Գիշերը Ռուսաստանի Դաշնության զինված ուժերը շարունակել են խմբակային հարվածներ հասցնել օդային բազավորման բարձր ճշգրտության զենքով և հարվածային անօդաչու թռչող սարքերով Ուկրաինայի նավահանգիստներին և այն նավերին, որոնք ներգրավված են եղել Ուկրաինայի զինված ուժերի համար բեռների մատակարարման գործում։ Այս մասին հաղորդում է Ռուսաստանի պաշտպանության նախարարությունը։
«Հարվածների հետևանքով Օդեսայի մարզի «Յուժնի» նավահանգստում խոցվել են՝
վառելիքաքսուքային նյութեր տեղափոխած տանկեր, որը նախատեսված էր Ուկրաինայի զինված ուժերի ապահովման համար,
վառելիքով հինգ ռեզերվուար՝ Ուկրաինայի զինված ուժերի համար, վառելիքաքսուքային նյութերի պահեստային համալիրի տարածքում,
ռազմական նշանակության գույքի տասը պահեստ՝ լոգիստիկ տերմինալի տարածքում,
նավահանգստային ենթակառուցվածքի օբյեկտներ, որոնք օգտագործվում են ռազմական բեռների բեռնաթափման և պահպանման համար։
Բացի այդ, խոցվել է ՊՍ-330 «Աջալիկ» էլեկտրական ենթակայանը (Օդեսայից 28 կմ հյուսիս-արևմուտք), որն ապահովում է «Յուժնի» նավահանգստի գործունեությունը։
ՆԳ նախարար Արփինե Սարգսյանի գլխավորությամբ օգոստոսի 22-ին տեղի է ունեցել «ՀՀ քաղաքացիության մասին» օրենքում փոփոխություններ և լրացումներ կատարելու վերաբերյալ աշխատանքային քննարկում։ Այս մասին NEWS.am–ին հայտնում են ՆԳՆ-ից։
Քննարկմանը մասնակցել են ՆԳ նախարարի տեղակալի ժամանակավոր պաշտոնակատար Արմեն Ղազարյանը, Միգրացիայի և քաղաքացիության ծառայության պետի ժամանակավոր պաշտոնակատար Նելլի Դավթյանը, ՆԳ նախարարության ներկայացուցիչներ։
Օրակարգում քաղաքացիության տրամադրման գործընթացների առավել արդյունավետ կազմակերպմանը, գործող իրավակարգավորումների կատարելագործմանը և ոլորտում առկա խնդիրների լուծմանն առնչվող հարցերն են եղել։
Արփինե Սարգսյանն ընդգծել է, որ անհրաժեշտ է վերագնահատել քաղաքացիության ինստիտուտը՝ կարևորելով քաղաքացիություն ստացող անձի և Հայաստանի Հանրապետության միջև կայուն իրավական կապի ապահովումը։
«Մենք վերարժևորում ենք քաղաքացիության շնորհման և դադարեցման ընթացակարգերը և դրանց տրամաբանության հիմքում դնում պետություն-քաղաքացի հարաբերությունների նոր մոտեցում։ Մեր մշակած բոլոր լուծումների հիմքում պետք է լինի այն ընկալումը, որ պետություն-քաղաքացի հարաբերությունների տեսանկյունից պետք է ապահովենք նոր որակ»,- ընդգծել է ՆԳ նախարարը։
Ներկայացվել են ՀՀ քաղաքացիություն ստանալու, վերականգնելու և հարակից գործընթացների վերանայմանն ու կատարելագործմանն ուղղված առաջարկներ։ Քննարկվել են իրավական պահանջների և գործող մեխանիզմների բարելավման հնարավորությունները, ինչպես նաև ոլորտում ի հայտ եկած խնդիրների կարգավորմանը միտված լուծումները՝ հաշվի առնելով միջազգային լավագույն փորձը Հայաստանի Հանրապետության իրավական ու գործնական առանձնահատկություններին համապատասխանեցնելու նպատակով։
