julbaz.mediamonitoring.am

Ատլանտյան օվկիանոսում հինգշաբթի օրը ձևավորվել է «Դոլլի» արևադարձային փոթորիկը: Այն գտնվում է ցամաքից հեռու, և, օդերևութաբանների կանխատեսումներով, արդեն առաջիկա օրերին սկսելու է արագորեն թուլանալ, հայտնում է «Associated Press»-ը:

Մայամիում գտնվող Փոթորիկների դիտարկման ազգային կենտրոնը հայտնել է, որ փոթորկի վերաբերյալ կանոնավոր կանխատեսումներ է հրապարակելու: Սպասվում է, որ դրա համար ոչ բարենպաստ եղանակային պայմանները ձևավորվել են ուրբաթ օրվանից:

«Դոլլի» փոթորկի անունը որևէ կապ չունի երեքշաբթի օրը մահացած ամերիկացի երգչուհի Դոլլի Փարթոնի հետ: Արևադարձային փոթորիկներին և մրրիկներին անուններ են տրվում Համաշխարհային օդերևութաբանական կազմակերպության (ՀՕԿ) կողմից նախապես հաստատված ցուցակներով, որոնք կրկնվում են վեց տարին մեկ:

«Դոլլին» դարձել է 2026 թվականի Ատլանտյան մրրիկների շրջանի չորրորդ անվանական փոթորիկը: Մինչ այդ այս շրջանում ձևավորվել էին «Արթուր», «Բերթա» և «Քրիստոբալ» արևադարձային փոթորիկները: «Արթուրը» հունիսին հասել էր ԱՄՆ-ի Մեքսիկական ծոցի ափամերձ հատվածին, «Բերթան» հուլիսին առատ անձրևներ էր բերել Լուիզիանա և Տեխաս, իսկ «Քրիստոբալը» օգոստոսի սկզբին արագորեն ցրվել էր Ատլանտյան օվկիանոսի վրա:

ԱՄՆ-ի Օվկիանոսային և մթնոլորտային հետազոտությունների ազգային վարչությունը (NOAA) այս տարի կանխատեսում է միջինից ցածր մրրիկների շրջան: Սպասվում է 8-ից 14 անվանական փոթորիկների ձևավորում, որոնցից 3-ից 6-ը կարող են հասնել մրրկային ուժգնության, իսկ 1-ից 3-ը՝ վերածվել հզոր մրրիկների:

Փոթորիկներին անուններ են տալիս նախազգուշացումների փոխանցումը դյուրացնելու և շփոթմունքից խուսափելու համար: ՀՕԿ-ի կանոնների համաձայն՝ անունները պետք է լինեն կարճ, հեշտ արտասանվող և ծանոթ լինեն համապատասխան տարածաշրջանների բնակիչներին: Հատկապես ավերիչ փոթորիկների անունները հետագայում կարող են հանվել ցուցակներից: Այսպիսով, 2025 թվականին Կարիբյան ավազանին հարվածած 5-րդ կատեգորիայի ավերիչ «Մելիսա» փոթորկից հետո այդ անունը հանվել է գործածությունից:

«Visa» և «Mastercard» վճարային համակարգերն առաջին անգամ միջազգային քարտային գործարքներ են իրականացրել Սիրիայում, ինչը երկրի՝ տասնամյակների պատժամիջոցներից ու մեկուսացումից հետո համաշխարհային ֆինանսական համակարգ վերադառնալու կարևոր քայլ է: Այս մասին հայտնում է «Reuters»-ը:

Գրեթե միաժամանակ երկու խոշորագույն վճարային համակարգերը երկրում փորձնական գործարքներ են իրականացրել այն բանից ընդամենը երկու օր անց, երբ ԱՄՆ-ն Սիրիան հանեց ահաբեկչությունը հովանավորող պետությունների ցուցակից:

Կատարական «QNB Group»-ը հայտնել է «Mastercard»-ի հետ համատեղ Սիրիայում աշխարհում առաջին լիարժեք միջազգային քարտային գործարքի իրականացման մասին: Զուգահեռաբար «Visa»-ն հայտարարել է իր առաջին իրական ժամանակում փորձնական գործարքի մասին, որն իրականացվել է լիբանանյան «Fransabank»-ի հետ համատեղ:

«Visa»-ի փորձնական գործարքին մասնակցել է Սիրիայի նախագահ Ահմեդ ալ-Շարան: Նա բանկային քարտով վճարում է կատարել Դամասկոսի պատմական Հին քաղաքի ռեստորաններից մեկում: Նրա կողքին է եղել նաև Սիրիայի Կենտրոնական բանկի ղեկավար Մուհամմադ Սաֆվատ Ռասլանը:

Առաջին գործարքները տեղի են ունեցել ԱՄՆ-ի կողմից Սիրիան ահաբեկչությունը հովանավորող պետությունների ցանկից պաշտոնապես հանելուց երկու օր անց: Այդ կարգավիճակը պահպանվում է 1979 թվականից և լուրջ իրավական ու համապատասխանության ռիսկեր է ստեղծում միջազգային բանկերի և ներդրողների համար:

Անցյալ տարվա դեկտեմբերին Վաշինգտոնը չեղարկել էրՍիրիայի դեմ համապարփակ պատժամիջոցները՝ պահպանելով մարդու իրավունքները խախտողների, նարկոտրաֆիկի մասնակիցների, ԻՊ-ի և «Ալ-Կաիդայի» հետ կապված խմբավորումների, ինչպես նաև իրանամետ կազմավորումների նկատմամբ նախկին նախագահ Բաշար Ասադի և նրա շրջապատի հայեցողական սահմանափակումները:

Սիրիայի իշխանությունները հույս ունեն, որ վերջին նշանակալի ֆինանսական սահմանափակումների հեռացումը թույլ կտա երկրին վերականգնել կապերը համաշխարհային տնտեսության հետ, ներգրավել օտարերկրյա ներդրումներ և արագացնել վերականգնումը բազմամյա հակամարտությունից հետո:

«Visa»-ն հայտարարել է օտարերկրյա այցելուներին Սիրիայում քարտերով վճարելու հնարավորություն ընձեռելու ծրագրերի մասին: «Mastercard»-ը «QNB»-ի միջոցով արդեն ստեղծել է ենթակառուցվածք, որը սիրիական հյուրանոցներին, ռեստորաններին և պետական հիմնարկներին թույլ է տալիս տերմինալների միջոցով ընդունել միջազգային վարկային քարտերը:

Առևտրի նոր կետերի միացումը տեղի է ունենալու փուլ առ փուլ և պահանջում է կարգավորող մարմինների անհրաժեշտ թույլտվությունները:

Գործարքն իրականացնելու համար «Visa»-ն որպես էքվայրեր-բանկ օգտագործել է լիբանանյան «Fransabank»-ը և սիրիական «Paymera» վճարային տեխնոլոգիական ընկերությունը, որը պատկանում է պետական ինքնիշխան հիմնադրամին: