում են բարձր, սակայն, նրա պնդմամբ, դրանք արդեն «էականորեն նվազել են» այն բանի շնորհիվ, որ ամերիկացի զինվորականներին հաջողվել է ապահովել նավթի և գազի զգալի ծավալների արտահանումը Հորմուզի նեղուցով։

Սակայն Հորմուզով նավագնացության փաստացի ծավալը շարունակում է մնալ չափազանց ցածր։

Kpler վերլուծական ընկերության տվյալներով՝ երկուշաբթի նեղուցով անցել է ընդամենը 10 նավ, իսկ կիրակի՝ միայն երկուսը։ Պատերազմի սկսվելուց առաջ միջին ցուցանիշը կազմում էր օրական մոտ 130 նավ։

Հենց Հորմուզի նեղուցի նկատմամբ վերահսկողությունն էլ Վենսն անվանել է Իրանի ազդեցության գլխավոր լծակ։

Նրա խոսքով՝ նույնիսկ պարտադիր չէ, որ Վաշինգտոնը նավագնացությունը վերադարձնի նախապատերազմյան մակարդակին։ Բավական է ապահովել նավթի և գազի այնպիսի ծավալի արտահանում, որը թույլ կտա նվազեցնել ճնշումն ամերիկացի սպառողների և էներգակիրների գների վրա։

«Եթե մենք կարողանանք նույնիսկ ոչ թե իրավիճակը վերադարձնել նախկինին, այլ պարզապես արտահանել բավականաչափ նավթ և գազ, որպեսզի ամերիկացիների համար մի փոքր ավելի հեշտ լինի բենզալցակայաններում և էներգիայի գների հարցում», — ասել է փոխնախագահը։

Վենսը նաև ընդգծել է, որ, Թեհրանի առջև, Թրամփի վարչակազմի կարծիքով, դեռևս ընտրություն կա. «Նրանք ուզո՞ւմ են, որ իրենց տնտեսությունը խեղդվի մնացած ամբողջ ժամանակի ընթացքում, թե՞ ուզում են բարելավել հարաբերություններն Արևմուտքի հետ»։

Փոխնախագահի խոսքով՝ հենց այդպիսի ընտրություն է նախագահ Թրամփը «միշտ առաջարկել այդ մարդկանց»։

Մոսկվայի և Համայն Ռուսիո պատրիարք Կիրիլը 75-ամյակի առթիվ շնորհավորել է Ամենայն Հայոց կաթողիկոս Գարեգին II-ին՝ նշելով Հայաստանի հոգևոր կյանքի վերածննդի գործում Հայ Առաքելական եկեղեցու առաջնորդի մեծ ավանդը։

«Երիտասարդ տարիքից կյանքը նվիրելով Աստծուն ծառայելուն՝ Դուք երկար տարիներ կատարել եք պատասխանատու եկեղեցական ծառայություններ, աշխատել եք դասավանդման ասպարեզում, իրականացրել եք հովվական և եպիսկոպոսական ծառայություն։ Տեսնելով Ձեր նախանձախնդրությունը Ավետարանի քարոզչության հանդեպ և Քրիստոսի արտում հարյուրապատիկ հունդ բերելու ձգտումը՝ Տերը ձեզ շատերի վրա է կարգել (Մատթ. 25:21) և հանձնել է Հայ Առաքելական եկեղեցու Հովվապետի գավազանը։

Որպես ազգի հոգևոր առաջնորդ՝ Դուք մեծ ավանդ եք ունեցել կրոնական կյանքի վերածննդի գործում թե՛ Հայրենիքում, թե՛ սփյուռքում։ Ամենայն Հայոց կաթողիկոսի կարգավիճակով երկար տարիների անձնուրաց ծառայությունը Ձեր հանդեպ բերել է խոր հարգանք ամբողջ քրիստոնյա աշխարհում։

Մաղթում եմ Ձերդ Սրբությանը ամուր առողջություն, հոգու կորով և Աստծո չսպառվող օգնությունը հետագա առաջնորդական աշխատանքներում»,- ասված է շնորհավորական ուղերձում։

Շուտով մենք կփոխենք պարգևատրման համակարգը։ Այս մասին օգոստոսի 21-ին Ազգային ժողովի նիստում, ֆինանսավարկային և բյուջետային հարցերի մշտական խորհրդարանական հանձնաժողովի նախագահի ընտրության հարցի քննարկման ժամանակ, հայտնել է տտեսական հարցերի մշտական խորհրդարանական հանձնաժողովի նախագահ, իշխող «Քաղաքացիական պայմանագիր» խմբակցության պատգամավոր Բաբկեն Թունյանը՝ խոսելով ընդդիմության հնչեցրած մտահոգությունների մասին՝ կապված պարգևավճարների և ծառայողական մեքենաների օգտագործման հետ։

«Պարգևավճարի փոխարեն մենք կսկսենք ստանալ վերանայված աշխատավարձ։ Չգիտեմ՝ այդ ժամանակ դուք ինչպես եք հրաժարվելու դրանից։ Բայց դուք աշխատավարձ էիք ստանում պատգամավորներից երկու անգամ ավելի՝ նույնիսկ պարգևավճարների հետ միասին։ Սա նորմալ է, որովհետև պատասխանատու աշխատանք կատարող մարդիկ պետք է ստանան նորմալ վարձատրություն, և համեմատությունը՝ թե աղքատության այսպիսի մակարդակի պայմաններում նման աշխատավարձերն անտեղի են, տեղին չէ։ Պետք է հաշվի առնել, որ երկրի զարգացման համար անհրաժեշտ են պրոֆեսիոնալ կադրեր, իսկ նրանց, իր հերթին, պետք է նորմալ վճարել», – ասել է Թունյանը։

Օգոստոսի 18-ին ՀՀ ԱԱԾ սահմանապահ զորքերում ՀՀ ԱԱԾ տնօրենի տեղակալ Դ.Սանամյանի և սահմանապահ զորքերի հրամանատար, գնդապետ Գ.Մուրադյանի մասնակցությամբ ամփոփվել են 2026 թվականի առաջին կիսամյակի արդյունքները։

Զեկույցներով հանդես են եկել Սահմանապահ զորքերի հրամանատարի տեղակալներ՝ գնդապետ Վ.Մինասյանը, գնդապետ Լ.Սադոյանը, գնդապետ Լ.Կնյազյանը և այլ պաշտոնատար անձինք՝ ներկայացնելով կիսամյակի ընթացքում սահմանապահ զորքերի մարտական պատրաստության, պետական սահմանի պահպանության, զորքերի ծառայության կազմակերպման, զինվորական կարգապահության, ինչպես նաև բարոյահոգեբանական ապահովման ուղղություններով իրականացված աշխատանքները։ 

ՀՀ ԱԱԾ տնօրենի տեղակալ Դ.Սանամյանի և Սահմանապահ զորքերի հրամանատար, գնդապետ Գ.Մուրադյանի կողմից հատուկ ուշադրություն է դարձվել արձանագրված թերություններին և բացթողումներին, տրվել են համապատասխան ցուցումներ՝ արձանագրված խնդիրների լուծման, ծառայության արդյունավետության բարձրացման և կարգապահության ամրապնդման ուղղությամբ։

Միաժամանակ քննարկվել են անձնակազմի մասնագիտական պատրաստվածության շարունակական զարգացման վերաբերյալ հարցեր։Ամփոփման շրջանակում տեղի է ունեցել նաև պարգևատրման արարողություն։

2026 թվականի առաջին կիսամյակի արդյունքներով լավագույն ճանաչված Սահմանապահ զորքերի ստորաբաժանումներին հանձնվել են փոխանցիկ դրոշներ և հավաստագրեր, ծառայության ընթացքում ցուցաբերած բարձր արդյունքների և դրական ձեռքբերումների համար մի շարք զինծառայողներ պարգևատրվել են պատվոգրերով։