julbaz.mediamonitoring.am

Հայաստանը պետք է ոչ թե թշնամանա եղբայրական երկրների հետ, այլ ընդհակառակը՝ զարգացնի ու խորացնի այդ հարաբերությունները։ Այս մասին իր նախընտրական հանդիպման ժամանակ հայտարարել է «Բարգավաճ Հայաստան» կուսակցության առաջնորդ Գագիկ Ծառուկյանը։

Նրա խոսքով՝ Ռուսաստանի հետ թշնամությունը Հայաստանի համար «բացարձակ փակուղի» է։

Ծառուկյանը հիշեցրել է, որ Վրաստանը երկար տարիներ գնացել է այն ճանապարհով, որով այսօրվա իշխանությունները փորձում են տանել Հայաստանը, բայց չի կարողացել Եվրոպային «նույնիսկ մի շիշ գինի» վաճառել։

«Մարդիկ այսօր վարկերի ծանր բեռի տակ են, բայց արդեն խնդիրների առաջ են կանգնել ինչպես այդ վարկերի վճարման, այնպես էլ աշխատավարձերի վճարման մասով, որովհետև ճանապարհը փակ է, մարդիկ չեն կարողանում իրենց արտադրանքը տանել (Ռուսաստան)»,- հայտարարել է նա՝ հավելելով, որ Ռուսաստանը եղբայրական է համարում հայ ժողովրդին, բայց չի կարող համագործակցել Հայաստանի ղեկավարության հետ, որը ձգտում է երկիրը տանել դեպի ԵՄ։

Ծառուկյանը նշել է, որ իշխանությունները պետք է պատասխանատվություն դրսևորեն և օգնեն մարդկանց դուրս գալ ստեղծված իրավիճակից. կա՛մ բանկերից պահանջեն սառեցնել վարկերի վճարումները մինչև իրավիճակի հանգուցալուծումը, կա՛մ իրենք իրենցով փակեն վարկերը, քանի դեռ ստեղծված իրավիճակից ելք չեն գտել։

Իրանի բանակը հայտարարել է, որ իր հակաօդային պաշտպանության ստորաբաժանումները շաբաթ օրը վաղ առավոտյան Քեշմ կղզու վերևում հաջողությամբ որսացել և ոչնչացրել են թշնամական Orbiter տեսակի անօդաչու թռչող սարք, հաղորդում է Mehr լրատվական գործակալությունը։

Բանակի հասարակայնության հետ կապերի վարչության հայտարարության մեջ ասվում է, որ «ամերիկա-սիոնիստական թշնամուն» պատկանող Orbiter անօդաչու սարքը հայտնաբերվել և գրոհի է ենթարկվել բանակի հակաօդային պաշտպանության ուժերի կողմից։

Անօդաչուն խոցվել է Քեշմի շրջանում այն բանից հետո, երբ հաջողությամբ հայտնաբերվել և թիրախավորվել է բանակի հակաօդային պաշտպանության համակարգի կողմից, որը գործում է երկրի ՀՕՊ միասնական շտաբի ինտեգրված ցանցի շրջանակներում, նշվում է հայտարարության մեջ։

Ձեր որդիները, ամուսինները, քույրերը, ձեր հարազատները կյանք են տվել հայրենիքի համար։ Ես ձեզ հետ որոնել եմ նրանց մարմինները մարտի դաշտում։ Ես տեսել եմ ձեր արցունքը, ձեր տառապանքը, բայց ես նաև տեսել եմ ձեր հպարտությունը հերոսների համար։ Նրանց զոհողությունը սուրբ է, և պետությունը պետք է ամեն ինչ անի, որ արժանի լինի ամեն օր այդ զոհողությանը։ Այս մասին ֆեյսբուքյան իր ուղերձում ասել է «Միասնության թևեր» կուսակցության վարչապետի թեկնածու Արման Թաթոյանը՝ դիմելով զոհված զինծառայողների հարազատներին։

«Մենք ձեզ խոստանում ենք երեք բան։ Հարգանք։ Ոչ ոք իրավունք չունի վիրավորելու ու նվաստացնելու զոհվածի ընտանիքի անդամին։ Արդարություն։ Յուրաքանչյուր սխալ որոշում ու սխալ քայլ, որը կյանքեր է խլել, պետք է ունենա հստակ իրավական ու քաղաքական գնահատական։ Հոգատարություն։ Պետությունը զոհվածների ընտանիքներին պետք է հիշի ոչ թե հիշատակի օրերին միայն, այլ նրանց կողքին լինի ամեն օր»,- նշել է Արման Թաթոյանը։

«Միասնության թևերի» վարչապետի թեկնածուն խոստացել է, որ հերոսների հիշատակը երբեք չի լինելու քաղաքական առևտրի առարկա կամ գործիք․ նրանց անունները միշտ պետք է հիշվեն և մնան որպես Հայաստանի արժանապատվության խորհրդանիշներ։