ՆԳ նախարարը հանձնարարել է քննարկման արդյունքներով փաթեթը բերել վերջնական տեսքի և ներկայացնել հանրային քննարկման։
Ճի՞շտ եմ հասկանում, որ օրն ավարտվում է, բայց որևէ բարձրաստիճան պետական պաշտոնյա, այդ թվում՝ Փաշինյանը, Անկախության հռչակագրի օրվա առթիվ ուղերձով հանդես չեն եկել։
Միանգամից ասեմ, որ զարմանալու որևէ առիթ չկա։ Այն տրամաբանությամբ, որով վերջին տարիներին շարժվում է Փաշինյանը, անխուսափելիորեն հանգեցնելու էր այս օրվան։
Նույնիսկ մեկ տարի առաջ, Փաշինյանն իր ուղերձում դեռևս արձանագրում էր, որ Հռչակագրով «սկիզբ դրվեց մեր անկախ պետականության՝ Հայաստանի Հանրապետության հաստատման գործընթացին»։ Մեկ տարի անց՝ այսօր, չանդրադառնալով Հռչակագրի օրվան, Փաշինյանը, ըստ էության, ուղերձ չհղելով ուղերձ է հղում այն մասին, որ Հռչակագիրն այլևս իրենից ոչինչ չի ներկայացնում․ «Կոնֆլիկտի հռչակագիրն» այլևս անցյալում է, քանի որ մենք արդեն ապրում ենք «չորրորդ հանրապետությունում»։ Իսկ «չորրորդ հանրապետության» շինարարներին, կամ, ավելի ճիշտ, այդ շինարարների կողմնակիցներին հարկ է հիշեցնել Փաշինյանի անցած տարվա ուղերձի հետևյալ տողերը․
«Ի վերջո, ինչու՞ մինչեւ 2020 թվականի սեպտեմբերը Հայաստանի Հանրապետությունը, մեր Կառավարությունը, ես՝ ինքս, չգնացինք զիջումների, ինչը 44–օրյա պատերազմից խուսափելու միակ տեսական հնարավորությունն էր։ Դրա առանցքային պատճառն այն էր, որ այդ զիջումների արդյունքում մեր ունեցած բոլոր սպառնալիքները եւ կախվածությունները մեծանալու էին, մեծանալու էին անհամաչափորեն՝ հանգեցնելով Հայաստանի անկախության եւ պետականության կորստի»։
Այս տողերում են ամփոփված «չորրորդ հանրապետության» ողջ պերճանքն ու թշվառությունը։ Տողեր, որոնք երբեք չեն ջնջվելու Հայոց պատմության ամոթալի էջերից։
Ի դեպ, ուղերձով հանդես չի եկել նաև Հայաստանի Հանրապետության նախագահը, ինչը վերջինիս կողմից ցուցաբերվող վարքի ամենախայտառակ դրսևորումն է։
Քաղաքական իրավունքների հայկական կենտրոնը գործարկում է Հայաստանում քաղաքական հետապնդվողների ռեգիստր: Այսուհետ ռեգիստրում ընդգրկվելու են բոլոր այն անձինք, ում գործերն ուսումնասիրելով ՔԻՀԿ-ը եզրակացրել է, որ հետապնդումը կրում է քաղաքական բնույթ։
Ինչու՞ ենք ստեղծել քաղաքական հետապնդումների ռեգիստրը
Ռեգիստրը քաղաքացիական վերահսկողության գործիք է. այն թույլ է տալիս հասարակությանը, լրագրողներին ու միջազգային կառույցներին տեսնել ամբողջական պատկերը և պահանջել հաշվետվողականություն այն դեպքերում, երբ իրավական համակարգն օգտագործվում է քաղաքական նպատակներով։
«Այսօր Քաղաքական իրավունքների հայկական կենտրոնը ներկայացնում է երկու գործիք.
● Հետապնդման քաղաքական դրդապատճառի վերհանման մեթոդաբանություն, որն օգնում է հստակ չափանիշներով որոշել, թե ե՞րբ է հետապնդումը կրում քաղաքական բնույթ https://acpr.center/hy/persecutions/methodology/
● Ռեգիստր — Հայաստանում քաղաքական հետապնդման ենթարկվողների փաստագրված ցանկ
Կարևոր է նշել, որ այս ցանկը դեռևս ավարտուն չէ, իսկ գործիքը կարող է ենթարկվել փոփոխությունների։ Այս պահին դրանում ներառված են բացառապես այն անձինք, ում գործերն արդեն իսկ ուսումնասիրվել ու ներկայացվել են ՔԻՀԿ-ի նախորդ հրապարակումներում:
Հիշեցում. ՔԻՀԿ-ի գործունեությունը ֆինանսավորվում է բացառապես անհատական նվիրվատվությունների միջոցով, որոնք ունեն հստակ չափանիշներ։ Դրանց կարող եք ծանոթանալ այստեղ։
ՔԻՀԿ-ն շարունակում է ուսումնասիրել այլ հետապնդումները՝ ներառյալ 2026թ ընտրությունների, ՀԱՍԵ դեմ շարունակվող արշավի համատեքստերում»,- հայտնում են Քաղաքական իրավունքների հայկական կենտրոնից։
Օգոստոսի 24-ի գիշերը Կրասնոդարի երկրամասը ենթարկվել է ուկրաինական անօդաչու թռչող սարքերի զանգվածային հարձակման, հայտնել է տարածաշրջանի նահանգապետ Վենիամին Կոնդրատևը, հաղորդում է «Կուբան 24»-ը։
«Երկրամասի վարչական կենտրոնում ԱԹՍ-ի բեկորներն ընկել են երեխաների շուրջօրյա կեցությամբ մասնավոր մանկական կենտրոնի վրա։ Զոհվել է երկու երեխա։ Եվս 7 երեխա տուժել է։ Քաղաքի հիվանդանոցներում գտնվում են նաև ևս երկու մեծահասակ», — նշել է նա։
Օգոստոսի 24-ին ԱԹՍ-ի հարձակման թիրախ է դարձել Կրասնոդարի լոգիստիկական կենտրոնը։ Բոլոր համակարգերն աշխատել են նորմալ ռեժիմով, մենք արագ տարհանել ենք աշխատակիցներին։ Այս մասին հայտնել են Ozon ընկերությունից։
Նախնական տվյալներով՝ տուժածներ չկան։ Սկսվել է խոշոր հրդեհ, տեղում աշխատում են արտակարգ ծառայությունները։ Պահեստի աշխատանքը դադարեցվել է։
Բացի այդ, գիշերը Ozon-ի պահեստները Ադիգեյսկում (Ադիգեա) և Նևիննոմիսկում (Ստավրոպոլի երկրամաս) նույնպես տարհանվել են ԱԹՍ-ի հարձակման սպառնալիքի պատճառով։ Պահեստների աշխատակիցները չեն տուժել։ Ինքը՝ օբյեկտները, և ներսում գտնվող ապրանքները անվնաս են։ Տեղերում աշխատում են արտակարգ ծառայությունները, ուստի պահեստները ժամանակավորապես փակ են։
Նաև առավոտյան մոտ ժամը 5-ին ԱԹՍ-ի հարձակման թիրախ է դարձել Մախաչկալայի լոգիստիկական կենտրոնը։ Բոլոր համակարգերն աշխատել են նորմալ ռեժիմով, մենք արագ տարհանել ենք աշխատակիցներին։ Նախնական տվյալներով՝ կան մի քանի տուժածներ։ Սկսվել է հրդեհ, տեղում աշխատում են արտակարգ ծառայությունները։ Պահեստի աշխատանքը դադարեցվել է։
Իտալական ավտոարտադրող Fiat-ը, որը վերջին տարիներին արագորեն կորցնում էր դիրքերը ամերիկյան շուկայում, անսպասելիորեն նոր խորշ է գտել՝ փոքրիկ էլեկտրամոբիլներ, որոնք կարող են մրցակցել գոլֆ-քարտերի հետ, գրում է Autoblog-ը։
Խոսքը Fiat Topolino-ի մասին է՝ կոմպակտ էլեկտրական քառանիվի, որի պաշտոնական պրեմիերան ԱՄՆ-ում նախատեսված է հոկտեմբերին։ Դեռևս վաճառքի մեկնարկից առաջ մոդելը նկատելի հետաքրքրություն է առաջացրել ամերիկացի գնորդների շրջանում, հատկապես փակ բնակելի համայնքներում, որտեղ բնակիչները հաճախ կարճ ուղևորությունների համար օգտագործում են գոլֆ-քարտեր։
Fiat-ի խնդիրները ԱՄՆ-ում սկսվել էին դեռ Topolino-ի հայտնվելուց շատ առաջ։ Բրենդի վաճառքները նվազում էին դեռևս մինչև համավարակը, իսկ հետո իրավիճակը խորացրին մատակարարման գլոբալ շղթաներում խափանումները և միկրոչիպերի պակասը։ 500L և 500X մոդելների վաճառքի դադարեցումից հետո Fiat-ի ամերիկյան մոդելային շարքը փաստացի կրճատվեց մինչև մեկ մոդել՝ էլեկտրական 500e։
2022 թվականին ամերիկացիները գնեցին ընդամենը 919 Fiat ավտոմեքենա, իսկ 2023-ին վաճառքները նվազեցին մինչև 602 մեքենա։ 500e-ի թողարկումից հետո 2024 թվականին տեղի ունեցավ փոքր աճ, սակայն այնուհետև վաճառքները կրկին նվազեցին։
Այս ֆոնին Topolino-ն կարող է լինել հենց այն ապրանքը, որը թույլ կտա բրենդին պահպանվել ԱՄՆ-ում։
Topolino-ն պատկանում է քառանիվների կատեգորիային։ Եվրոպայում նման մեքենաները նախատեսված են առաջին հերթին քաղաքներում և փոքր բնակավայրերում կարճ ուղևորությունների համար, և որոշ երկրներում դրանք հասանելի են դեռահասներին՝ համապատասխան թույլտվության կամ անվտանգության հավաստագրի առկայության դեպքում։
Ամերիկյան շուկան Topolino-ի համար մի փոքր այլ տեսք ունի։ Fiat-ը հույսը դնում է ապահովված փակ համայնքների գնորդների վրա, որտեղ գոլֆ-քարտերը վաղուց օգտագործվում են որպես առօրյա տրանսպորտ։ Սովորական նոր գոլֆ-քարտն արժե մոտ 5 հազար դոլար, իսկ ավելի թանկ և անհատական համալրմամբ տարբերակները կարող են արժենալ ավելի քան 20 հազար դոլար։ Topolino-ի գինը մոտ 15 հազար դոլար է, այսինքն՝ գրեթե այդ միջակայքի մեջտեղում։
Մոդելի նկատմամբ հետաքրքրությունը հայտնվել էր դեռ պաշտոնական մեկնարկից առաջ։ Topolino-ով տեսահոլովակի հրապարակումից հետո Fiat-ի ամերիկյան դիլերները բազմաթիվ հարցումներ ստացան էլեկտրամոբիլը ձեռք բերելու ցանկություն ունեցողներից։
ԱՄՆ-ի համար առաջին խմբաքանակը կազմում էր ընդամենը 300 մեքենա, ընդ որում որոշ դիլերներ գրեթե անմիջապես սպառեցին իրենց քվոտան։ Դիլերական կենտրոններից մեկում վեց Topolino գնեցին դեռ մինչև մեքենաների հարթակ հասնելը։ Մեկ այլ դիլեր նույնպես վաճառեց իրեն հատկացված հինգ մեքենաները՝ չսպասելով մոդելի պաշտոնական վաճառքին։ Միչիգանում առաջին 14 ավտոմեքենաներից կարճ ժամանակում վաճառվեցին 10-ը, որից հետո դիլերը ստիպված եղավ պատվիրել ևս ինը։
Topolino-ի առաջին սեփականատերերից մեկը պատմել է, որ մեքենան արդեն գրավում է հարևանների ուշադրությունը։
«Մարդիկ բառացիորեն կանգնեցնում են ինձ և ձեռքով անում», – պատմել է նա։
Այժմ Fiat-ի առջև խնդիր է դրված նախավաճառքային աղմուկը վերածել կայուն պահանջարկի։
ԱՄՆ Միչիգան նահանգից մի զույգ, հանգստից տուն վերադառնալու ճանապարհին կանգ առնելով բենզալցակայանում, անսպասելիորեն վիճակախաղում շահել է 500 հազար դոլար, հայտնում է UPI-ն։
Ջենեսի շրջանի 64-ամյա բնակիչը Միչիգանի վիճակախաղի ներկայացուցիչներին պատմել է, որ սկզբում ընդհանրապես չէր պատրաստվում տոմսեր գնել։ Սթենդիշ քաղաքում գտնվող Shell բենզալցակայանում նա հերթում հայտնվել էր մի գնորդի հետևում, որը մի քանի վիճակախաղի տոմս էր գնել։ Դա ոգեշնչել է տղամարդուն նույնպես փորձել բախտը։
Նա իր համար գնել է Detroit Tigers-ի երկու սքրեչ-տոմս, իսկ կնոջ համար՝ Cashword-ի երկու տոմս։
Կնոջ տոմսերը ստուգել են արդեն տանը։ Երբ տղամարդը տեսել է 500 հազար դոլարի շահումը, մտածել է, թե սխալ է հասկացել կանոնները։ Ամուսինները մի քանի անգամ նորից ստուգել են տոմսը, նախքան հավատացել են, որ իսկապես շահել են կես միլիոն դոլար։
Տղամարդը նշել է, որ շահումը լավ ֆինանսական բարձիկ կդառնա թոշակի անցնելու տարիների համար։ Գումարի մի մասը ամուսինները նախատեսում են նաև տալ երեխաներին։
«Ամբողջ կյանքում աշխատում ես և գումար խնայում թոշակի համար, ուստի անհավանական է մեկ օրում ստանալ այնքան գումար, որքան վաստակել ես տարիների ընթացքում», — խոստովանել է հաղթողը։
NASA-ի գիտնականները կազմել են, այսպես կոչված, «զրոյական վարագույրի» (zero curtain) առաջին մանրամասն քարտեզները՝ այն ժամանակահատվածի, երբ արկտիկական հողը աշնան սկսվելուց հետո…
Արարատ լեռան մոտ գտնվող Դյուրուպընարի (Durupınar) խորհրդավոր ժայռային գոյացության նոր ռադարային նկարահանումը բացահայտել է արտահայտված ստորգետնյա անոմալիաներ և օբյեկտի ներսում առանձին շերտեր, որոնք, հետազոտողների կարծիքով, կարող են վկայել թաքնված կառուցվածքի առկայության մասին, հայտնում է Daily Mail-ը։
Արարատ լեռան մերձակայքում գոյացությունն ուսումնասիրող խումբը կարծում է, որ այն կարող է լինել աստվածաշնչյան Նոյյան տապանի մնացորդը։
Մոտ 157 մետր երկարությամբ գոյացությունը վաղուց է ուշադրություն գրավում իր անսովոր՝ նավ հիշեցնող ձևի պատճառով։ Շատ երկրաբաններ այն համարում են երկրաբանական գործընթացների բնական արդյունք, սակայն տապանի վարկածի կողմնակիցները պնդում են, որ մակերեսի տակ կարող են գտնվել մարդու ձեռքով ստեղծված կառույցի մնացորդներ։
Նոր հետազոտությունն իրականացրել է միջազգային խումբը՝ դոկտոր Խոսրով Բախտարի գլխավորությամբ, օգտագործելով մասնագիտացված BakhtarRadar ռադիոլոկացիոն համակարգը։ Հետազոտողների վկայությամբ, սարքը թույլ է տալիս ավելի խորը դիտարկել, քան նախկինում կիրառված մեթոդները։
Ստացված տվյալներն առայժմ թույլ չեն տալիս հայտնաբերել հստակ սահման գոյացության և դրա տակ գտնվող հիմնաքարի միջև։ Միևնույն ժամանակ, ռադարը գրանցել է արտահայտված ուղիղ անկյուններով հատվածներ և տարբեր ներքին շերտեր։ Հետազոտողները ենթադրում են, որ այդ կառուցվածքներից որոշները կարող են համապատասխանել ենթադրյալ նավի ներսում գտնվող տարածքներին։
Խումբը նախատեսում է նոր տվյալների հիման վրա որոշել հորատման միջուկային նմուշառման վայրերը։ Ստացված նմուշները հնարավորություն կտան ռադիոլոկացիայի արդյունքները ստուգել անմիջապես ֆիզիկական նյութի հիման վրա և պարզել՝ արդյոք օբյեկտի ներսում կա փայտ կամ մարդկային գործունեության այլ նշաններ։
Հետազոտողները շեշտում են, որ ներկայիս արդյունքները նախնական են և ինքնին չեն ապացուցում գոյացության հնագիտական ծագումը։ Այնուամենայնիվ, նրանք անհրաժեշտ են համարում հետագա ստուգումներ անցկացնել։
Օբյեկտը գտնվում է Արարատից մոտ 29 կիլոմետր հարավ։ Այն առաջին անգամ լայն հանրությանը հայտնի դարձավ XX դարում, այն բանից հետո, երբ հորդառատ անձրևներն ու երկրաշարժերը բացահայտեցին դրա ուրվագծերը։
Վարկածը, թե հենց այստեղ կարող է գտնվել Նոյյան տապանը, հիմնված է նաև դրա չափերի աստվածաշնչյան նկարագրության վրա՝ 300 կանգուն երկարություն, 50 կանգուն լայնություն և 30 կանգուն բարձրություն։ Սա մոտավորապես համապատասխանում է 157 մետր երկարության, 26 մետր լայնության և 16 մետր բարձրության։
Noah’s Ark Scans նախագծի հետազոտողները պնդում են, որ 2016 թվականից ի վեր գեոռադարի միջոցով հայտնաբերել են ենթադրյալ խոռոչներ, միջանցքներ և այլ ներքին կառուցվածքներ։ 2024 թվականին խումբը նաև հավաքել է հողի 88 նմուշ՝ գոյացության ներսից և դրսից։
Սակայն տապանի գոյության վերջնական հաստատում դեռ չկա։ Հաջորդ փուլը պետք է լինի հորատումը և օբյեկտի խորքից վերցված նմուշների ուսումնասիրությունը․ հենց դա կարող է ցույց տալ՝ արդյոք անսովոր ձևի տակ թաքնված է հնագույն կառույց, թե հետազոտողների առջև բացառապես բնական երկրաբանական գոյացություն է։
